公務員事務局點睇公務員罷工?佢唔直接答你. . . . . .

 

哩一兩日同個做政府工嘅朋友傾開計,有樣野覺得好似又幾有趣咁,想同大家分享下。當然,哩到並唔係討論政治嘅地方,純粹只係政治離不開日常生活,離不開你同我,所以某程度上 HR 嘅工作同政治都係息息相關。

話說哩個做政府工嘅朋友同小編講乜呢,就係對於罷工哩件事,公務員事務局點處理。仲記唔記得好多個月之前,「山竹」襲港,全港嘅道路都封哂,政府都係唔出緊急法,全世界停工停課停市,哩次都唔例外,就算道路被堵,鐵路被封,入口被關,都仲係會叫香港人返工、返工同返工。但無奈地,今次三罷嘅威力不下於「山竹」,無論你幾努力,無途徑就係無途徑,就算你想用最高成本嘅方法,即是揸車返工,連條路都無得你行,到底公務員點樣處理缺席、遲到嘅 Case 呢?

我朋友俾我睇咗一睇佢收到嘅 Email……噢!簡單啲,即係話如果 make genuine effort to commute,就算全日返唔到都唔當缺席,之後亦唔駛追返嗰一日;而如果個 effort to commute 咗半日,而你發覺唔想用埋剩低嗰半日去 make 更多嘅 effort 去commute,可以選擇用半日假期去代替。

其實即係咩呢?即係政府用錢買咗你一日 9 粒鐘,你就要返工,如果交通上令到你返唔到工,你都要嘗試去返工,你都唔可以用黎做其他野,要你就算哂時間,都要等。當然,佢 Fact Check 唔到你係咪真係 make 緊 genuine effort,不過戲都要做全套,定時定候好似食藥咁,都要補返啲相,話俾腦細聽你真係 make 緊 genuine effort 架。

而最有趣嘅係咩呢?就係個朋友講返,話佢嘅同事住大埔,有日因為罷工,全日條路都封哂,巴士、小巴、的士都行唔到佢嗰到,港鐵佢個站又唔開,根本無可能返到工。你可以話行路嘅,不過有人計過,如果咁樣行法,要 8 個鐘先落到九龍塘,計埋食飯岩岩好 9 粒鐘。諗住可以全日唔駛返,又唔會秋後算帳?Sorry,佢腦細叫佢用半日假去代替,原因係好難解釋佢全日都係 make genuine effort 返工。

如果哩件事發生喺小編身上,小編一定點都唔會用假去代替。喂,大佬,人哋公務員事務局都出哂 Email 話可以唔駛當缺席同唔扣假,丫你係都要搞啲野出黎。

你以為真正嘅原因係咩呀?係你腦細懶得去幫你解釋咋!

 

【職場膠事】

 

作者:HR 扮工週記

HR 扮工週記
HEA 到核爆、哩埋係枱底畫下圈圈直至 2046 退休既 HR,同大家分享一下每一日 HR 平淡既生活。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 201659
Date: 2019-12-02 14:57:16
Generated at: 2019-12-12 21:05:12
Permalink: https://www.vjmedia.com.hk/articles/2019/12/02/201659/公務員事務局點睇公務員罷工?佢唔直接答你