老細同西員工攤牌,換來「我剛剛發現懷孕兩個月」,但原來故事未完. . .

 

今日想記低一個舊嘅故事。呢個唔係小編嘅親身經歷,都係其他人講俾小編聽,但離奇古怪嘅程度,佔據小編工作生涯遇過嘅事情頭五位。

事情發生喺小編約干年前工作嘅舊公司。公司規模唔大,HR 部門得兩丁友,一個 HR Manager,另一個就係 HR Officer,亦即是小編。 小編記得自己同 HR Manager 差唔多時候入職,即係之前呢兩個位係差唔多同一時間走,呢種事件間間公司都耐不耐就會發生,所以小編無特別留意。

去到新公司,一般都會同同事食午餐,收吓風。如事者過咗兩個月。有一日食完飯仲有啲時間,幾個喺公司年資長少少嘅同事,突然心血來潮問小編:「你同你腦細入職之前,個 HR 部門有兩個月真空咗,你有無聽過?」

小編無聽過,但見幾位同事已進入八卦 Mode,小編呢個時候決定洗耳恭聽。

大約幾年前,小編嘅職位由一個叫藍莓嘅女仔擔任,佢一直都做得幾開心。之後佢上司辭職,好快請咗另一個 HR Manager 返嚟,我哋姑且叫佢做西瓜先。西瓜一嚟到,已經唔係好鐘意藍莓,藍莓做咩都唔順眼,係咁日日鬧佢。結果梗係唔駛幾個月,藍莓辭職走咗。

作為經理就梗係唔想自己落手落腳做野啦,少咗個藍莓幫手做野喎,梗係啦啦林搵返個人返黎幫手啦,所以好快西瓜請咗另一個 HR Officer 叫南瓜,好似仲同大腦細講,係佢啲同行介紹南瓜俾佢,有好多同南瓜一齊做過野都讚口不絕。

講一講呢間公司既辦公室設計,每個部門都有獨立房間,除非你特登走入去某個部門間房,如果唔係應該唔係太清楚裡面嘅狀況。

自從西瓜同南瓜呢個配搭開始咗之後,越黎越多同事發現,工作上經常想搵西瓜但又搵唔到,打電話搵唔到,走去佢個位又搵唔到,而佢嘅下屬南瓜又每次都會話西瓜開緊會或者見緊人。過咗一排,好多同事覺得越來越奇怪,點解好似拋西瓜落海都搵唔返西瓜出黎,所以大家都不約而同地擺多咗注意力係呢個部門度。

根據其中一位同事講,佢有次見到西瓜,未夠中午十二點就鬼鬼鼠鼠咁係後門走咗出去。好奇之下,呢位同事喺同一日嘗試搵西瓜搵咗好多次,當然搵唔到。之後幾個同事就好似偵探咁,多次偷偷目擊西瓜喺後門行咗出公司之後,就全日再無人見過佢了。

同事商量後決定同大腦細報告。事關呢位西瓜經理原本嘅工作都做得麻麻地,有待改善。大腦細約咗西瓜諗住聽吓佢有咩講,西瓜當然話會盡量改善,然後留低一句「趁呢個時候通知埋你,我剛剛發現懷孕兩個月」。就係咁,跟住個年乜都無變過。公司無真憑實據,只係工作麻麻地又點,人哋一於意見接受,態度照舊。

西瓜 BB 出世放產假期間,有同事報料,話喺街到見過西瓜同南瓜同一個 BB 一齊,態度親密,仲偷影咗幅相。

去到大腦細到,今次決定攤牌。有人證物證,西瓜唯有招認。原來西瓜同南瓜係一對夫婦!西瓜嚟咗之後想有個位俾老公做,所以諗辦法整到藍莓頂唔順辭職,然後幫老公入職。兩公婆順利入職後,西瓜朝頭早返一陣就偷偷返屋企,如果有人搵佢,佢老公南瓜就會幫佢講大話,話西瓜唔係位開緊會之類。去到呢個位,結果都係即時炒咗呢兩個人。

佢哋走咗之後,就發現西瓜個位同電腦檔案入面有好多關於做假證書嘅公司資料……

點解呢幾個同事突然咁有興致提起呢件事?原來佢哋之中,早排有人喺報紙見到一段篇幅好短嘅新聞,一般人未必會留意到,但同事見到個名好似就係西瓜嗰名。西瓜離開小編公司之後搵咗另一份工,但佢今次俾人發現佢求職所提交嘅學歷同證書都係假嘅。公司於是開咗嗰 File 告西瓜,結果西瓜惹上官非。

睇嚟西瓜都唔係第一次咁做,依家咁多年之後先俾人發現,都唔知算唔算好彩……Um……仲有,如果係南瓜嘅話,自己個老婆成日一個人晏就都返咗屋企,而無啦啦又咁岩得咁橋有咗,會唔會有其他諗法呢?小編真係唔知了……

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 201620
Date: 2019-11-28 15:38:49
Generated at: 2019-12-12 17:49:49
Permalink: https://www.vjmedia.com.hk/articles/2019/11/28/201620/老細同西員工攤牌,換來「我剛剛發現懷孕兩個月