我無諗過,生果 + 酒係可以變出咁多花款. . .

 

雖然法例規定酒後駕駛係犯法,不過駕駛期間講酒經就唔犯法嘅。

呢晚係葵涌車阿偉入大埔林村搵朋友,離遠見佢揸住罐數字牌啤酒行埋黎,我同佢講「會唔會飲埋先上車呀?」佢好識做,一嘢啪埋啖酒掉埋落垃圾桶先上車。

上咗車,我問阿偉,「你好鐘意呢隻酒呀?我都鐘意喎,特別全藍色個隻罐,幾甜喎」,佢話「係呀,不過你鐘意甜嘅啤酒呢,可以試吓手工啤」。不過我自己就鐘意大啖大啖飲,所以都係比較鐘意飲生啤或者罐裝,不過有機會都會試吓。

講講吓,阿偉問我有冇興趣試吓自己浸梅酒,咁我以為好花時間好難搞啦。其實又唔係喎,面家網上面原來好多片教人浸酒嘅,我呢度又分享吓:買個酲返黎(孖蒸個啲都得)先用酒洗吓啲梅(用水洗會發霉),跟住加啲冰糖(要黎平衡返酒味同梅嘅酸味)落去浸酒,然後放係陰涼地方,擺個兩三年就飲得喇。至於用咩酒浸?孖蒸、三蒸都得,日本清酒燒酒都得,如果用日本酒,浸大半年就得喇,中國酒就反而浸耐啲,兩年左右啦。

除左梅之外,檸檬呀、士多啤梨呀都可以要黎浸果酒㗎。講起果酒,阿偉仲講咗另一種好特別嘅「果酒」,我叫佢做「醉西瓜」。「醉西瓜」係用伏特加整嘅,將個西瓜開個窿,倒插枝伏特加落個西瓜度,再雪返兩三日,咁個西瓜就索哂啲酒,切黎食真係聽到都覺得正,不過就唔好獨食,保證食完暈低。

講起伏特加呢種屬於戰鬥民族嘅飲品,阿偉又分享咗一啲小知識。話說阿偉涉獵舞台劇,尤其一啲俄羅斯劇目,順道研究俄羅斯人點解飲伏特加飲得咁爽。由於酒嘅冰點低過水嘅冰點,雪凍嘅伏特加倒出黎感覺有啲似糖線咁黏。飲嘅時候呢,係倒少少出黎,然後好快飲落肚,咁就會飲到啲清甜味,仲有凍凍地嘅感覺,落到胃暖返就會有一種火燒嘅感覺,你會覺得個人即刻慶烚烚。但記住千祈唔好含住啖酒,唔係暖咗啲酒味走返出黎,吐都吐唔切。

講講吓又到目的地,即刻熄機返去開罐冰凍啤酒先啦!

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 200280
Date: 2019-10-23 06:24:18
Generated at: 2021-12-09 06:38:11
Permalink: https://www.vjmedia.com.hk/articles/2019/10/23/200280/我無諗過,生果-酒係可以變出咁多花款