美心係乜野？係投共囉。

拜讀完徐緣既美心是什麼可謂腦洞大開。

徐緣成篇文章雖然係文末強調唔割蓆乜乜乜，但成篇文卻不斷為美心開脫，又唔認同裝修，林鄭都唔認同裝修呀。所謂明刀易擋，呢類將和勇分割既暗箭先難防。

手足唔會有無緣無故既憤恨，美心既罪狀罄竹難書。

首先嗰位伍淑清佢點解能夠代表香港婦女係聯合國大放厥詞？單憑一個名不經傳既協會？若果佢唔係美心太子女，一個將行入木既老女人配得上咁多既政治利益？佢呢個先係正宗靠父幹既先行者阿。而佢有咁既地位去講野都係源自美心集團啵，唔係咩？

另外，「光復香港，時代革命」點解唔印得落個牌度？呢個決定係前線好黃既員工既決定？如果長官意志有如徐生描述有美心前線員工咁黃既話，美心會有今日既局面？如果話三罷點好點好畫面點靚，有成功過咩？你不如話前線員工犧牲佢地射波既日子，仲揹緊被秋後算帳既擔憂—呢個就係罷工不成既效果。罷工當日美心有店舖運作唔到咩？？？

仲有個份割蓆聲明，亦僅僅話伍女士冇控制集團云云，但所謂割蓆理應係「伍女士既言行唔代表美心集團」呢句有冇出過？拖泥帶水既所謂聲明隔左咁耐隨著行動升級證明收唔收貨呢？

裝修係迫不得已。太子女除左聯合國發言，仲打壓學生罷課，而佢更聲稱早有準備云云，咁抗爭者係點樣接收太子女表達既訊息？美心就係紅到發紫。罷工罷買都冇效果既時候，就真係迫不得已，就算係星巴克、元氣呢類都係迫不得已，因為美心太子女既打壓係變本加厲。你話太子女唔關事，怪就怪割蓆割得唔徹底。持有好少股份但係又俾人代表成個集團，咩玩法我唔識。一粒老鼠屎既品牌效應可以係累全家。

與其要為美心開脫，不如講解下一粒老鼠屎搞壞成煲粥可能會仲多人欣賞。

作者：武士亭

漢江泄對家

閱讀後覺得好，請多多讚好及分享～：）