「每年生日,我都要食你買嘅生日蛋糕!」

 

「有無搞錯!個女生日你都唔記得!你點做人呀媽㗎!」我生氣地說。
「一時唔記得咗啫,一陣去買返個生日蛋糕比你。」媽媽說。
「要人提就無意思啦,你對我啲嘢都唔上心嘅!唔食喇!」我說。

我果陣仲係好細個,覺得「生日」係一件好重要嘅事,全家人都要隆重期待,前一晚要一齊倒數,搭正12點就同我講生日快樂,然後正日我係大晒,個個都聽晒我話,會一齊出街食大餐,返屋企再食生日蛋糕同收禮物,所以當呀媽唔記得咗我生日嘅時候我真係好嬲,發晒小姐脾氣。

但係唔知由幾時開始,我變得愈來愈唔重視「生日」,可能係因為已經出咗嚟做嘢,覺得「生日」根本無乜特別,咪又係要番工,又係要受氣,又係要加班,永無特權,除非請假啦,但我好少咁做,因為放完假只會有更多屎要執,最近幾年基本上都係處於得閒死唔得閒病嘅狀態,有一年係忙到自己都差啲唔記得咗自己生日,至於倒數?有時我係攰到十點幾已經瞓著咗。

屋企人以前會買生日禮物比我,例如公仔、手錶、手袋、衫褲鞋襪等等,每次收到我都會好開心,然後唔知由邊年開始,呀媽就話唔再買禮物比我,轉比利是,佢話因為已經唔再知道我鍾意咩,佢比錢我,我就可以買自己鍾意嘅嘢,然後我先發現我同朋友、同事傾計仲多過屋企人,距離好似愈來愈遠。

唔知有無人同我一樣,成日恃住屋企人錫自己,對佢哋態度就好差,最常出現嘅就係番工受咗氣,番到屋企呀媽問你嘢嘅時候就嫌佢煩,話唔想出聲,想靜下,然後走入房,但係你有無諗過你返咗成日工,佢就只係得咁僅餘嘅時間同你傾計,分享生活嘅小事,了解下你?好彩年紀大咗個人真係會開竅,我而家已經唔會再好似以前咁咁任性。

生日蛋糕,一年食一次,平貴其實無所謂,最普通最傳統嘅雜果蛋糕,又或者係貴到呀媽都唔認得嘅千層蛋糕,其實對我嚟講都無乜分別,最重要係同邊個一齊食。每年吹蠟燭之前我都會許願,只要一家人平平安安,健健康康咁食生日蛋糕已經係我最大嘅願望。

「我聽日生日喇喎,你買咗蛋糕未?」我說。
「哎呀,我唔記得咗,唉,人老咗真係咩都唔記得。」媽媽說。
「唔緊要啦,我會提你㗎嘛,我每年都要食你買嘅生日蛋糕,唔好諗住走數呀!」我說。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202355
Date: 2019-12-23 00:07:26
Generated at: 2020-02-19 21:35:14
Permalink: https://www.vjmedia.com.hk/articles/2019/12/23/202355/「每年生日,我都要食你買嘅生日蛋糕!」