【黃藍經濟戰】唔係話要傷害邊個呀，但係你話「黃」我就撐呀？

你話黃我就撐呀？

如果一定要跟規則咁不如我都求其租間店狂loop《願榮光歸香港》、設下連儂牆、捐少少錢俾星火賣下魚蛋腸仔燒賣就可以瘋狂食人血饅頭啦～

只要唔係藍、好食嘅我就食，要我排隊必定唔食。因為我真係識人從來唔表態咁正經老實地做生意，真正嘅良心小店。

亦都見有識嘅人俾人懷疑係藍甚至係紅（因為無再來往，我都唔知佢真正立場），本來未有反送中時負評多多，話無味精但就有小朋友食完因味精而過敏要入院、對員工態度勁差經常呼喝、食物份量少等，係有裝修行動後就開始播唔同版本嘅國歌，得閒就對住客人鬧下警察，然後就俾唔同嘅page出post支持囉～（係唔係打手唔深究）唔使問我咩店，係道講得就係屯門啦～

唔係話要傷害誰，純粹想分享唔好見黃就撐，真正要養嘅係被冷落唔食人血饅頭嘅良心小店，唔係話香港人養香港人咩？而唔係要令稱黃嘅店發達呀～

其實撐黃店係應該講共識，唔係話設定晒規則然後評分放上app，雖然令藍扮黃係好事，令藍嘅人知道認藍就死緊係好事，但咁樣設大台，抗爭被消費真係好反智。遇上一間難食嘅，將懲罰小店變真·懲罰自己，貼錢買難受。

如果間店主本性仆街，對員工差，價格及份量非良心，只係咁啱「立場」係同我地一樣呢？大家要做明智嘅消費者，一間難食嘅黑店佢撐反送中，咁佢都只不過係一間立場係返送中嘅黑店，本質係無變㗎。

在困難而漫長嘅抗爭路上，要善待自己，勿被「黃」去利用及情緒勒索自己嘅善良，食返真正嘅好西啦～排晒長龍，廚房係咁趕工，都唔會煮到原本嘅質素啦，你話係唔係？就算無反送中，我從來唔去要排隊超過15分鐘嘅店食嘢。

而且唔好再係店播國歌啦～真係聽到嘔啦～

P.S：HUGO 快啲編製好《山下見》放上網上平台啦～我比較鍾意哩種曲風，《願》都好聽，但真係聽得太多…………

作者：牛靈

屯門開荒牛加盟成員

閱讀後覺得好，請多多讚好及分享～：）