好唔好食?WFC,最緊要係黃定藍?

(圖片與內容未必有關)

 

話說,我樓下有間好難飲既珍珠奶茶叫X茶舍。雖然我都叫做係台式飲品既粉絲,X茶舍距離我屋企亦只有三分鐘既路程,但因為佢既珍珠奶茶實在一啲茶味都無,純粹得個甜字,所以我都好少幫襯。但係,自從上個月禮拜經過,見到佢貼左張捐錢比星火同學生既收據之後,我二話不說就貨金買左兩杯支持佢,請埋朋友飲。果然,最後杯野都係非常之一般,但至少呢廿蚊我比得好爽。

諗返轉頭,其實「黃色經濟圈」都改變左唔少人既「飲食標準」,例如平時覺得麻麻地甚至係幾難食既餐廳,但知道左係黃店之後就瘋狂幫襯,驚食唔死自己咁;又或者,有啲餐廳平時明明幫襯開,但知道左係藍店之後就對佢嗤之以鼻,唔好話食,諗起都覺得反胃。結果,有唔少黃店因為比人黃懲罰而做到透唔到氣,要求啲客仔「暫緩」懲罰,比員工休息下;亦有唔少藍店因為表態支持政府之後就少左一堆常客,最後頂唔順要執粒收場。

所以,如果你係藍店老闆想挽救生意既話會點做?我諗正常人都知道答案,唔係要洗大錢裝修,亦都唔係要買飯送野飲咁高成本;只要扮曬野係餐廳門口痴連儂牆,再講句「五大訴求,缺一不可」,肯定即刻財源滾滾來,隨時仲好生意過六月之前。因為,大家都明白藍店生意仆直既原因並唔係啲野食唔掂,亦唔係因為啲伙記特別串,而係因為佢「藍」,所以幾好食無人幫襯;同樣,好多黃店日日排長龍,啲員工做到手忙腳亂,亦都唔係啲野好好食,而係因為佢「黃」,所以就算幾難食都有人自願中伏。亦都係因為咁,大家都可以見到最近有唔少藍店開始變(扮)黃,因為佢地都知自己唔會裝修靚左、買飯送野飲而令黃絲幫襯佢,只有變黃先係唯一既出路。

道理就係咁簡單,依場運動既開始同持續都係基於一系列政治既問題,包括送中條例、警暴、制度及選舉不公等,並唔係因為年輕人「無錢」、「買唔到樓」,所以用下腦都知唔會派下錢(例如葉劉多次提議),推下新房屋政策(不過「一成按」搞到一獲泡,令樓市仲升得勁左)就搞得掂,啲人收完你果一萬幾千轉個頭咪又係上街示威。何況,今次區選既結果就更加顯示到,大部份人仍未消氣,仲係好支持政府口中既「暴力」,只有少數人想立即「止暴制亂」。政治問題必需要政治解決,政府唯一既出路就只有落實五大訴求先可以解決現況;想打經濟牌去解決政治問題,就好似藍店推「買飯送野飲」咁,唔幫襯你既一樣唔會幫襯,幾平幾好食都無用。

老實講,部份黃店既質素大家心中有數,相信有人問你點解幫襯你都唔會話係因為好食,就好似X茶舍咁,即使佢黃我都必須要承認佢真係幾難飲;但咁又點,做人唔需要有飲食智慧都一樣可以長命百歲;但作為當權者,歷史話比我地聽只要少啲政治智慧都會搞到全民反抗,最後人頭落地。

作者:郭象

熱愛文史哲的九十後

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 201643
Date: 2019-12-01 05:48:23
Generated at: 2019-12-12 21:04:23
Permalink: https://www.vjmedia.com.hk/articles/2019/12/01/201643/好唔好食?wfc,最緊要係黃定藍?