你鍾意睇黃子華咪去睇,點解要屈佢係黃?

Dayo Wong.jpg
Sminleung自己的作品, CC BY-SA 3.0, 連結

 

其實我一直都覺得,你要去定義黃子華係黃定藍,其實好ON9,因為其實黃子華的政治取態,其實就係好多上一輩的香港人。

你話佢藍咩?佢可以係架。由佢同原島大地講 #釣魚台是中国的,到佢形容親中国,都係用「母子關係」、「阿爺」,到佢金盆啷口,佢話自己喺飯局講北話畀人歧視,其實你好明顯睇得出,佢其實覺得自己根本就係個中国人。

你話佢黃咩?佢又可以係架。秋前算賬咁明顯唔講,佢2012年有抽梁振英水,2014年有讚過金鐘佔領區,有講過李旺陽腳踏實地上吊死,有講過國歌法。你話佢撐共咩?其實又唔見得。

講到尾,佢其實就好似五月天嗰種「非藍非綠非獨」。但呢種觀念唔熟悉咩?

佢唔係撐警,佢都覺得七警打人係唔啱,都覺得「喂你唔駛咁都放催淚彈嘛?」,但同時佢都覺得「其實啲警察都好大壓力架」;
佢唔係撐共,佢都覺得中共唔好。六四、李旺陽佢都有出聲,但但係同時佢覺得,中央係「阿爺」,覺得自己點都係個中国人;
佢支持你和平表達訴求,佢雖然覺得「占中」無用(「用愛與和平佔領中環,你要佔領人哋個女,你都唔可以咁樂觀啦,剩係得呢兩樣嘢。」),但同時都覺得「暴力都係唔好」(2014年叫人返金鐘、到後嚟的《棟篤神探》 完全表現到佢覺得「年輕人太偏激容易被煽動)。

你可能會覺得「屌你老味又係中立撚買兩邊垃撚圾」,喂咁但係你再唔鐘意都好,呢個就係普遍香港人的觀念同價值,再講白啲,其實就係上一輩人的價值觀呀。

點解黃子華無公開就今次的事表態?其實都唔難理解。對上一輩的人嚟講,「政治最好都係唔好講咁多,要講,打下擦邊球咪算」。而其實你都唔難睇得出黃子華自從升上神枱之後其實佢係收歛咗好多。

一開始的「娛樂圈血肉史」,其實就真係一丁友上台齋講,當時的黃子華還有一種「年少氣盛」的狂氣,到後來開始走紅,開始會化妝會SET頭,開始有埋舞台燈光音樂效果,黃子華那種「懷才不遇輸無可輸」的傲慢就慢慢消失了;由一開始主力講政治,到97後開始集中講人性、講男女關係、講買唔起樓、講網絡生態,其實呢啲都係好貼地且安全的話題。講得白啲,佢一個SHOW 120 分鐘,其實講政治的加起嚟都不過係10分鐘左右而已,何來「大半世反共」?

我哋無可能迫任何人去表態。無錯,「喺大是大非的面前係無中立可言」,但愛就係選擇,畢竟每個人要承擔的風險都唔同。咁既然黃子華都無表過態,咁你哋又何必去 Assume 佢係支持定反對?

就好似我講黃色經濟圈一樣,其實一切都只係排緊 Priority, 新年要選睇咩戲的話,王晶呢啲狗都唔屌,其他的,你覺得OK,咪去睇囉,又何必講到「一定要撐」呢?

作者:小妤

生平無大志,只想吃喝玩樂的港女,卻身不由己地關心着政治

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202742
Date: 2020-01-13 13:01:51
Generated at: 2020-05-26 14:10:18
Permalink: https://www.vjmedia.com.hk/articles/2020/01/13/202742/你鍾意睇黃子華咪去睇,點解要屈佢係黃?