【行業秘聞】拆牆唔小心打爛水管,用咩方法可以最快令保安關水制?

 

 

想睇答案可以直接碌落最底,不過其實小妹我最想大家關心一樣比較少人留意嘅事。

 

舊居裝修,要先打爛舊有裝修,呢個可以話係最容易被輕視嘅工序。

呢個工序好得意,一方面一定要做,另一方面,做得唔好就最容易出事。

以下啲野都係聽公司師傅大大同我講,阿妹我入世未深孤陋寡聞,都係聽完當分享下俾讀者咁啦。

 

其中出事位通常有兩大個。

一係窗,二係牆。

 

好耐無開嘅窗,一開就……

近年窗少左出事,因為政府強制驗窗,真係做到成效,但如果有啲舊樓,業主唔喺香港,政府要執法都唔係咁容易。

窗出事最怕就係,好耐無郁過隻窗,當有人嘗試開窗,就同你成隻跌落街。萬一打中人,係刑事罪。

最慘係,成個拆舊裝修嘅過程,乜都未做,就上差館了。

 

拆牆拆到入醫院?

牆可以點出事法?大家點諗都未必諗到。

試過有師傅講開,以前有個行家,唔知係咪有心事,拆普通間房嘅非主力牆,呢啲牆其實無咩特別,可能只係用磚砌起咁,佢起勢咁打牆腳,打到一大半,佢就唔洗繼續打了,因為成幅牆就咁霖落佢度,砸斷左隻腳。

 

打穿水管?浸埋樓下?小事啦!

如果嫌以上事件比較罕見,以下就真係成日發生,小妹我直頭識朋友係自己間屋裝修試過。

我個朋友住大型屋苑,個裝修師傅唔生性,只係普通鑽牆,都可以鑽爆水喉,浸到樓下。

咁樓下梗係要佢賠啦,好正常,但係人地唔係善男信女,一野開天價,抹下就用得返嘅野,佢都要話關你事。

不過流落下面屋企真係好小事。

我聽過最大鑊係,打爆鹹水喉,啲水流浸到成層係,仲流埋落升降機,成棟大廈多謝呢位業主,因為架升降機咁多年終於有人俾錢換喇!不過換升降機要停幾耐呢?我食飯聽完個故仔唔記得了。

我只係記得,萬一真係咁,就要叫管理處即刻將啲升降機升到最高,直到關了水制。咁樣啲水最多都係流落電梯槽,而唔係會浸壞電梯機件。

 

打舊裝修之前,要萬全準備,出事都識即刻搞!

睇完呢啲奇怪野,只係想帶出一點:唔好輕視打爛舊裝修呢個工序。

打之前就要盡可能睇清楚,啲電線水喉點走,呢啲都係有圖則文件可以睇,甚至有儀器可以探測。

做任何打拆工程嘅時候,都要截停水電,呢樣都係基本。

不過所謂意外就係意料之外,尤其是舊樓,之前嘅圖則可能已經反映唔到現實,啲水管電線被N 手業主搞到亂晒。仲有,呢個世界唔係度度好似香港咁文明。

我聽過一個故仔,係師傅想問定大廈管理處,水嘅總制喺邊,佢話一定要問定,係因為萬一中嘅萬一,就係就算睇過圖,牆入面無水管,單位嘅水制又關了,但仲有機會打爛改動過嘅公家喉!

最慘係,喺一啲管理唔妥善嘅舊樓,看更竟然話,「我唔知。」

睇多次,係「我。唔。知。。。」

好啦,照做。真係打穿。咁好彩,點算?

師傅話,當年佢對住個看更講:「你咩都唔知,唔緊要,而家你幫我關水制,呢一千蚊就係你。」

故事幾時發生喺邊,唔重要了。

總之,文明社會真係得來不易。我地都要好好咁建構。

 

各類裝修都可以搵小妹我問下,歡迎去我page pm 或whatsapp 我傾兩句!

WhatsApp: https://wa.me/85291325271
facebook messenger: https://m.me/decorgirl

 

作者:裝修小妹

裝修小妹
一個女仔,喺呢個男人嘅世界......

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202533
Date: 2020-01-09 05:48:30
Generated at: 2020-09-21 14:20:22
Permalink: https://www.vjmedia.com.hk/articles/2020/01/09/202533/【行業秘聞】拆牆唔小心打爛水管,用咩方法可以