港大劇社的青澀演出

 

 

早兩日朝早飲茶之後經過沙田大會堂,看見節目表第一項,星期六係科大管弦樂團嘅演出,心諗,百步梯隨時又有集會又有放題取消都似。俾你地開得場又會唔會為過世嘅同學默哀,定係若無其事咁GOOD SHOW……其實科大管弦樂團關我咩事?……下面一項就係港大劇社嘅戲劇比賽,11點開場,剛巧就是11點,大堂經理話要買飛,不過要自己上去二樓門口嘅攤位買,亦唔知幾錢。上去睇下,同學仔話九十大洋一張飛,未開始,依家入去剛好。好啦,我都係港大,支持下師弟師妹,又從來未捧過港大劇社嘅場,睇半個鐘都好吖,無厘頭走咗入去,嘩,八九成滿座喎。

一開始,主持人介紹,原來呢個「櫻雪飛。戲劇比賽2019」係FRESHMAN一手一腳搞架喎。我諗,港大無表演、戲劇嘅科,劇社表演就要預咗係業餘,原來仲要係業餘中嘅新手……可能你地已經在中學演咗六年,我唔應該低估依家嘅同學仔……。總之,禮拜日租個正式劇場嚟表演,應該係認真嘅。主持又話同學仔準備同排練咗兩個月,放學要尾班車先走,又空堂都坐埋一齊。我諗,為咗三十分鐘嘅表演落重本(時間好寶貴,仲要係過去嗰兩個月),真係熱血。

第一套叫《失。笑》,SORRY,我睇完第一幕真係失笑,唔通呢個年代仲有呢啲故仔咁大鑊︰主角遇上小丑搞一下笑就鐘意咗做小丑?醫生老竇壓迫主角去做醫生?阿媽叫姐弟食蘋果唔好反對老竇?家姐反叛卻又表面支持細佬抗爭背係笑鳩個細佬?點算,三四十年,香港家庭無進步過,同學仔仲係面對緊家庭嘅壓迫,好可憐。我遇過嘅師兄師姐,無一個仲係「季節型古老石山」,個個都係講點樣同仔女做朋友、點樣裝傻扮嘢去引導、點樣講唔迫得驚個仔自殺,嚴父慈母好似已經入咗歷史。廿幾年前嘅畢業嘅醫生,依家係五十歲,早婚嗰啲四十幾咋,成長於七十年代尾八十年代頭,好開放、好見多識廣、好講人權唔家暴架嘛。編劇睇得TBB師奶劇太多中毒?有無問過讀MEDIC嘅同學仔醫生爸爸咩樣架?劇本真係一劇之本,膠劇本俾你搵周潤發嚟演一樣係膠劇(王某大導證明咗幾次)。呢個劇仲有一個情況,唔同嘅演員喺幾個對白入面都用「父母」一詞,好似照稿讀,照計廣東話口語係「阿爸阿媽」「爸爸媽媽」,俗嘅就「老竇老母」,英文就「DADDY MAMMY」,叫「父母」係官腔官話。係變化日積月累而不自覺,定係我太敏感呢?

睇同學仔嘅比賽作品,唔應該期望專業嘅劇本同演出,有訊息或者出色嘅EXECUTION係BONUS。都留低睇埋餘下兩套,睇下依家啲細路諗緊咩嘢都好。

第二套叫《圓荒》,第三套叫《悟》,都係講社會議題喎,又差唔多,一併講下。兩個都係小公務員面對公義、政府、謊言、程序,好多矛盾、好多壓力、唔知點算,又似係《一九八四》嘅同類。但係,安排同橋段真係TOO SIMPLE,SOMETIMES NAIVE,你地隊嘅「制度」比你地演出嚟嘅,面嗰浸都SOPHISTICATED好多,OLD SEAFOOD嘅滑唔係你地想像咁好相與,政權做嘢搞到死人係好大鑊唔係咁輕鬆架。我唔記得《圓荒》係咩時代,但《悟》就講2047。但係兩套嘅劇嘅環境設定都好古老,好似蘇聯時代嘅技術同溝通,今時今日嘅BIG BROTHER又點會咁倚賴人去維穩,科技去到2047,就更加係想像唔到。如果係要探索反烏托邦,可以更加瘋狂,年青人應該比OLD SEAFOOD清楚有咩新嘢可以玩,點解要玩到咁老套?

咁三套劇都OK嘅,我唔覺得浪費時間。三套劇入面有兩套講社會議題,對正義、制度、謊言有好多質疑、不無譏諷之態。成個演出係GOOD SHOW,GOOD ENOUGH,完場同學仔喜氣洋洋。台上台下,演出前後,都好香港人。正如貴SOC大仙問(好似係,老人家唔記得一字一句),點解劇本咁「認命」、「妥協」。其實我就有個小小體會,港大嘛,有做吏嘅傳統,入得港大唔揀暴大就一定有啲物以類聚,嗱,我自己感覺唔科學無調查架,唔好有人自己對號入坐咁膠就好。

跟住就有「組爸組媽」呈獻嘅大電影,好似玩咗60分鐘有多呀,兩點都就到喇!評判要咁耐計分嗎?台上同前排睇得好開心咁,但係我呢個亂入嘅觀眾就睇到一頭霧水,我係嚟睇戲劇,唔係嚟睇YOUTUBE,最慘有啲部份拍到似抖音好鬼LOW。YOUTUBE可以停、可以飛、可以跳,劇場無。仲有呢個係比賽,我想聽下評判有咩討論喎,老鬼會鬧人定係妙語連珠台上台下一齊學下嘢。如果呢個係私人PARTY,可以事先講聲好嗎?我可以唔入嚟。如果呢段係AFTER PARTY,可以辦完正經事你地再ENJOY好嗎?或者可以單聲會玩幾耐?我可以走先唔阻住你地。依我可以點?走定唔走?我都係港大畢業,好多嘢係傳統,我好珍惜各種傳統,可能《「組爸組媽」呈獻》一個鐘係偉大嘅傳統一定要年年繼續,係可以架,你地內部知天知地係無問題架,但既然係一個公開演出,又賣飛俾外人入嚟,商品說明一下可以嗎?作為一個亂入嘅觀眾,真係唔知點好?莫非這就是劇場,你唔知下一幕發生啲咩事?

挨到頒獎係值得嘅,你地位大仙EDWARD LAU真係好嘢,講話雖短但係有料,學到少少戲劇嘅嘢,佢早啲出嚟講嘢頒獎咪好囉,我可以早啲走。

唔知港大劇社嘅同學有無拍低呢個演出,會唔會放上去YOUTUBE俾大家一齊齊睇睇呢?嗱,同係港大,提提你地,條片上咗網就一世架喇,諗清諗楚先好撳SEND呀!

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 201090
Date: 2019-11-12 05:16:28
Generated at: 2020-10-31 10:19:09
Permalink: https://www.vjmedia.com.hk/articles/2019/11/12/201090/港大劇社的青澀演出