我探訪獨居老人十幾年,我希望大家呢幾年都可以幫新當選嘅區議員關心長者選民。

 

(photo via cc Flickr user grinapple)

 

話說我住嗰區及大厦近年出現好多問題,有啲街燈壞咗數個月無人理,外牆一啲水管係斷開。

有次係屋企聽到鄰居捉賊,話佢留意到個賊多次鬼鬼祟祟咁偷望某一鄰居嘅屋內(哩戶係經常唔閂門,鐵閘無鎖,到現在仍是)。

每條走廊都有休息空間,有次見到陌生人坐咗係嗰道,我落樓有同看更講,但佢都只係敷衍了事。

另外樓下門口嘅密碼鎖壞咗超過一年,要撳多次先開到門,如果趕時間返屋企俾個密碼鎖咁玩真係火到嚟,真想直接拍爛佢算鬼數,好彩嘅就係坐咗相熟嘅看更,認得你係住戶佢會自動開門俾你。

 

琴晚我去完超市買咗一大袋嘢好重啦,後面有個阿婆跟係尾,我一手抽住袋嘢,另一隻手就同個密碼鎖博鬥,用咗超過六、七次嘅嘗試先開到門,咁入到大堂等𨋢而婆婆恰巧同我係等同一部𨋢,佢就主動同我傾計,話如果係平時嘅看更會係一早開門,哩個新嚟嘅都唔開門俾我地,我地同看更嘅距離係近到肯定會聽到我地對話,哩個時候我選擇為個看更平反:「平時嗰個認得我地吖嘛,所以係認得我地而開門,哩個新嚟未認到我地,咁佢唔開門俾我地係好正常嘅~」

咁我就食住個勢鬧爆當選嘅建制派議員啦:「最衰就係XXX,佢當選咁多年佢有理過我地哩道咩?孤島咁呀!啲燈壞,水管斷,係選舉前已經係咁,到依家佢又當選有無理到?」

婆婆:「我又無諗到咁多喎,仲投咗俾佢。」

我:「你投咗俾佢?點解投俾佢呀?」

婆婆有點歉意:「我都唔識,都唔知要投俾邊個。」

我:「緊係投俾後生仔啦~XXX淨係識派下月曆嗰啲,無去理個區嘅問題㗎~」佢好似乖學生咁繼續專心聽我說教:「唔好講政治,淨係講生活,我地要咩啫?就係生活舒服咋嘛~」

佢笑住咁點點頭,我繼續口水多過浪花:「下屆如果佢個仔出嚟選都唔好投俾佢個仔呀!都唔會理我地嘅!」

本來我仲有好多嘢想講,但婆婆已經到佢樓層,我唯有同佢講再見,婆婆都好開心咁講再見。

 

好多老人家就係咁,唔識唔知見到後生就覺得佢無經驗做唔到嘢,但又唔細想以往生活質素持續無改善反而退步。

政治同民生掛勾,民生咪係同你生活掛勾囉~同老人家唔一定要講政治立場,就針對佢地生活嚟講,咁佢地會易明白好多,而且佢地好鍾意有後生願意同佢地傾計,講乜都會好開心,你肯真心關心佢地就會信晒你。

點解我知?因為我一直有做獨居長者探訪十幾年囉~希望大家多多關心同區老人,順便教佢地帶眼睇區議員,我嗰區就係慘輸俾哩啲老人票,就真係只差一點點,我地能夠改善到幾多個就幾多個,某層面會輸都因為我地以往無好好留意同關心佢地,俾建制派嘅蛇齋餅入到手。

唉~又要捱多四年廢城嘅生活啦…………

 

P.S:依家新進嘅民主派區議員同落選嘅社區主任都癲嘅,唔似泛民語言偽術得個講字,仲做到建制派咁派哩樣嗰樣,希望班老人家會因為佢地而醒啦。

 

 

作者:牛靈

牛靈
屯門開荒牛加盟成員

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202722
Date: 2020-01-12 03:46:22
Generated at: 2020-03-31 07:24:22
Permalink: https://www.vjmedia.com.hk/articles/2020/01/12/202722/我探訪獨居老人十幾年,我希望大家呢幾年都可以