【藍毛毛】林鄭同警察唔係怕伊斯蘭,而係. . .

 

 

剛過去嘅星期日,香港警察駕駛水砲車,用藍色催淚水噴射尖沙咀清真寺,不巧噴中香港印度裔人士領袖毛漢,慘變媽咪麵代言人「藍毛毛」,引起軒然大波,要搞到警隊高層立即入清真寺「沙霖」,第二日林鄭都要入埋去,今日有報導話警隊鄧炳強都要打電話俾毛生講多N 次sorry 咁話。

毛漢唔係穆斯林,佢只係咁啱企嗰度同朋友傾計,點知就被警察顏射。

兩日來眾說紛紜,有人講到話警察怕穆斯林會ISIS 式報復,呢類講法除左搞笑,就係侮辱左喺香港生活,絕大部份愛好和平嘅穆斯林,本來就唔應該多談論。

我比較有興趣討論嘅係,點解同樣係射中本港少數族裔,林鄭同埋警察今次會咁大反應。

 

我講緊嘅係,上個月印尼女記者Veby Indah 被射盲,林鄭同埋警察都係「不給予一個屌」(Don’t give a fuck.)。印尼有接近九成人口係穆斯林,我當然唔會知道該位女士嘅宗教,但如果林鄭同警察真係咁驚伊斯蘭教徒,咁驚ISIS 式報復,咁呢個月來佢地應該食唔安坐唔落,至少都探下人講幾句唔好意思,而唔係一副睬你都有味嘅德性。

今次香港政府嘅道歉,簡直可以用高規格來形容,因為呢幾個月來佢地實在太賤格,所以呢個進步係長足嘅。

咁高規格嘅道歉,我估計原因,不外乎「真。國家利益」。

嗰位毛漢先生,係富商,印度人喺香港出名係有錢,香港假假地都仲係國際大都會,佢仲要係喺香港嘅印度人嘅領袖人物,我諗佢喺印度都唔會話無人識佢。

而家國家,講緊中華人民共和國啦,嘅國策係乜嘢?係一帶一路丫嘛。

所謂嘅一帶一路,就算用最仆街嘅角度去睇,你話呃呃氹氹都好,都要堆發展中國家睬你先得架。

我對商界真係唔熟,對國際商界更加唔熟,但一個合理推斷,我諗今次顏射清真寺大門,兼中埋毛漢先生,真係射中左喺香港同一帶一路國家有所連繫嘅商人,基於利益就算佢當日會同你站台撐警,今日你當眾落佢面,幾十歲人又唔係要同你搏乜嘢,佢返家鄉同啲父老講:「同香港人做生意牙?你自己小心啲啦下~祝你好運~」都夠啦,都唔洗特登唱衰你。

 

上有好者,下有甚焉,林鄭同警察高層連月來樣衰衰又賤格,我諗今次終於唔覺意踩到啲「真。地雷」。

睇戲嘅角度來講,係好笑嘅,不過我都仲係會心痛嗰記者姐姐多啲。

晚安。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 200268
Date: 2019-10-22 23:06:59
Generated at: 2020-02-25 17:59:22
Permalink: https://www.vjmedia.com.hk/articles/2019/10/22/200268/【藍毛毛】林鄭同警察唔係怕伊斯蘭,而係