【突發、已FC】荊軻係秦國特務,特登要殺秦王搞到我地有位俾秦國入!

 

大家好,我叫鞠武,係燕國大家都叫我做智者,亦都係燕國老細太子丹既軍師,今日我想講下荊軻呢個痴線佬,佢搞到我地輸哂呀!

唉故事講起真係一匹布咁長,老闆個老豆為左唔想俾秦國搞,連個仔都自動送秦,原本以為好地地,點知有一日老細嬲爆爆咁返黎屋企,仲成日夜晚大叫光復燕國,死啦,燕國好快冇日安寧啦。喂,呀哥,我都知秦國好好打,所以我都同老細獻計,要打國際戰線,我地人丁單薄,地少物乏,應該出使六國,六國咁強大我地用圍堵政策,等咁多個國出兵我地就嬴架啦。佢又唔聽喎,我已經勸埋老細唔好俾仇恨支配自己,係危難中要保持警覺同思考。

點知老細都唔聽我講,個陣有個秦將叫樊於期黎投靠燕國,聽秦人話佢派左綠帽俾佢,得罪秦王,秦王下令捉到佢懸賞金千斤、邑萬家,將佢送秦嬴左千斤金萬戶人,仲唔洗得罪秦國,點止嬴3:0呀,我都即刻叫老細交左還佢唔洗煩,點知老細仲話咩齊上齊落,唔分化,唔割蓆喎,有哂借口俾秦國入啦,死得啦。

之後我都唔理啦,介紹左我老友田光俾老細幫下手勸下佢啦,就係佢搵左個痴線佬荊軻。荊軻呢個廢青黎架,又唔讀書,又唔做野,淨係識飲酒唱歌同格劍,又唔合群,痴線佬黎架。之後呢個荊軻又同老細痴得好埋,而老細對秦國既仇恨一日憎過一日,都唔知呢個痴線佬係到帶咩風向,話唔定係秦國既特務黎架。

點知有一日,荊軻突然殺左樊於期,之後仲話攞佢個人頭去同秦王交差,我仲收到風,佢仲拎埋燕國既地圖俾秦王,死啦,肯定係秦國派黎既臥底,實俾埋借口俾秦國入啦,場仗實輸啦。

呀原來佢去殺秦王?邊有可能呀,殺秦王點解唔蒙面呀?咩圖窮匕現呀,咁細張圖咁大把刀點收得埋呀?又話見血封喉,邊有殺到呀?擺明係秦國想係六國起兵前搵秦國特務殺左秦王等秦國有借口攻打我地啦,如果唔係點會係依家先會殺秦王架?我一早都話有秦國特務架啦,我fact check左架啦,又唔信我。唉依家輸哂啦,失哂民意啦,一日最衰都係荊軻呢個痴線佬啦…

以上故事純屬虛構,如有雷同實屬不幸。

風蕭蕭兮易水寒 壯士一去兮不復還
世界上總有太多鞠武,太少荊軻。睇到文既你屌我寫抽水文總好過你冇機會睇到我篇文。致痴線佬。

 

 

作者:武士亭

漢江泄對家

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 200086
Date: 2019-10-14 17:48:31
Generated at: 2020-06-05 17:49:30
Permalink: https://www.vjmedia.com.hk/articles/2019/10/14/200086/【突發、已fc】荊軻係秦國特務,特登要殺秦王搞到