【區政任重道遠】屯門公園回復寧靜後,有啲咩做?

 

區議會當選之後,呢一個月多啲,好漫長。

啱啱當選之後嗰一個多禮拜,我同屋企人去旅行,呢個trip 一早plan 好,當初諗,無論輸贏,都應該抽時間立即陪老婆去玩下。

返番香港之後,我就好糾結。我地屯門十一兄弟,當初部份人各自喺自己嘅圈子努力,而第一次聯合行動,就係「光復屯門公園」,嗰陣屯門街坊都好肯行出來,呢一點亦間接令我地更加堅定,決定參選繼續服務居民。糾結嘅點就係,當我地隨後忙於反送中其他行動,或者再之後忙於競選工作,屯門公園嘅「衛生問題」,好似死灰復燃,最諷刺就係我地當選之後,各路街坊都報料,話大媽同恩客之間嘅交易,已經恢復巔峰。

無論從服務街坊,定係自私一啲,為啖氣,我地都無理由忍落去。

12月12日,一個好普通嘅星期四下午,我再次去屯門公園,開直播,呢次行動我地無特別宣傳,只有幾個朋友一齊去。

屯門公園尋找娜娜記

巫堃泰 Michael Mo 發佈於 2019年12月11日星期三

 

嗰次嘅效果,有啲令我費解。當我地出現,一路直播,一路同觀眾講解公園發生緊嘅嘢,就如同有人報哨兵咁,公園經理好快就加入我地。

候任區議員同區議員,喺政府部門眼中,都係普通市民,真係架,區議會只係諮詢機關,無政府官員同埋公務員事必要理會我地。

佢嗰日見到我地落去,帶埋幾個公園保安落場巡視,除左口頭勸喻,仲出動埋分貝計,可謂明知做戲都交足功課。

 

「勿忘初衷」

本來真係得我地十一兄弟,有道義責任繼續跟進屯門公園問題,畢竟我地出來競選之前第一次行動就係針對大媽唱歌。而令一眾非建制議員都落水,就係要講到呢一單:

【康文霸權】琴晚屯門嘅一場小小學生集會,被康文署百般刁難;每日屯公嘅大媽賺錢掠水派對,康文署卻充耳不聞。新墟候任議員張可森承諾,將聯同28位民主派議員,輪流於屯門公園每天會見市民處理投訴。希望屯門公園可以真正光復!

屯門開荒牛發佈於 2019年12月12日星期四

 

話說嗰日屯門中學生咁集會,警察批左不反對通知書,但係康文署另一個公園經理竟然百般刁難。我地十一兄弟之一嘅張可森,嬲起上來,就話「不如我地每日都去屯門公園,睇住你班康文做嘢!」

繼續跟進屯門公園,因為呢個係我地其中一個重要嘅競選初衷,亦係抗議康文署嘅多重標準執法。

 

 

屯門非建制區議員輪流會見市民,於12月21日起動,至今一星期多啲。

一心搵食嘅大媽歌女已經離開,剩下少數自娛,或者索性唔開演唱會,只求來搞局來報警來叫非禮,但喺我地計畫中,大媽恩客嘅交易停止,就係成功,佢地要走,我地會歡送,佢地來報警,我地會「支持警察」,總之你開唔到檔賣唱賣摸手仔,就係居民贏。

有參與嘅居民呢幾日都講,好耐未試過行屯門公園。

下午嘅屯門公園,好耐未試過聽到雀仔叫。

多謝街坊證明左,屯門人有能力救屯門公園。

 

衛生問題,真正的衛生問題。

世界衛生組織定義「健康」,分別係生理健康,同埋心理健康。

雖然「屯門公園衛生關注組」呢個名有啲玩味性質,但我地睇屯門公園衛生問題,其實都係抱住呢個心態。

一方面,我地關注大媽同恩客喺交流過程當中產生嘅,例如隨地棄置啤酒罐花生殼,呢啲直接破壞公園環境嘅事。

另一方面,公園其他使用者嘅心理,大媽獻唱嘅嘈音、非法行乞嘅嘴臉、令人懷疑是否真係賣唱嘅妖豔包臀短裙、逆齡打扮的魚網絲襪等等,呢啲都嚇怕左其他公園使用者,特別係帶住細路來公園,都唔知點解釋俾佢地知,呢位婆婆點解著到咁。

而社會比較少討論嘅,其實係長者需要嘅問題。

我地都知道,後生仔鍾意睇乃木阪唱歌跳舞,鍾意玩偶像大師,長者都想睇下表演,想睇下佢地眼中嘅靚女,就算我地覺得核突,佢地可能覺得靚,唔論斷啦,反正我唔想諗落去。

社會一定要正視表演場地問題,一定要正視賣藝制度問題,同埋一定要正視性工作者喺社區點樣生存同時又唔會影響市容嘅問題。呢啲都需要屯門居民參與討論,我地區議員先有牙力向政府建議。

 

除夕倒數活動

屯門公園梗係用來玩。

黎緊12月31日晚10點半開始,我地會到屯門公園「湖底」,歡迎街坊來搵我地傾計,同埋最緊要,一齊倒數迎接2020年。

公園活動唔需要不反對通知書。

 

 

作者:巫堃泰

巫堃泰
屯門區議會民選議員(2020-2023),香港大學法學(人權法) 碩士,香港機場發展關注網絡發言人。曾參與香港電台節目評論時政,並經營民間網上電視台。熱衷公共政策及管治研究,從過去到現在積極參與公民社會組織及倡議,創造多項時政惡搞產品,期望用創意改變社會。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202492
Date: 2019-12-30 15:03:04
Generated at: 2020-06-05 10:19:02
Permalink: https://www.vjmedia.com.hk/articles/2019/12/30/202492/【區政任重道遠】屯門公園回復寧靜後,有啲咩做