黃色經濟蓬勃，藍店應如何自處？——以水門泰式海南雞飯為例

香港係講自由經濟，邊個幫唔幫襯邊個，邊個做唔做邊個生意，都係「由市場決定」，總之成交就得，成交價就係市場價，無話值唔值，只有制唔制。

黃色經濟，唔係鹹嘢唔係色情唔係紅燈區，係喺大眾熱衷社會運動之下，對同樣參與度比較高嘅「同路人」，所經營嘅店鋪會多多支持。

呢幾個月，已經聽到厭嘅係，幾多幾多鋪頭「因為暴動而結業」。

呢啲講法，完全係諉過與人。

有鋪頭做到請人，仲要講明請有案底嘅暴徒，雖然間嘢喺邊我唔知亦未食過

新華社就話灣仔好多舖頭執粒

香港任何人都有自由選擇幫襯咩鋪頭，張宇人都講，歡迎商鋪為左生存而改變立場。

有間海南雞，就由七月開始已經醒目，行黃店路線，至於東主本人點諗，或者喺第二度講乜，一啲都唔重要，最緊要係，識得順住時勢做嘢，咪搵到錢。

好黃的水門泰式海南雞飯

老細喺微信群組吹水，不反對中央，相信警察執法

唔同鋪頭都有生存嘅方式，有啲鋪頭選擇用「黃腔」來招攬生意，係市場行為，只要成功就得，啲嘢都係擺曬喺陽光下進行，無話邊個呃邊個。

有啲鋪頭，例如我自己幫襯開銅鑼灣某間中高價中菜，部長試過喺鋪頭唔覺意大聲左少少，講下乜嘢止暴制亂，其他員工都唔係好理佢，我聽到，我個fd 聽到，對望兩眼，「妖，當聽唔到算喇」，鬼叫呢度啲嘢真係好好食。無理由俾一個部長搞到廚師無啖好食，更無理由搞到我自己無啖好食。

不過過左呢幾個月，我最理解唔到嘅係，無論係人民日報、新華社乃至林鄭，都將「經濟唔好」「鋪頭執笠」同四個月暴動掛鉤，好啦都唔好講乜嘢意識形態，中國特色社會主義係唔係社會主義呢啲唔好討論，究竟而家每日啲鋪頭交緊幾多錢租？佔經營成本幾多？

租金佔經營成本可以係三至五成，賣賣埋埋唔夠你交租，啲地主寧願你唔租都要托住個地價，佢地驚地價貶值，抵押品唔值錢，銀行call loan 呀？

香港就係咁，唔講藍黃先啦，老老實實做生意打好份工，逐蚊搵嗰啲，永遠都係最容易受害，就當真係因為成日暴動，搞到警察亂射催淚彈，同埋地鐵好似港女咁鍾意開唔開都得，然後令到消費市道差，當你啱喇，咁點解地主仲唔減租？

藍色經濟如果都講團結，藍就減租，黃一定唔夠你玩。

作者：白木乩

聽聞係總編分身，專用來出D 與總編身份不符既膠文

閱讀後覺得好，請多多讚好及分享～：）