「唔係下話?你窮到冇錢飛啊?」

政治 / 最新文章綜覽

 

 

今日政府口中嘅抒困措施居然係機票減百二蚊比你抵銷返個機場稅,有人屌飯都冇得開飛條毛,有人話飛得嘅唔志在嗰百二蚊,總知個個都話政府離地,不知所謂。

政府不知所謂就緊架喇,如果佢夠貼地,真係咁了解民意,我諗都唔會搞到今日依知景況。

而家嘅政府做事從來都唔係由市民角度出發,佢地做嘅一切只有兩個原因:一係對自己有利,一係對商家有利,然後商家比返啲利益政府。就好似九成按放寬到八百萬嘅樓,地產商散到貨,有錢佬走到貨(好多建制議員係大業主嚟),就算施政報告當日好多人已經知係伏,寫哂風險幾大咁又點?樓市一樣翻生,業主即刻加價,經紀都即刻有返收入。最後香港冇事當然最好,泡沫爆破?2047收地?Oops,你唔好彩,我走先啦拜拜。

零售業政府係幫唔到,更加唔敢幫。封路嘅係政府(警察名義上仲係聽政府話係咪?),製造宵禁嘅係政府(MTR最大股東係政府嘛),一個商場開開下可以收皮,行行下突然有幾十個Green Object衝入嚟噴椒,香港人唔肯行街買嘢,旅客又唔係講兩句就肯飛過嚟洗錢,唔通真係拎住張單比稅局可以拎返錢咩。

幫完地產就緊係要幫旅遊業啦係咪?話哂旅遊業對香港咁緊要。樓唔係個個買到,但機應該係人人都飛得起——依個係香港政府嘅諗法,唔係佢唔會有面目推出嚟。台灣機票千頭變三位數、日本機票千中變千頭、五天豪華團由一萬變一萬有找。對政府嚟講,依個已經係佢地覺得最「親民」,夠「貼地」,個個香港市民都可以「受惠」嘅方案。咩話?你連飛都冇錢?咁你就係同班暴徒一樣係「Have no stake in the society」。

冇股份自然唔需要分紅比你,係咪?

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 200272
Date: 2019-10-23 00:43:35
Generated at: 2020-02-17 02:37:22
Permalink: https://www.vjmedia.com.hk/articles/2019/10/23/200272/「唔係下話?你窮到冇錢飛啊?」