【好多腦細都唔明】公司員工嘅精神健康就等於生產力

 

喺創業圈入面,曾遇過唔少公司嘅高層/老闆。有時會有啲人走嚟問我,有無咩心理學嘅技巧可以用嚟提高員工嘅工作表現、生產力呀⋯⋯仲話咩如果有啲咩training可以比員工做,佢哋可以放工留低上堂,上完堂先再番去OT⋯⋯

「佢哋又有野學,公司又有得益,WINWIN啦!」佢咁講,聽到我呆咗呆。

我心諗:「平時你公司已經日日OT到好夜,你依家仲要拎幾個鐘出嚟學野?學完野仲要番公司繼續OT?」

咁我都有幫企業做企業培訓,改善員工嘅精神健康,都有少少驚咁講會有啲hard sell,但好多時候,我真係好想直接同佢哋講:

「喂,其實公司員工嘅精神健康就等於生產力。你咁搞,又想員工幫你賣命,想佢哋工作表現好啲,難咗啲喎。」

我尷尬咁笑咗笑,講:「可能搞啲放鬆或者改善精神健康嘅工作坊?唔駛佢哋學啲咩,純粹比個機會佢哋放鬆吓,減低壓力⋯⋯」

佢諗咗諗,又講:「唉,有壓力先有進步嘛。與其用時間改善員工嘅精神健康,不如教佢哋實用啲嘅技巧啦,上吓點用心理學增加sales嘅training唔好咩?」

好多心理學嘅研究都探討過員工快樂指數/精神健康同工作表現嘅關係。大部份嘅研究都證明咗當員工愈開心或者精神愈健康,工作表現就會愈好。呢啲研究入面量度員工工作表現嘅方法包括,搵員工嘅上司評分啦、客戶評分,或者用佢哋完成工作嘅數據(一個月內完成幾多件工作、平均每件工作需要用幾多時間去完成)去得出佢哋嘅生產力。導致呢個現象,有兩個可能嘅原因。

第一個原因呢,可以參考番由美國心理學家約翰·斯塔希·亞當斯(John Stacey Adams)提出嘅公平理論,指人嘅內心入會會對追求「公平」。我哋付出時間、勞力喺工作上,會希望獲得人工作為報酬。基於「公平」呢個原則,我哋會希望喺主觀上,我哋付出咗幾多同我哋獲得幾多嘅係相約嘅。

舉個常見嘅例子:「我做野做得咁辛苦,搵得嗰雞碎咁多,咁不如我番工頹啲,唔好咁努力啦。」

但你可能無諗過,原來當我哋覺得我哋嘅人工太高,但份工好似無咩野做咁,我哋都會原自覺地喺唔同方面,對呢份工作付出更多嘅努力~

如果員工番工番得開心,個心舒服嘅,咁自然佢哋會有種感覺,覺得自己有義務去更加努力番工啦,或者想幫公司做到更多嘅事,幫公司賺到更多嘅錢。

另一個原因就係,當你精神健康太差嘅時候,一定會影響到工作表現。有個term叫「情緒耗竭」(emotional exhaustion),就係當你壓力太大嘅時候,令到你有情緒耗盡嘅感覺,而導致動力減低呀、瞓唔到呀、集中唔到等等嘅問題⋯⋯

香港人個個都咁大壓力,一個由中文大學喺今年6月至7月做嘅調查顯示,香港人嘅精神健康評分只係得46.41分,屬於唔合格水平。其實大家嘅精神健康都已經喺接近崩潰嘅水平啦,「情緒耗竭」好容易發生,集中唔到、瞓唔到、無哂動力,仲點會有好嘅工作表現呢?

以前有個case 叫Emily(化名),佢喺公司簡直係神咁嘅存在。名牌大學畢業,入咗職幾年就升職升到坐火箭咁,喺佢間公司入面,個個都覺得佢係女強人,下屬有事就旨意Emily幫佢解決,上司又對Emily有好大期望,搞到佢壓力好大,就嚟崩潰。但佢喺公司又唔可以示弱,要扮到好似無野咁。佢可以呃到自己,但佢做嘅野完成反映到佢精神健康狀態。佢明明好努力,但唔知點解係咁做錯野。最諷刺嘅係,當時Emily 嚟搵我做治療,唔係因為佢覺得自己情緒有問題,而係覺得自己工作表現差咗。

要改善員工精神健康,最簡單嘅方法就係教吓員工做冥想、放鬆技巧、精神健康嘅重要性,或者係直頭喺一日嘅上班時間入面組織一啲比員工放鬆、休息嘅體驗活動,除咗冥想體驗之外,茶藝、瑜伽、書法等等嘅活動都可以幫助減壓。不過講到尾,如果個個老細都知精神健康嘅重要性,唔好比太大壓力啲員工,比多啲實際/心理嘅支持佢哋,你啲員工唔單止會開心咗,我肯定你公司生意都會好咗呀~

 

References:

Toon W. Taris & Paul J.G. Schreurs (2009) Well-being and organizational performance: An organizational-level test of the happy-productive worker hypothesis, Work & Stress, 23:2, 120-136, DOI: 10.1080/02678370903072555

Wright, T. A., & Cropanzano, R. (2000). Psychological well-being and job satisfaction as predictors of job performance. Journal of Occupational Health Psychology, 5(1), 84-94. doi:http://dx.doi.org.eproxy.lib.hku.hk/10.1037/1076-8998.5.1.84

港人精神健康指數不合格 社會爭議負面影響大幅上升

 

*根據臨床催眠治療師之保密原則,文章中沒有披露任何個案的個人資料,個案亦經一定程度修改。

*插圖與人物完全無關

 

作者:Professor Chan

Professor Chan
90後土生土長香港人。精神健康導師,臨床催眠治療師,NLP高級執行師,中文冥想應用程式創辦人。遠赴台灣參加發呆比賽,勝出後獲得「發呆王」稱號,希望更多人可以關注精神健康~

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 199977
Date: 2019-10-10 05:42:27
Generated at: 2020-03-28 17:57:57
Permalink: https://www.vjmedia.com.hk/articles/2019/10/10/199977/【好多腦細都唔明】公司員工嘅精神健康就等於生