【外賣仔日記】而家做速遞乜貨都要送,包括假 __ !

 

 

做咗一張貨物速遞嘅訂單,收件嗰個人問咗條問題,我覺得我自己答得好好。

接到張貨物速遞訂單,個寄件人係一間性用品商店嚟,送貨地址係位於一幢超級高級嘅商業大廈入面嘅。性用品商店要送貨嘅貨物,個包裝係一定會係乜嘢logo,標示都無嘅,目的係避免任何一方有任何尷尬。咁本身對我嚟講只要貨物係合法物品,或者啲比較特別嘅貨,好似性用品商店啲貨,但係會包裝到無任何標示,唔會令我拎住件貨響街個陣受到任何歧異目光嘅話,我都無咩感覺嘅。

咁個陣我收咗件貨就出發去個送貨地址啦,呢個地址係一幢超級高級嘅商業大廈,當然啲保安要求都係超高級啦。當我去到大廈嘅時候,就諗住去大堂接待處登記上去送貨。

接待處保安:「你嘅貨要過X 光機先」

我:「ok」

性玩具姐,又唔係炸彈,佢唔進一步問我嘢應該無咩尷尬事嘅。

接待處保安:「ok,麻煩你呢邊上去接待處同佢哋講話嚟送貨啦」

最後安檢成功,然後我就跟指示上到去另一個接待處,今次係一間公司嘅接待處,唔係屬於大廈嘅。

接待處有兩個師奶級嘅阿姐坐咗響度

我:「嚟送貨架,樓下保安叫我上嚟」

接待處師奶 A:「送俾邊個架?」

我:「俾阿邊個邊個架」

接待處師奶A:「好呀,你等等啊,麻煩登記先啦」

咁話到明係超高級商業大廈,呢啲手續係咁做就正常啦。

做完登記手續之後

接待處師奶A:「件貨咩嚟架?」

我心諗,性玩具嚟架,應該幾好用嘅

當然呢個講法唔可以出口講俾個師奶聽啦

我(一臉無知咁講):「er,唔知喎,我響間玩具店攞呢件貨架,攞嗰陣已經包裝到咁,唔知咩嚟」

接待處師奶A 同師奶 B 講:「應該係買俾佢個仔玩嘅」

師奶,你認真咁諗?

跟住師奶B就打咗個電話,然後就話

接待處師奶 B:「先生,你響嗰邊啲梳化坐住先啦,佢秘書落緊嚟」

然後就見到佢秘書,俾咗件貨個秘書,我就走咗啦。

阿師奶,真係比佢個仔玩?幾好呀,細細個屋企就教性教育。

佢話俾佢個仔個一刻,我心入面幾想同個師奶講話「可能係俾佢老婆架」,不過呢啲諗下好啦。

 

專題:【外賣仔日記】

 

作者:外賣仔

外賣仔

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202834
Date: 2020-01-18 04:28:35
Generated at: 2020-08-15 21:20:00
Permalink: https://www.vjmedia.com.hk/articles/2020/01/18/202834/【外賣仔日記】而家做速遞乜貨都要送,包括假-__