屯門輕鐵壞拍卡機,MTR 派十幾個查票員加幾個附例特勤捉學生係咩玩法?

政治 / 最新文章綜覽

 

我係一隻係屯門長大嘅牛,由細到大走遍各區,要山有山,要海有海,就算食玩買都可以係晒屯門搞掂,所以就算係港島區返工都唔會捨得搬離屯門,假日只要避開市中心就無懼大陸自由行嘅影響,一樣可以多姿多彩。

港島有叮叮,屯門有快過叮叮少少嘅輕鐵。住係屯門都知輕鐵係我地主要嘅交通工具,真係個個都搭到識背啲輕鐵站,仲識分咩區。以前有屯門人問我住邊,如果唔想答但又唔可以無禮貌咁避開,就會回佢一句:「我住2區。」。去市中心都有啲地區可以選擇巴士或小巴嘅,但真係唔多,去大興及富泰嘅小巴隊經常出現人龍。而我呢,有次市區嘅朋友揸車入屯門搵我,佢地係早咗到市中心,咁我就話馬上搭的士出嚟。佢地以為我好隆重要坐的士去搵佢地,我就話:「如果坐輕鐵,等十分鐘、坐十分鐘,行路就十五分鐘,搭的士只不過五分鐘,咁你係我會點選擇?」係呀,屯門真係細得嚟好大,好多地方可以行路去,所以屯門人好行得,但趕起時間上嚟就真係感覺好大,唔似市區趕時間可以巴士或地鐵都夠快。輕鐵站與站之間距離好短,啲唔行得嘅老人咪覺得方便囉,但作為屯門牛為咗唔遲到真係要早啲出門預時間等同搭輕鐵。哩個就係屯門被輕鐵壟斷嘅壞處,而好似從來都無人去提問咁。

近排香港發生咩事我唔多講,輕鐵係港鐵嘅一部分,亦即係黨鐵一部分啦~屯門示威活動之一係爆出入閘機及增值、售票機。對我哩個係港島區返工,去市中心行十五分鐘、搭的士五分鐘嘅人嚟講影響真係不大。係無得嘟閘嘅情況下我都享用過「霸鐵」嘅福利(暴露年齡詞彙)。不過班次真係梳到離晒普,等半小時真係變咗基本,擺明係製造煩惱俾市民,令市民去憎示威者。拉遠小小講,因為早幾個月都係區選活動,因為咁所以會留意咗一堆素人候選人,當中屯門十一素人最為突出而且係最貼地,有幾個素人嘅政綱都有提出增設一啲新嘅巴士及小巴路線,真係為民生著想嘅提案。講真有返咁上下民智都知就算無示威活動,屯門嘅交通真係好有問題啦~早前佢地當中有幾位素人去輕鐵車廠嗰邊反映問題,啲輕鐵班次真係密返而且慢慢回復正常,真心覺得佢地做到嘢,叻仔!

 

【三問港鐵】就昨日鳴琴站港鐵附例特勤隊奇怪舉動昨日下午,阿晴在鳴琴站外擺街站時,留意到有一群港鐵查票人員到鳴琴站查票。本來,輕鐵查票都是屯門牛牛經常遇到的事。但因應前日在新圍站有港鐵查票人員暴力對待市民,因此阿晴到場監察。阿晴在…

黃丹晴 Lemon Wong 發佈於 2019年12月18日星期三

 

但係咁喎,屯門都好似好多個星期無示威同爆機活動,咁輕鐵應該係哩段時間去維修及換機㗎,而且有部分都唔係壞,係佢地封機話壞之嘛。咁我哩個港島區返工有車船津貼嘅幾蚊一程嘅輕鐵當豪俾佢照拍咭,但有幾次我出閘時話我無入閘,又有幾次係扣我最遠嗰程囉,頂佢個肺!然後哩幾日留意山景候任區議員黃丹晴嘅page,一個鳴琴站可以擺差唔多十多個查票員,再加幾個附例特勤,仲有幾個戴上口罩嘅疑似便衣警察去捉無買票或入閘嘅市民,睇埋留言就知佢地目標主要係學生,仲曾經暴力對待!有少部分人會話「你有入閘或買票就唔會有事」,亦有人話「入唔到閘咪選擇搭其他囉」,真心離地到痴線!哩堆學生發咗達呀?輕鐵就係佢地唯一選擇咁滯,那有巴士或小巴可以選擇?那有錢經常坐的士?我哩個唔在乎車費嘅人都試過焗搭過幾次「霸鐵」啦!雖然黃丹晴話去跟進啫,林鄭去理落選嘅建制派都無去同當選嘅區議員溝通呀~

你地啲政府、輕鐵職員及警察咁樣對待屯門牛,我地更加唔在乎閘機嘅破壞,恨不得所有閘機壞晒!攬炒概念真係政府迫成,你壟斷個交通,唔該你照顧返民生,又或者聽取哩班議員提議,唔該增設返多啲新巴士線及小巴線,俾返多啲選擇我地!

 

 

作者:牛靈

牛靈
屯門開荒牛加盟成員

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202252
Date: 2019-12-20 03:27:45
Generated at: 2020-08-03 20:46:12
Permalink: https://www.vjmedia.com.hk/articles/2019/12/20/202252/屯門輕鐵壞拍卡機,mtr-派十幾個查票員加幾個附例