區議會變天,然後呢?

 

香港現存呢兩個議會,咁多年嚟似乎只係得1995年立法局一次可以叫做民主派嘅勝利,但要贏到好似今次咁,就真係第一次。當然,喺今年嘅政治大氣候下,每區都有人出嚟意圖頂走建制派,挾極強民意,即使中共港共不斷作弊,只要未惡劣到拉電閘同天火焚票,非建制要贏都唔難;只係贏到咁,都有啲出乎意料嘅。即使區議會有幾咁無力,至少都可以搞到建制派政黨有機會要炒一批黨工,去填選輸之後地區斷糧個氹,都係好事。

寫文章呢一刻係11月25日上午十點半,呢個時候應該只有零星選區未點晒票。不過,呢一刻去諗下之後要做咩,應該係個幾適合嘅時間喇。依我睇,唯今有短中長三策,一定要逐步做:

首先,短期內要做嘅係,運用區議會選舉大勝呢一點,以全港民意為號,去理大救人。睇到傳出嚟嘅消息,理大被圍多日,唔願投降嘅人已經開始出問題。而且,即使真係唔敢以救人為號,由於警方濫封,將香港最重要嘅交通樞紐封死晒,問題亦延及全港各區,搞到大家都唔知點過海好,交通民生大受影響;所以,如果十八區有共識,呢一兩日簡單謝票十分鐘之後,咁多位新晉區議員就好集合做嘢:一為人道、二為民生,要警方解封。此為短策,最遲聽日就要做。

其次,就係清點一下每個區入面有啲咩政治工具可以用。用少少時間,整理一下到底過去建制派主導時,成個區嘅利益係點樣流動,了解全區係點運作,而且唔好咁高尚學人講咩「唔好變怪物」,君子之交淡如水係因為佢哋本身有米,而社會上大部份都唔係君子嚟。學識點用利益去縛住個區,抵銷中共作弊嘅效果,首先就要學識運用區議會。呢啲我當畀一兩個月大家學,咩都識啦?

第三,係要認認真真咁去「做好個區」;呢屆區議會,民主派大勝,好多都唔係因為平日做得好,只係食到個政治大氣候,建制派神憎鬼厭啫,你睇某區選舉廣告印隻貓都贏就知,今屆好多人選擇睇招牌唔睇實績(當然好似故長議員咁臭晒朵就神仙難救啦)。

建制派成個派系乞人憎,就咁睇依然叫做係香港人共識,但個別地區內,大家亦唔可以簡單咁用蛇齋餅糭四個大字總括晒建制派嘅人做過乜。至少,人哋真係切切實實喺個區處現身、握手、搵阿婆吹水、扮黃大仙有求必應。呢啲嘢,唔需要好多錢就可以做到,咁以往嘅民主派地區人士又有幾多有做呢?定係個個都「揸度立場當令箭」,以為額頭鑿住隻白鴿就人人都畀票呢(而事實上有啲唔係鑿白鴿而上屆又入到嘅人,都唔係成日見人嘅)?本身區議會選舉,好多人都唔係睇立場,而係睇區議員自己做成點架;乜都唔做,畫靚隻白鴿咁又算咩實績呢?

過去,可能民主派仲可以賴下議席少,講嘢都冇機會,好似中西區咁畀人趕走咗都會發生,不過咁多新晉議員都係呢大半年使自己錢用自己力都可以做到個贏勢出嚟,就知呢啲都係賴啦;而且依家香港市民係區區都派十幾席畀大家,咁就真係要對得住呢十幾席先好講其他嘢喇。所以要做嘅,已經唔止係「現身、握手、搵阿婆吹水、扮黃大仙有求必應」,而係要利用每區現時都有嘅壓倒性優勢,喺呢4年入面建立一套新嘅政治慣例(利用諮詢功能建立政治慣例→令行政部門「一般唔會反對區議會意見」嘅情況增加)。咁樣先可以喺制度層面上長遠清理建制派留喺唔同區嘅民生毒瘤,真正斬草除根,令香港民間變返正常。

依家大家係贏到有得喺民生層面講「執政」架喇,冇得玩泥沙搞架喇,更加唔可以當區議會只係用嚟派錢,而係要真正每個選區嘅代表合作去改善全個區,拔走建制嘅地區利益或者收為己用。有必要時,夾錢請智囊嚟搞都要。咁當然,係唔係個個區嘅民主派都夾得到,就要睇大家嘅政治智慧啦。

再講多就冷氣軍師架喇,如果讀者話「我夠知啦使咩你教」,咁我實恭喜你架,即係有人識搞啦,香港靠你喇。

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 201549
Date: 2019-11-25 13:15:30
Generated at: 2019-12-12 21:05:35
Permalink: https://www.vjmedia.com.hk/articles/2019/11/25/201549/區議會變天,然後呢?