你哋會為自己嘅偽善付出代價,NBA只係早啲出事

 

 

邊個都冇諗過,火箭GM莫利喺twitter分享一句「Fight for freedom stand with Hong Kong」竟然會成為中美打大交嘅新火頭。件事由民間迅速升溫去到官方,贊助商爭相割席,甚至連中國籃協、中國駐侯斯頓大使館,CCTV,去到外交部都出聲要利為言論負責任,要佢落台、道歉,兼且被罰。可見大陸對反送中運動嘅顧忌,同埋要借理由搵啲嘢開美國波嘅心有幾強。

不過,又正值美國同大陸打大交,所以NBA聯盟都冇跪低嘅機會,否則到時又係搞到自己。美國國內政治人物為咗下年大選佈局,一定會搵聯盟嚟祭旗,到時兩邊不討好,生意又做唔成,仲要隨時被自己國家罰款,加埋失去本土球迷支持。以現主席阿當施華呢啲生意佬,條數一定識計。

雖然企硬係抵讚,但我都只能夠講,NBA係抵死。甚至未來有其他國家嘅其他體育從業員因為大陸嘅政治問題而出事,都係抵死。因為從第一日你哋將自己嘅聯賽當成一盤生意推廣去呢個極權國家,然後希望打入去呢個市場,同呢個市場扯上更多關係,賺取豐厚嘅利益,就要預咗有咁樣嘅一日。

近幾年,不論美國四大運動,抑或歐洲嘅出名足球聯賽都不斷搞海外賽,中國都係其中一個熱門地點。每種運動,或者每支球隊,都有佢相信嘅價值,有佢持守嘅立場,捧利物浦嘅人又點會覺得英國警察係好人,捧巴塞隆拿嘅人又點會覺得西班牙政府係好。但離開咗本土,接受全球化洗禮後,有啲價值就唔會再提。就好似要進入中國呢個市場,就唔該你將咩自由、民主,人權價值放低先,要賺人民幣唔該你剩係嚟打波,笑下應酬下就好。

久而久之,呢種忍讓,又或者自我審查耐咗,到你盤生意要睇大陸人頭,無辦法唔倚賴大陸嗰陣,所有本身可以講嘅嘢都隨時無喇喇觸及紅線。一班高舉普世價值嘅一線球星都唔似喺美國咁惡,依家要即時扮死狗,莫講話夏登,連平時出名敢言嘅大帝勒邦占士都唔敢為呢壇嘢出多句聲。

而下一個,我希望佢快啲死,同埋應該會好快死嘅,就係國際足協FIFA。有報道指,FIFA想將嚟緊嘅升級版世界冠軍球會盃喺大陸搞。無他嘅,因為阿里巴巴已經成為咗FIFA嘅主要贊助商,出動國家機器,有錢到位就梗係你話咩就咩。不特止,有指FIFA仲傾向希望大陸主辦2030年嘅百周年世界盃,問你死未!

FIFA過去一年做咗好多同好政治正確嘅嘢,因為男女平權,爭取女子世界盃同男子世界盃一樣有32隊參賽、所以FIFA頒獎禮男女子嘅獎項數目一樣,無厚此薄彼、又嚴懲球場內嘅種族歧視、仲要求伊朗當局要批准畀女人入場睇波,幾咁政治正確。

呢種懶係高舉普世價值,實情為自己謀求政治利益嘅做法喺西方社會,或者香港嘅左膠團體都見唔少——只睇小問題,迴避大邪惡,講到尾都係偽善,欺善怕惡,只搞對自己有幫助嘅議題。如果唔係因為爭取男女平權有光環,呢啲人會咁積極咩?或者過多一,兩年,有球員就大陸嘅人權、自由、民主問題出聲被人搞,唔知FIFA又會唔會咁積極咁支持呢?搞中國,即係搞到收入,不了!

可憐之人必有可恨之處,你哋呢班只為搵錢搵着錢嘅人,終有一日會為自己嘅偽善付出代價,被反噬後失去你計好數可以賺嘅一切。

 

作者:阿享

一個戒緊牛肉,但打邊爐仍然會忍唔住既耶青。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 199943
Date: 2019-10-09 06:37:43
Generated at: 2019-10-20 17:18:42
Permalink: https://www.vjmedia.com.hk/articles/2019/10/09/199943/你哋會為自己嘅偽善付出代價,nba只係早啲出事