喺香港,你用「民望」來衡量特首好唔好,係你on9

 

 

其實衡量一個特首好唔好並唔係睇民望,呢啲係民主社會嘅準則,所以大家成日睇住民意調查打飛機係冇用嘅。

你唔會用一個sales寫code嘅能力嚟判斷佢嘅表現。

同樣地,你點可以用民望嚟去衡量一個特首嘅表現呢?

而特首,講到尾都係一個打工仔。佢嘅老闆唔係香港人,而係党。

當然,都係有人唔明點解党要委任啲激嬲香港人嘅特首,大家相安無事,唔好咩?但係sorry,党真係唔在乎你哋點諗,甚至真係要激嬲你哋。

跟住落嚟,我會同大家講下應該用咩標準去衡量一個特首嘅好壞,等大家唔好再癡心妄想,用受過嘅西方教育去睇中国社會。

順帶一提,本文會一直有兩大假設:1)中共對於国土其實冇大家想像中咁有堅持,除非本身有好豐富嘅天然資源;2)中共最在乎嘅係意識形態之爭。

首先,大家要明白香港有咩作用。有啲人會話香港係一国兩制嘅示範單位,具有用嚟統一台灣嘅政治作用。所以呢,特首嘅其中一個任務就係要說服大家一国兩制係好嘢嚟嘅,以引台灣落搭。

咁嘅諗法只係啱咗一半。其實做示範單位呢,對於中共嚟講只係附帶作用。其實收唔收返台灣呢,亦都唔係咁重要嘅事。台灣嘅存在其實係用嚟引起中国人嘅大中華情結。中国喺土地問題上向來都唔係寸土不讓。佢最在乎嘅係意識形態嘅威脅。只要唔涉及到意識形態嘅威脅,同埋動搖到自己嘅管治威信,中共其實冇話事在必行嘅。

中共最怕嘅呢,就係台灣好。台灣行民主行得好,仲要喺民生經濟方面好過自己嘅話,就會影響到自己嘅管治威信喇:「大家都係中国人,點解人哋比我哋好呢?係咪因為行民主呢?」舊時孫中山搞革命呀,同埋再之前嘅乜嘢百日維新呀,都係睇咗英屬香港呀同日本呀仲有西方列強呢啲示範單位而引起嘅。所以国內媒體其實一直都有挑西方社會嘅弊端嚟講。但係台灣呢,喺歷史上、語言上同種族上,就對中共嘅意識形態產生威脅。

所以收返台灣呢,其實都係一種意識形態之爭嚟,用愛国主義同埋中国嘅經濟實力比台灣好嘅事實去打壓人哋嘅意識形態。

相比之下,中国其實冇咁大嘅意欲去收返台灣。
而香港呢,其實同台灣都有啲相似嘅。收返香港其實有戰略嘅意味,呢點可以喺第二點講。香港行緊嘅又係同中国唔同嘅制度。如果香港好過中国嘅話,咁大家都係中国人,憑咩香港可以好過中国呢?

所以呢,香港一定唔可以太好,尤其政治同民生方面,同時,亦都要宣揚冇中国,香港早就完蛋嘅概念。呢啲嘢唔係畀香港人睇嘅,尤其短期內根本冇任何效果。呢啲嘢其實係畀中国人睇嘅。所有嘅修改教科書同官方文件都係做戲做全套,主要目的係配合中共嘅媒體去話畀中国人知:「香港有自由又點?冇我哋幫手咪又係一pat屎!」

所以,特首民望唔可以高呢,我覺得其實都係政治任務嚟㗎。你民望高即係政治同民生做得好,咁點樣做好「一国兩制」嘅示範單位呢?唔係示範畀台灣人睇,而係示範畀中国人睇,有自由咪變到香港咁囉,都係党好。

其次,就係keep住泵水到中国。咁呢樣冇嘢好講喇。鄧小平直情話国家要保護香港作為自由港同國際金融中心嘅地位,《基本法》第109條都講明特區政府要保持香港國際金融中心嘅地方。有香港嚟收集資金同技術,中国先可以大力發展,用經濟發展令人人都覺得自己可以上位,以穩固中共嘅意識形態。

同樣地,當初鄧小平之所以堅持要收返香港,唔係因為大中華情意結。你睇佢哋成日割地就知啦!重要嘅係香港喺改革開放後可以帶嚟嘅助力。當然啦!香港人喺回歸前已經證明到自己對於中国可以有幾大嘅幫助。真係前人種樹呀!

而嚟到依家,就算唔講香港嘅作用,中共都已經有啲騎虎難下,一直吹到咁大,依家就算想唔要香港都唔得。尤其如果港獨成功,班仆街香港人又搞得起嘅話,完完全全就係鼓勵中国人作反。

以上兩點,就係評估一個特首表現嘅兩大核心標準喇。

而套用返落實際情況又係點呢?

大原則嚟講就係「唔好畀香港人太好過,但係又唔好搞禍香港嘅金融,佢哋搞事就冇乜所謂嘅,但係涉嫌意識形態嘅事就唔可以含糊,更加唔可以傳播返大陸。」

其實啲咩赤化呀,成立廿三條呀全部都係為咗呢個大原則服務嘅。

大家明白呢點嘅話呢,就知道點樣判斷一個特首係好特首喇!亦都知依家嘅特首係一個幾咁差嘅特首。唔係因為佢民望低,而係佢完成唔到国家畀佢嘅任務。

 

後記:本來諗住論證下邊位係最好嘅特首,但係發現自己唔太熟書,所以放棄。

 

#以上皆為鳩噏

 

作者:山城小豬伯

總編話佢:「真人係幾靚仔嘅」

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 201496
Date: 2019-11-22 14:08:07
Generated at: 2019-12-12 21:05:41
Permalink: https://www.vjmedia.com.hk/articles/2019/11/22/201496/喺香港,你用「民望」來衡量特首好唔好,係你on9