無心機返工呀真係……

 

 

小編想問下大家,到底係咪個個都試過有哩種感覺?如果係嘅話,幾耐會發生一次?小編個人就差唔多每個禮拜都有哩種感覺。不過同好多人都一樣,就算係無返工嘅心情,都要將哩種感覺吞返落肚。

話說有一日晏就,有個同事突然企喺小編張枱面前,叫小編幫下佢。嗰下小編突然有種不祥嘅預感,即刻想閃去廁所避一避,但係來得太急,避都無得避,就即管睇下有咩幫到佢。

「我岩岩同腦細有幾句意見不合,搞到好無 Mood,無哂心情返工,可唔可以早退?你可唔可以幫下我?」

同事到底係咪諗多咗?小編到底有咩能力幫到你?唯有用返官腔答法:「如果想早退,你要同上司講先得……」小編真係無權批你早退與否。

點知同事用一個「你是白癡嗎」嘅表情啤住小編,一邊話:「都話我哋岩岩嘈咗兩句,佢又點會批我早退!」

唉 ~ 咁你搵小編腦細嘛,你唔搵個話得事嘅人,搵小編有鬼用!就算小編同情你,都無辦法可以幫到你。

哩位同事又繼續講:「咁你教下我點做啦,我可以做啲咩?」

其實哩位同事都成五十幾歲,好命嘅話(或者唔好命)都做得小編老豆。講人生經驗你多過小編多多聲,應該係小編跟你學野就真啦。

為免 Deadair,哩個時候廢話都要講:「個個都有心情差嘅時候,但係都唔可以即時走咗去,如果唔係就無人返工架啦。不如休息一陣,同屋企人或者朋友傾下。」(講完小編都無乜胃口,不過小編返工期間都有 Whatsapp 朋友,講下腦細啲是非,如果唔係點樣每一日平衡心理?)

個同事表情拿埋一舊,睇落仲沮喪……

有啲野 HR 真係唔係咁方便去教你,但係做咗咁多年人,其實都明架啦。請唔到大假,咪請病假囉。如果真係點都想走嘅話,不如試下同上司講,話唔舒服要睇醫生,記住第二日交返張病假紙,做返成個程序出黎就得,尤其是當公司有半日病假你攞就更加。

哩方面,即係好似有啲公司已經推行咗嘅女性假期,每一個月會俾女士攞多一日假期,去舒緩佢哋每個月總有一次嘅痛楚同心情不穩。小編建議下啲開放少少嘅公司,可以諗一諗「無心情假期」,關注一下返工返得唔開心,搞到完全無哂心情嘅同事。如果公司可以俾多少少 Care 同事,尤其是注意一下同事嘅心理健康質素,長遠落去真係可以令公司茁壯成長,而且最重要嘅係,人一生唔係剩係得工作,仲要有一個健康嘅生活,如果唔係好似黃定光咁,次次開會都唔開心,要用瞓覺去調劑下,真係命都短幾年。

話時話,今次個同事都係一名小主管,有兩個下屬。如果佢啲下屬同佢講話無心情返工要早退,唔知佢又會點處理呢?小編真係好有興趣想知……

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 200961
Date: 2019-11-06 07:22:08
Generated at: 2020-02-25 16:19:01
Permalink: https://www.vjmedia.com.hk/articles/2019/11/06/200961/無心機返工呀真係