重新審視「體制內改革」

政治 / 最新文章綜覽

Makoto Mok 發佈於 2019年11月25日星期一

 

記得以前講區議會嘅時候,啲人不斷拎啲咩「蛇齋餅糭」、「單議席單票制」、「種票」、「一車車旅遊巴」之類嘅講法,吹到泛民贏唔到過半議席係因為制度扭曲,制度決定命運,總之唔係人嘅錯。

到上一屆,終於有啲素人睇唔過眼,喺冇大黨嘅支持下,走去同建制派爭。鍾樹根都係咁樣墮馬輸咗俾徐子見,從此從政壇消失。但係,印像中上一屆都仲係有好幾個區係建制派自動當選。

如果我話,今屆區選之前「非建制派」[1] 從來都冇認真對待過區議會選舉,我諗絕對唔算過份。明明區議會控制住咁多資源,又有百幾個特首選委,點解「非建制派」唔肯認真去選呢 (起碼唔好俾人自動當選先)?

我明白「地區工作」係悶到出汁嘅嘢嚟。老老實實區議會嗰啲嘢如果搵我做我肯定死俾你睇。相比之下,請求「阿爺」修改遊戲規則,令到自己友更加易贏到議席、甚至係贏特首選舉,豈不是一個更加吸引嘅選項?唔知啲老泛民係咪一直以為政改遲早推行,到時雙普選 #瞓喺度都贏。如果真係,區區一個區議會選舉,佢哋又點睇得上眼?區議會嗰百幾個選委都可以話係過眼雲煙。

然後中共「走數」 —— 嚴格嚟講係冇走,不過人大831決定同走數冇乜分別。民主派自此無路可走,香港人亦對佢哋浮誇不實嘅抗爭手法開始厭倦,對佢哋能夠爭取「普選」嘅能力質疑,唔單止「六四」事件漸變歷史,連票房嘅六四黃金比例都開始崩壞。

民主派以為遲早到手嘅雙普選落空,變得無路可走,先至引發後嚟嘅激進思維:勇武、港獨[2]。而呢兩者所持嘅基本假設就係:現有制度已經完全腐敗。我作為 #一國一制 倡議者,當然同意 #一國兩制 不可長久,但印像中,持比較激進思維嘅人所見到嘅制度問題,同我所見到嘅問題係有啲唔同。佢哋深信只有「真普選」先至可以解決問題,而香港人普遍對「真普選」嘅憧景,可能倒頭來「只係」傳統泛民主派賴以「瞓喺度都贏」嘅選舉機制而已。

今次區議會選舉非建制派大勝,打破咗「區議會冇得贏」嘅迷思。我哋係咪應該趁機重新審視一下,究竟「體制內改革」其實係咪仲有好大空間,只不過老泛民自己放棄咗呢?[3]尤其係喺「兄弟各自爬山」嘅大原則底下,呢啲「和理非」甚至「擁護基本法」嘅行為,都唔見得會阻住其他人搞激進抗爭。我個人認為,只要係真心想為香港好、為香港人好嘅嘢,而你肯自己身體力行去做,都係值得做嘅。

 

利申:雖然我係咁講,但我對「體制內改革」嘅嘢興趣麻麻,抛個波出嚟希望大家做得好過我。我返返去諗 #一國一制 先。

 

[1] which 直至近幾年其實只有「泛民」
[2] 按:「勇武」同「港獨」兩者係冇必然嘅關係。另外:#首先我反對港獨
[3] 你諗下佢哋會向公眾講「你有票?我唔要呀!」,所有佢哋話做唔撚到嘅嘢,其實都好應該重新審視

 

作者:散彈一號

散彈一號
全職文字工作者、應用哲學家。對「邏輯一致性」、「系統複雜度」之類的偏門學問獨有心得。在美利堅合眾帝國邪惡資本主義集團的領導下,嘗試改變世界。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 201582
Date: 2019-11-26 16:17:29
Generated at: 2019-12-13 05:13:17
Permalink: https://www.vjmedia.com.hk/articles/2019/11/26/201582/重新審視「體制內改革」