對唔住……我喺社會最動蕩時期辭咗職

 

對唔住,我真係抖唔到氣……我好辛苦,身邊就好似冇一個人可以幫到我,我唔知自己可以捱到幾耐,冇錯……我終於鼓起勇氣喺25歲之前辭咗份工,但係你知唔知原來你返左一份工咁耐,辭咗工你先發現,原來你係一啲存在價值得冇,老闆冇留住你,同事亦都冇搵你,其實我哋所有人亦都只係一件利用工具,呢樣都唔緊要,大家都係互相利用,緊要既係,你出到黎搵工先發現……原來你轉工時機唔啱。

同一份工,一年前可能仲有好多位俾你in,依家莫講話係清潔工人,你都要同佢爭工返,撞正社會動蕩時期,經濟低迷,又啱啱想試吓轉工,點知一試就即刻跌入谷底,除咗競爭大咗,老闆亦都會揀人返工,萬一你表現有咩差錯,隨時可以搵個人嚟取代你,又冇專業技能既我,於是只可以同人爭工返。每日12小時都上招聘網站,一有新工就in左先算。可惜我經驗又唔夠,真係冇得同人爭。

冇工返,個人壓力大到去可以坐足屋企成日,望住部手機剩係諗搵工。出到街,連食嘢都唔敢食,等到最平嘅下午茶嚟先敢食野到夜晚,出到去超市望住貨架上嘅杯麵,我就連企都企唔穩,我真係唔知自己發生咩事,我只係知道原來我冇工返,真係會生存唔到。我覺得自己好冇用,我仲要睇住屋企人……我出街坐坐下都會自己喊,嗰種感覺,我覺得自己真係有情緒病,從前好唔鐘意返工,覺得錢唔重要嘅我,依家竟然因為搵唔到工而落晒形。

我真係覺得好無力,再望返手機上面好多年輕人被自殺嘅新聞,我真係精神分裂,點解?我哋個社會點解會變成咁!點解壞人可以消遙法外,所有嘢都好似係根本唔會發生嘅嘢,已經再冇理智可言,我嘅情緒已經再平伏唔到,所有嘢都返唔到轉頭,如果我當初冇諗過轉工,婉轉啲同老闆傾下,個結局會唔會好啲,或者就算我搵唔到工轉,都未至於依家日日要捱麵包,冇寄托,或者……如果有或者,所有嘢會唔會唔同晒,香港會唔會變返好……

我好肯定同你講,係冇可能,
不過起碼我有努力過去轉工,就算我真係轉唔到,
市民有努力過去爭取想要嘅嘢,就算結果不如願,
面對生活,搵工,我真係好辛苦到抖唔到氣,
但係每次喊完,我都會抹乾眼淚同自己講,
「明天會更好!」

我相信你哋都可以做到,香港人,加油!

 

 

作者:P's虐心者

P's虐心者
喜愛寫作,畫畫與攝影,身上總流着一股熱血,愛胡思亂想地虛待光陰。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 200839
Date: 2019-11-02 07:29:20
Generated at: 2020-12-06 01:10:22
Permalink: https://www.vjmedia.com.hk/articles/2019/11/02/200839/對唔住-我喺社會最動蕩時期辭咗職