【嚴肅文】我真係無諗過,夜總會個果盤係會擺香印!

 

 

古語有云,去夜總會千期唔好貪果盤,意思係話,做事目標要明確,交際就交際(?),傾計就傾計(?!),你貪第二啲無關痛癢嘅嘢,係嘥自己時間。

去得呢啲地方,梗係留意啲……公關小姐……是咪好傾有無內涵,收費係咪合理,廁所係咪乾淨(???),斷唔會話一心入去,做食家寫食評,「杯82年嘅拿飛好有單寧」云云。

估唔到嘅係,我今日去左間夜總會,個果盤擺香印……

 

(隻手好瘦,唔係我隻手)

 

當然,以上只係比喻。夜總會呢啲咁落伍嘅嘢,你話請我去,我都唔知邊度有。

Anyway,如果話去貓cafe,主軸係去撚貓,而撚貓又可類比為去一個以貓為主題嘅夜總會玩貓小姐,咁去貓cafe,應該係品評一下佢地啲貓得唔得意,痴唔痴人,會唔會跳上張檯搶嘢食之類。

但今日去完一間cafe 玩貓小姐(同埋貓仔),我對佢地啲嘢食都非常咁欣賞。

 

蛋餅,我一聽到侍應姐姐講,我就要話要點,因為呢類手工嘢,係食一啖就可以直接判一間餐廳生死。

果然無令我失望,滑得來實淨,即係熟得啱啱好。

 

雜菌慢煮牛肉意粉,足料唔欺場,牛肉夠淰。

 

炸雞翼其實有三隻,不過我吉走一隻先記得影相

隻碟貓形好得意

 

酒樓都未必食到嘅燉雪梨,個梨下面好多粒龍眼肉同杞子

 

從餐牌已經睇得出,佢地對自己嘅嘢食係好有信心。

慢煮牛肉、燉雪梨,都係要煮定嘅嘢,但係香港地,係無可能要個客坐喺度等你個雪梨燉三個鐘,即係一定係燉定。

呢啲心機嘢,今日賣唔去,就要拿去堆填,我諗佢地啲貓唔識食呢啲。

貓cafe 夠膽整燉雪梨,又係我一聽到佢話有,我就要點來食。

 

坐我對面嗰個就對啲貓比較有興趣,我自己就……

 

隻貓對我條腰帶比較有興趣,對面嗰個安慰我,話貓肯聞我陣味即係唔憎我,多謝

 

埋單兩個人三百蚊,我地就比較唔客氣,坐足兩個鐘。

留意返,嘢飲我就無咩特別鍾唔鍾意。同埋臨走無試下個廁所乾唔乾淨。

再留意返,呢間係會所,只招待會員,去到嘅時候侍應會提醒你要做一個簡單嘅入會手續。

非業配,覺得好唔好食,有無貓坐你大髀,都唔好找我晦氣,感謝。

 

 

作者:容樂其

我覺得總編輯都有得出文係常識囉!

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202892
Date: 2020-01-19 23:25:02
Generated at: 2020-02-19 03:31:12
Permalink: https://www.vjmedia.com.hk/articles/2020/01/19/202892/【嚴肅文】我真係無諗過,夜總會個果盤係會擺香