「唔熟唔食」的黃色經濟圈

(圖文不符,只係搵插圖諗起呢間係真黃店)

 

我想講既唔係邏輯,係同理心。

其實好早之前因為大家對黃店既標準不一,我作為其中一個谷既ADMIN,同其他ADMIN開過會,綜合哂谷友們、其他媒體上既資訊去整理歸納返判斷黃店既一D準則。

點知公開後,即刻有人出黎講:「唔同人唔同既準則。」
就好似當年某大愛團體選左新內閣,主席想同大家傾好團體既定位,之後拎左共識再去制定未來做事既方向,然後有人一野「唔同人對XX有唔同既睇法。」,最後當然搞出個四不像、衰收尾。
不過,提出既人當時係其中要員既女朋友,裙帶關係令其餘成員敢怒不敢言。

所以,我一直好抗拒D男女朋友、家屬一齊做野既地方。
因為呢D地方本質唔係想做好件事,只係一個俾自己人滿足食訓屌既舒適圈。

其實,想推廣一個理念同模式,冇共識冇定義咁點推廣、可以點做?
大家日日屌黎屌去,咁就有出路?
識煽動人情緒既帖文就火熱,又係情緒撚大撚哂既局面?
其實你地想點?

https://www.facebook.com/groups/2798734860192968/permalink/2917841818282271/

原POST後段談論黃客質素問題,呢個可以話係中生代同新生代香港人既通病。
以前實現會社未執既時候,定期會搞放映會,我記得果時FB EVENT係勁多人參加,點知去到竟然得我一個同個講者,計埋工作人員就五個人。
結果,我同講者識埋做埋朋友,KEEP到而家。
好多文字工作就係佢幫我搭路"=w="

幾次去D黃店搞既工作坊都係,最後只會小貓三、四隻。
每每睇見負責人默默地將D準備好既野收返起,都有種滄涼感。
成日講「我地有既係良知」,連尊重人都唔識,講咩良知?

連黃色經濟圈都未有,大把黃店做唔住,仲有人提出要黃店提供優惠。只係識一窩蜂去果幾間出名既黃店打卡,人地人手不足服務得佢唔滿意就上網寫衰人、對住新發現既黃店就諸多留難。
請問你地咩事?
下下都「我地唔可以好似佢地咁」、「愛比暴力強」,唔通呢D就唔係語言暴力?

個個都當正自己係黃店審裁處,有權決定黃店點做、SET咩價位。識得講對家冇人性,咁你地「下,你咁貴」既時候否定緊人地既能力同心血,又好有人性咩?

睇下林鄭點對警隊同落選建制議員,人地就真係共建藍色世界。無論自己人做錯咩都去攬去幫拖,開拖都閂埋門。
你地就日日做D扣自己人血既野,口口聲聲共建黃色經濟圈,但就要求黃店做善堂:不賺錢、不開舖(罷工)、多捐錢、請手足,其實黃店背後都係一班人黎,你地知唔知人類係唔可以光合作用就生存架?

發掘自己人既缺點究竟有咩好處?
香港人幾時可以放低唔熟唔食呢種文化?

 

作者:鳩文瘋

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202195
Date: 2019-12-17 16:12:21
Generated at: 2020-10-25 03:50:47
Permalink: https://www.vjmedia.com.hk/articles/2019/12/17/202195/「唔熟唔食」的黃色經濟圈