【區選懶人包】如何避免你間舖「被支持」某某候選人?淨係貼我鍾意嗰位又得唔得?

政治 / 最新文章綜覽

區議會選舉就快到,我地周不時都見到有商舖會張貼唔同候選人既選舉海報,可以俾街坊了解多啲候選人,又或者藉此表達自己既政治立場,都冇問題既,因為間舖係你既,你攞哂黎當牆紙咁貼都冇問題既。不過,有啲情況下,有啲商舖係被張貼選舉海報,變成「被支持」,而做成影響,就好似以下呢一單既情況咁:

致王志鍾區議員:本店並沒有同意閣下選舉海報張貼於本店任何地方,本店無法證實閣下及閣下團隊是否有心還是無心之失張貼於此,本店不懂選舉條例,不如道閣下行動會否違規,唯希望閣下好好處理閣下選舉宣傳活動!特此通知!P.S. 貼還貼,做乜遮住我個招牌喎!仲要冇經我地同意!

SKW Pizza Pie 筲箕灣脆意雞發佈於 2019年10月23日星期三

(下耀東選區C29候選人包括王志鍾、何偉倫)

 

呢篇文就按照上面既情況同大家講解,店家同公眾應該如何處理同探討下相關問題。

 

店家有冇權唔俾候選人貼選舉海報?

有。根據選舉管理委員會選舉活動指引(下稱指引)第七章7.26節「候選人若希望在私人展示位置展示選舉廣告,必須先得到佔用人書面准許或授權。(原文改寫,詳細請參閱原文)」簡單黎講,就係私人地方,候選人想貼海報就一定要問左得唔得先。

 

咁我係店主我話ok就ok得啦係咪?

口講無憑唔得呀。話明要書面准許或者授權,一般黎講係採用《在私人物業展示選舉廣告或進行競選活動的批准書》,入面有兩頁紙係要由業主/佔用人等等去填寫既,所需資料包括:店鋪名、地址、業主或佔用人名稱、負責人名稱、聯絡電話、簽署同埋機構蓋章。咁填哂啲資料再由候選人交返俾選舉主任咁先叫ok既。

範本類似係咁:

 

咁複雜唔填得唔得?

唔得。根據指引7.31如果你冇交批准書俾候選人,又或者冇經過業主或佔用人既同意下就貼左廣告既話,係犯法並且要罰款既。

 

咁我會唔會變左「被支持」架?

正常情況下應該唔會既。雖然店鋪既聯絡資料係公開,係有被抄錄既風險,但都需要負責人簽署作實,而且批准書說明個度講明批准書應該係一式三份,其中有一份係佔用人留底用既,證明係有支持呢一回事既,如果唔清楚情況既話,亦都可以用公眾身份去候選人平台或者向選舉主任查閱有關既批准書。

 

如果我「被支持」左咁點算?

兩個方法:私了。好似上面個狀況咁,出左post,tag左當事人要佢解釋下咩事,等候選人同你拆,林鄭就講明唔支持私了既,自己考慮;另一個方法,投訴。問選舉主任確認下啲資料,記得書面投訴。

 

我淨係想擺我鍾意既候選人海報,會唔會俾人投訴唔公平呀乜乜乜架?

指引係選管會呼籲給予同一選區既所有候選人公平及平等既對待。呼籲咋。

 

我見到有啲選舉海報周圍亂咁貼,咁點算好?

一般講私人屋苑會係有指定範圍畫埋框框貼海報既,發現有問題就問下管理處,公共地方1823啦,問多啲問清楚,超合作運動~

 

嗱選舉要公平公正平等對待係啱既,之但係呢私人地方就要尊重返私人既選擇啦,係私人物業做店家既係絕對有權利去處理張唔張貼選舉海報既事宜既,作為公眾都絕對有權利同選管會了解更多關於選舉廣告既問題既。希望呢篇可以俾大家簡單了解,有咩問題記得搵返當區既選舉主任問多啲,公民責任黎架。

 

參見:

選舉活動指引第七章選舉廣告

在私人物業展示選舉廣告或進行競選活動的批准書

 

 

作者:武士亭

漢江泄對家

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 200522
Date: 2019-10-27 08:37:32
Generated at: 2020-06-05 16:53:03
Permalink: https://www.vjmedia.com.hk/articles/2019/10/27/200522/【區選懶人包】如何避免你間舖「被支持」某某候