「10·9·光·復·香·港·時·代·革·命」

 

新年快樂!

嚟到除夕,唔知有幾多屯門牛記得屯門曾經試過有煙花匯演?就係1997年政府選擇係屯門泳灘上演一場倒數及煙花匯演慶祝活動,當時年紀輕輕嘅我緊係同朋友走去沙灘霸靚位等睇啦~因為嗰時真係好細,除咗係電視睇過之外都未試過出去尖沙咀現場睇維港嘅煙花。人生第一次睇現場煙花就可以睇到場勁嘅,仲好記得嗰種煙花爆響然後飄落嘅震撼,佢哋應該將放煙花嘅船泊得好近岸邊,所以每放一下煙花嘅爆響聲都震入心坎,隨著聲響抬頭望住爆開嘅花火衝上高空然後灑落,五顏六色的向下迎面墜落,大家都會有想避開嘅感覺,當然無真係衝落人到啦,但就感覺到好多粉粒彈落塊面道,完場時同朋友相視而笑,因為我地嘅面都充滿住好多黑色一點點嘅炸藥粉末。之後等到再大個啲出去尖沙咀排到最前,都無係屯門黃金泳灘睇嗰場嘅震撼,純粹去到跟住氣氛咁嘩嘩聲大叫,胡鬧一番。

出嚟做嘢後,都有同下男朋友去下睇煙花同倒數嘅,隨住大陸自由行越嚟越多,佢地亂咁迫又驚死俾人插入而想貼住你咁企,慶祝變躁底,又試過同朋友出去倒數完後被熱情嘅外國人又攬又錫咁,我就驚到好幾年都唔再出去,甚至無話特別咁去啲倒數活動,尤其五年前嘅運動過後,感覺香港嘅氣氛已經不如從前。

昨晚見到有候任議員出post,話會係屯門公園有個倒數活動。今年係特別之年,仲要係屯門公園,之前中秋節大家自發性去屯門公園慶祝都無去到,今次真係想加入屯門牛群感受一下氣氛。今晚十一時多我才入到瀑布對出嘅廣場,由幾位候任議員發表過後然後唱《願榮光歸香港》,時間接近時大家一齊數「10·9·光·復·香·港·時·代·革·命」,之後再好齊心咁大叫「 1月1 華御結」,呀!應該係「1月1維園見」。而此時此刻幾位候任議員亦正式上任。多謝咁多位連任及未上任先做事嘅區議員,係你地發起光復屯門嘅遊行,又發起係屯門公園會見市民活動,輪流巡視公園,監察公園有無大媽同淫亂阿伯不法地以淫亂歌舞收取利益及噪音問題,仲令我地知道佢地啲遮唔可以高過兩米添。佢地係發表中叫我地市民監察佢地議員業務,大佬呀~你地對比以前嘅建制派有過之而無不及,當然可以話唔應該同嗰啲白出糧嘅垃圾比,但係你地所做嘅我地係有眼睇㗎,如此透明公開地實際咁為我地社區做事,有啲仲已經列咗清單做過啲乜,我地感恩都嚟咁切啦~

最後,係大家正在散場嘅時候,黃丹晴議員突然脫下外套俾幾個街坊圍住,我同朋友就留步食花生睇下發生咩事啦,然後其中一個男仔開香檳直向住這黃議員噴,情況有點混亂之下見到有另一男子用同樣手法向另一位議員攻擊。(原諒我太怕被波及所以走得太遠未能看清)一片歡樂氣氛慶祝他們正式上任,到底佢地做咗幾多嘢先會同街坊可以做到如此情同朋友嘅關係?相信在屯門碼頭嗰邊落選而令街坊開香檳慶祝嘅何已完係一世都唔會明白,真心付出實事求是,不以利益去聯誼關係,先會得到街坊真心愛戴嘅。

 

小記:就警暴嚟講,多年前(耐到我都唔記得係幾耐)係尖沙咀嘅擠迫除夕夜有警察一巴巴咁摑落個男仔塊面道俾記者影低,而警方嘅解釋係警察同個男仔講「HAPPY NEW YEAR」喎~所以呢,警暴同警方以唔合邏輯嘅大話去解話係好耐以前已經發生緊,而唔係五年前開始㗎~

 

 

作者:牛靈

牛靈
屯門開荒牛加盟成員

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202545
Date: 2020-01-01 06:21:01
Generated at: 2020-06-03 01:08:14
Permalink: https://www.vjmedia.com.hk/articles/2020/01/01/202545/「10·9·光·復·香·港·時·代·革·命」