叫我只幫襯黃店,不如叫我死左去算

 

見到黃子華乜代宗師條trailer,我係真係睇到想喊同埋另轉面唔忍心睇。咁勉強真係好咩?

Kian Lee 發佈於 2020年1月20日星期一

 

「黃色經濟圈」,一講到經濟,其實就係選擇同取捨。正正資源有限(即係錢銀、時間呢類野),而又有無窮無盡嘅慾望,所以我哋就要作岀選擇,選取對我哋價值最高嘅野,捨棄價值相對無咁高嘅嘢。

本來建立「黃色經濟圈」就係希望香港人喺作岀選擇嘅時候,唔好單單以價錢、時間等因素作考慮,仲要加入政治立場。啱,良知係有價嘅。我亦支持喺某類行業(特別係非必需品、奢侈品;又或者選擇眾多嘅行業)上加以支持立場相近嘅生產者。

問題係,黃絲一走火入魔,無視現實環境,好嘅嘢都會玩撚完。古有泛民、左膠企喺「道德高地」,今有部分黃絲登上「黃色高地」,真夠相映成趣。

 

首先,所謂「黃色經濟圈」,只能盡做,切勿要以生活、消費都要100%去黃店嘅心態去管束自己同其他人。一來係無可能,二來只會搞到自己以及同路人好辛苦。場仗仲有排打,唔好因為鑽牛角尖而耗盡自己嘅精力。我舉幾個例子,你就會明:

一、生活點都要用電,right?問題係,不論中電定港燈,都有撐過反送中、高調支持過年輕人咩?如果誠哥講幾句中肯少少嘅嘢就等於係自己人,咁好多「中立」、「無岀聲」嘅KOL、藝人都唔應該被杯葛喎。咁唔幫襯中電、港燈,係咪要自己喺天台起個太陽能板去發電先得呢?

二、水呢?東江水嚟嘅喂,仲要經過特衰政府嘅水務署去處理,唔係仲要拎嚟用嘛?

Ok,我唔介意貴,咁買水沖涼囉。但又有邊間蒸餾水、礦泉水生產商係黃?又好似無喎。咁唔飲水囉……

三、「我已經半年無坐黨鐵啦!」嘩好叻叻豬喎,不過其實九巴、龍運嘅新鴻基,又或者新巴、城巴嘅新世界,都撐警撐政府架喎。至於小巴,兩大小巴公司馬亞木同進智公交都係藍架喎,仲未計紅小嘅潮聯添。咁行路咪得囉!啱丫,不過你著住嘅Nike、Adidas都喺中國設廠,呢半年又無岀過聲,咁應該都係藍吧?哦,咁我唯有赤腳行街囉哈哈哈。

有好多行業,因為產業鏈或者資源問題,導致出現壟斷嘅情況或者得好少生產者,尤以公共事業為甚。如果我哋仲係咁堅持一定要揀黃店,咁我哋應該變返做原始人咁去生活就差唔多啦。

所以,都係果句,盡做啦,同埋揀無咁藍嘅就已經好好,畢竟世事也難求完美,又何必逼自己同其他人咁辛苦去左揀右揀呢?

 

其次,家家有本難念的經。揀黃店,係自己嘅選擇,千祈唔好强逼同路人去跟從自己果套嚟行。每個人嘅背景都唔同,你覺得好易做到嘅嘢,可能對其他人嚟講,係好難嘅一件事。

例如有朋友住近黨鐵站,樓下嘅巴士又慢又會經常遇到塞車,咁唔通佢日日返工收工都要坐2個鐘巴士咩?

又例如朋友屋企樓下附近都係藍色食肆,得一間係黃色,但黃色那間唔好食嘅同時,又要經常大排長龍。咁對於一個嘴刁而time cost又高嘅人來講,又係咪一定次次都要排隊去幫襯黃店,先算係同路人呢?

 

最後,同示威、集會現場一樣,唔好捉鬼。一來真黃定偽黃,並唔係由你說了算(你估自己係上帝咩?);二來好多嘢成唔成功,都係睇風氣(又或者叫民意,事旦啦)。咁既然有店舖幫你推銷政治理念,何樂而不為呢?又駛鬼理佢真黃定偽黃呢?(就好似裝修一樣,有疑似差佬幫手裝修,減輕手足壓力,唔係更好咩?)

一定會有人講,咁樣俾偽黃呃飯食,咪對真黃唔公平囉?嗱,做生意係要有良知,但本身服務質素先係最重要。如果真黃本身服務夠好,又駛乜驚無客?

你會唔會因為聽到某食肆大叫「香港獨立」而去食屎都不如嘅垃圾?至少我就唔會因為Tommy仔嘅政治立場而聽佢嘅歌啦,因為真係好撚難聽。

 

凡事一走火入魔,就注定件事必然會以失敗告終,希望黃色經濟圈或者呢場革命嘅支持者,可以多加思考、分析、警惕一下,而唔係終日為了應唔應該去睇黃子華,而拗足N個星期。覺得佢套戲好睇,又或者覺得佢係黃嘅,咪去捧場囉;覺得佢同一般電影人無異,又騎場嘅,咪唔好睇囉。It is just a personal choice.

 

作者:達時製作 (On Time Production)

不平則鳴,乃個人責任。敢言,需要付出代價。但這代價,比社會因為只得一種聲音而步向滅亡,所帶來的代價,明顯小得多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202921
Date: 2020-01-21 05:53:47
Generated at: 2020-07-11 22:25:04
Permalink: https://www.vjmedia.com.hk/articles/2020/01/21/202921/叫我只幫襯黃店,不如叫我死左去算