【黃藍經濟戰】不如趁無乜客,改返好晒啲飲食業陋習先啦!

 

圖文不符

 

藍黃是政見,好食是良知,咁待客之道呢?

香港租金高昂,為左減低成本同埋增加收入,食肆都用好多方法,對此我本來都體諒。

但係部份飲食業嘅陋習,已經去到習非成是嘅狀態。

 

無廁所

食肆必須要喺有廁所嘅處所入面經營。咁講好似好複雜好官腔好奇怪,不如簡單啲,我去一間餐廳食野,同一地方入面,一定要有個廁所俾我去,呢個係食物及環境衛生署嘅發牌條件。

例如如果間食肆喺商場,商場就一定要有廁所。

咁向街嗰啲地鋪呢?可能同一個舖位有,可能轉角叫你攞鑰匙先有廁所,都計做同一個處所。

咁掉返轉講,乜係唔得?

例如食肆叫我過對面麥當勞借廁所,係唔得嘅。

例如食肆叫我去後面公園個公廁,係唔得嘅。

例如食肆叫我返屋企先痾,就更加唔得。

而家有啲食肆,通常細細間,我唔講藍黃啦,成日話自己「廁所壞左」。我都好好奇呀,咁你地啲員工去邊度解決架呢?「廁所壞左」,即係呢一刻你無廁所,即係呢一刻你非法經營,不如我叫食環來幫你睇睇個廁所乜事?我叫到佢地來個廁所就通返架啦。

有時make a trip 咁慕名而去幫襯一啲食肆,佢都唔洗話自己小店,我有眼睇,真係好細。啲嘢好食,侍應都nice,但當我食完,我都要make a trip 先返屋企,程巴士可能個幾鐘,身為男人,幾污糟嘅廁所其實都無咩所謂,你俾個方便我,有得去已經好人一生平安,你唔俾我去定個廁所,你當我小氣啦,我一定記撚住你,記一世。

 

未入座就叫我還檯

做零售服務都係有數得計,幾多錢租、幾大地方、幾多張檯、每個鐘毛利幾多、人工幾多、燈油火蠟幾多,同一晚入面,全間餐廳做到三輪客,一定比做一輪客賺得多,係咪?

首先恭喜你全間餐廳每一日每一刻都滿座,時時刻刻都十幾人排隊等入座,所以知客可以同我講,七點入座,八點半還檯,我朋友七點半先到?OK 呀,唔好入住囉,知客話今晚有球賽,一定滿。

旺角某大商場嘅某一層,全層都係酒吧食肆,有間比較巴閉,就係咁對我,我唔鍾意同人拗,既然係咁我去隔離嗰間,七點我坐住等朋友,最後飲飲食食到九點半,三個人買單九百,大商場燈火通明、無煙、廁所乾淨,當交租傾計fair enough。

臨走我唔順氣,走返去唔做我生意嗰間,well,得幾檯客咋啵?咁你當初咁串趕我走又係基於咩原因呢?

我梗係唔會特登走返去串個知客,我自己做生意都唔叻,交唔起咁貴租,無咩資格教人做生意。

我只係知道自己做客嗰陣,最怕就係被人當乞衣,好似我入來坐到你蝕本咁,我都唔好意思呀,咁我過主囉。

 

人人每日都要食飯,飲食業市道差究竟係一個乜嘢嘅經濟問題,我真係唔識答。

會唔會係其實有啲食肆根本就係經營不善呢?趁呢個目測個場真係少左人嘅時候,汰弱留強,重整下成個飲食業,都應該係一件好事。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202733
Date: 2020-01-13 00:10:09
Generated at: 2020-08-12 23:56:10
Permalink: https://www.vjmedia.com.hk/articles/2020/01/13/202733/【黃藍經濟戰】不如趁無乜客,改返好晒啲飲食業