派錢俾你呀,要定唔要?

 

香港動盪局面都持續咗一段日子,先唔講政府之前遲咗三個月嘅正式徹回修例,又或者係個幾禮拜前嘅緊急法,但唔知大家仲記唔記得波叔提過話派糖,話為咗舒解民困,同埋減低大家嘅戾氣,決定人人派一萬蚊?(澳門年年都派錢添,你睇變成點?)丫,咁公司啲腦細同埋膠層當日聽到哩個消息嘅時候,都嬲嬲豬係咁鬧政府哩啲小恩小惠,根本無助解決香港嘅問題,當時小編聽完之後都冷笑咗一下……

結果,去到上個禮拜,小編冷笑咗十下添,點解?

因為話說公司前線部門入面有一個惡霸經理,已經做咗兩年幾三年架啦,一直以黎都係蝦蝦霸霸,埋佢堆嘅人申請放假就連續放幾耐都得,唔埋佢堆嘅平時就俾啲豬頭骨嘅工作,而想申請放假就哩樣嗰樣咁,簡單啲黎講,即係玩小圈子,成個部門俾佢搞到佢想點就點,仲要佢部門做條數出黎唔靚。有好多同事唔妥佢架啦(包括寫字樓啲經理),投訴嘅投訴,辭職嘅辭職,但係偏偏最大粒嗰個腦細又好 Buy 佢,無論啲以前同事點投訴,都吹佢唔漲。

跟住去到上個禮拜,啲同事終於要爆啦,聯署寫咗封投訴信去 Port 哩個經理,寫哂佢十大罪狀,同埋提出一大訴求,要求炒咗哩個惡霸經理。頭先都講過啦,腦細都係佢嗰邊嘅人黎架嘛,球證同足委都係佢嘅人,當然無回應訴求啦,結果腦細同啲膠層開會嘅時候,討論緊有咩解決方法,結果俾小編喺門口偷聽到,原來係話想派錢安撫同事,考慮緊年尾出多啲 Bonus……

Er……車!咁你地班人一開始又笑人派糖哩啲小恩小惠!你哩間咁細嘅公司仔都係咁運作,憑咩笑人政府喎,仲要好意外咁。小編聽完返到房真係笑到啤出黎。

其實小編都明嘅,有好多老一輩嘅人,都係唔識(或者係唔會)去解決問題,永遠都係解決問題周邊一啲無關痛癢嘅事。佢哋忘記咗自己以前都做過細位,忘記咗以前點樣俾當時嘅膠層欺壓,到依家自己做到嗰個位置嘅時候,又會做返相同嘅野,結果都係唔識吸收歷史帶黎嘅教訓。最後只會啲做到野嘅人不斷投訴,去到某一個點發覺投訴無用,咪跳槽過檔囉,東家唔打打西家姐,你估仲好似以前嗰啲 Lifetime Employment 咁,你跳出去人哋都唔敢請你咩?

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 200558
Date: 2019-10-27 08:24:39
Generated at: 2020-02-17 04:06:47
Permalink: https://www.vjmedia.com.hk/articles/2019/10/27/200558/派錢俾你呀,要定唔要?