令人懊惱嘅求職者

 

上個禮拜有一日,未夠9am。小編啱啱踏入office,坐都未坐低,電話已經不停係咁響,煩到小編拎起個電話黎聽。

女士:「你好呀,我上網見到你哋請緊 Administration Assistant,我有興趣申請,請問應該點做?」

小編:「麻煩你將CV send 去我哋個 Email,[email protected]。」

一分鐘後……

電話又響……同一位女士打嚟:「我已經 send 咗,你哋收唔收到?」

「真係唔好意思,小編真係啱啱開電腦,部機俾較慢,仲 Load 緊。」

其實唔只電腦,連小編個腦都係啱啱著咋。

之後腦細返咗嚟,即刻叫小編 update 佢 budget 嘅進度。就係小編交代呢幾分鐘期間,枱頭電話不停咁響。去到一個點,腦細好無奈咁話:「好嘈,不如你聽咗先。」

又係同一位女士:「你睇咗我份申請未,你覺得點?幾時可以嚟 interview?」

老實講,小編真係未睇,雖然每日都會睇下有咩申請者,但唔會無時無刻咁睇住。唯有用返公司嘅公式答法:「我哋已經收到你既申請,如果合適嘅話,我哋會喺四個禮拜內聯絡你。」

終於同腦細報告完,返埋位做嘢。電話又響。今日有幸第四次同同一位女士對話。

「你睇咗未? 我經驗豐富,好適合呢份工作,係唔係可以嚟面試? 我今日好得閑。」

Um……經驗豐富,呢個情況有啲棘手。公司請緊初級文員,一般係新鮮人或者一至兩年經驗嘅朋友嚟應徵。但呢位女士不單止有博士學位,仲有超過十幾年教學經驗,佢應該對於微薄嘅初級職位薪金無興趣。

小編唯有嘗試婉轉啲咁解釋俾嗰位女士聽:「其實我哋呢個係 Junior 位黎,無論工作內容同薪酬都可能同你想像中嘅有分別。。。」

仲未講完已俾打斷……

「如果你覺得我嘅 CV 唔啱睇,我可以作過另一份,你教下我點寫。你同我見咗面我就會俾你睇到我有幾適合份工。我而家好需要呢份工,呢份工作好啱我,同我啲經驗好 match。」

小編唔好意思當面撥人冷水,唯有話同相關部門商量吓。

半個鐘後,電話又響,同一來電顯示。小編扮唔係位,無聽到。老實講,係都俾啲時間,半個鐘會有咩進展。

再半個鐘後,又再打嚟……

如是者,全日都係同一 pattern。每半個鐘就會響一次,準時過鬧鐘。到底點解半個鐘就打嚟一次,無其他野做嗎?雖然有啲時候,個來電顯示唔係同一個電話號碼,但因為打嚟嘅時間太吻合,小編覺得好有可疑,搞到全日都唔敢聽街外打嚟嘅電話。呢種狀況持續咗三日……

主動係值得一讚嘅行為,但有時都係適可而止。太主動或被動都唔係太好。令小編疑惑嘅係,求職期間無意中令對方覺得懊惱嘅話,到底有咩得著?

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 201329
Date: 2019-11-17 06:09:28
Generated at: 2020-02-22 00:04:03
Permalink: https://www.vjmedia.com.hk/articles/2019/11/17/201329/令人懊惱嘅求職者