如果我係日本皇室宮內廳,一定憎死香港人。

 

 

琴日最多人講嘅「新聞」,係有人傳日本外務省話,無邀請林鄭出席日皇登基即位禮,林鄭係不請自來云云。

如果我係負責搞呢個典禮嘅人,一定憎死香港人,竟然信埋曬呢啲「新聞」,直頭係假新聞。

 

喺香港人眼中,睇日皇等登基嘅各國政要貴賓,來到機場係就咁自己截的士,唔該我想去日皇嗰度丫,咁,負責籌辦即位禮嘅宮內廳,係唔會安排人手接機架,你地自己搞掂啦。

喺香港人眼中,日本皇宮,係就咁行入去就得,無規無矩嘅,無人守門口,入到去無人帶位,任坐,hea 過去修頓球場睇阿伯踢波。

喺香港人眼中,一個半年前就公佈曬日期,講明邀請全球195個國家嘅政要,出席嘅典禮,個邀請名單係可以甩轆嘅。

一個幾乎弱智都知嘅常識,一個咁隆重嘅典禮,點可能俾一個無收到邀請嘅人,入去觀禮,仲要坐定定,俾你影到佢玩電話。

 

其實我諗件事非常咁簡單,外務省管外交,記者問外務省有無邀請香港同澳門特首,點答你有呢?你想日本搞三個中國定四個中國?人地台灣都只可以俾你派駐日代表謝長廷,名義係「前行政院長」,無計呀,中國而家仲係好大個咁擺喺對面海架。

負責日本皇室各大小禮儀係邊班人呀?係宮內廳,唔係外務省,記者首先已經問錯問題,然後香港人見到「無邀請林鄭」,竟然如獲至寶,爭相廣傳。

講真,咁樣唔係侮辱林鄭,人地一早講明請假幾日去日本觀禮,而家香港人,咁樣係侮辱緊日本皇室,侮辱宮內廳,唔識大體,有失斯文。

我唔知香港人點睇日本人搞禮節嘢,係咪香港人了解日本就只係睇AV 去shopping 睇fake news?咁唔好笑大陸人剩係去日本買廁所板喇。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 200429
Date: 2019-10-25 07:59:33
Generated at: 2020-02-25 17:09:08
Permalink: https://www.vjmedia.com.hk/articles/2019/10/25/200429/如果我係日本皇室宮內廳,一定憎死香港人。