【#903國民教育 實況劇場】你這剎那在何方

記得中學時代,都很會買商台的廣播劇劇本。希望今年,有機會把之前寫過的廣播劇都收錄下來,變成一些印刷本給大家,當成是……一個紀念吧?

 

多謝colin,由2011年你買早餐給我們開始,一直都支持我。我說要做什麼,你都幫忙。他就是阿基的聲音。

 

#903國民教育 實況劇場

你這剎那在何方?
本故事乃真人真事改編,如有雷同,實屬不幸。

(獨白)健:終於,我都返去搵返呢個朋友。一個,我本來一個月會見一次既朋友。最後,佢既選擇,都係搵返一個佢地以前應該有既生活,仲有佢地認為合理既幸福。

你仲記唔記得佢地呀?

我咪有一對朋友,有一個,有一個唔三唔四,麻麻煩煩既老豆,六十幾歲先係大陸搵個後母生左個細路,叫個廿幾歲既仔照顧個妹; 另一個做冇家底冇父幹冇屋企,然後做保險做到有d錢仔既?你仲記唔記得,呢兩個普通真‧香港人既故仔呀?

~~~~~~~~~~~~~~~~~~

2014年,雨傘果陣,我有兩個朋友係所謂既前線。果一排,佢面對自己既事,仲有好多香港人既事,佢都攬上身。

呢幾年,我睇住呢個朋友,分分合合,睇住佢果陣晚晚係金鐘訓,訓完一晚又一晚。之後,大家睇住事情發生到而家。佢而家,終於都,去左……台南。

(cafe,開門聲~)

果然,呢間cafe,係聽緊廣東歌既。

阿基的cafe,坐車坐10分鐘,就會到這個地方。至於在什麼地方,我是不會說的。

 

(~楊千嬅~ 來生舞……~)

健:喂。
c:喂。你終於都黎啦。
健:咩呀,講到我好似唔黎搵你咁。你好期待我咩?
c:唔係,我見你成日都係台北,都唔黎搵下我。
健:我驚你忙丫嘛。
c:其實有幾忙丫。係呢度,唔會好忙既。大部份時間我都係睇下書,起身開鋪,諗下去邊,招呼下朋友咁。咁就一日架啦。
健:我可唔可以理解為,退休呀?
c:拿拿拿,唔係。退休呢,多數都係會係個facebook 度係咁留言,話自己好愛香港又唔返去既。我呢d,做左逃兵既人,係外國,我知道多口冇用既。你見我呢度賣既野,都係你介紹既。
健:又關我事?
c:你咪做左隻你自己味道既咖啡包既?果隻味好受歡迎呀。貴係貴d,剩係成本都成10蚊一杯。但真係沖出黎完全唔同feel。我用手沖,真係冇咩技巧都呃到人。
健:係鬼,你叻係因為你仲識整意粉同其他野之嘛。點解你會識整呢d野既呢?
c:車,其實你知架?要有少少生意,又唔好咁辛苦自己,最緊要係d野,有少少好食,之後影相有少少好睇,咁就得架啦。而家最受歡迎果d飲品,都唔係使技巧既,你改個好既名就得架啦。
健:即係好似呢杯咁呀?藍人不壞……(國語)你因住d韓粉唔肯過你呀。
c:我呢度就擺明係黃架啦。係呢度做香港既生意,後生仔既鋪頭,點都係做黃店架。你做黃店一定冇事既。
健:會有咩事?
c:其實,藍絲消費,唔會去我地果度。我地呢d 外人開既咖啡店,都係等大家開開心心就ok。而家你睇下?(喵聲~)
健:喂!好得意。哎唷~~~~ 叫咩名呀佢。
c:奶茶。
健:哈哈哈哈哈,你咪又係唔捨得。
c:呢個地方,都有珍珠奶茶既。佢叫鴛鴦,可能就唔捨得啦。
健:奶茶~ yo yo yo~
c:佢真係成隻狗咁。
健:狗?
c:好痴人。我都冇諗過。
健:有冇人會特登入黎玩貓架?
C:佢肯畀人玩果陣咪畀人玩囉。佢唔肯我地都迫唔到佢架啦。
健:其實你屋企有需要,有兩隻貓咩?
c:喂,你又講衰野。
健:咁係丫嘛。阿鋒呢?
c:呢兩日出左去,去左做其他野。
健:搞咩?
c:佢最近幫d香港人睇下點樣搵地方開d小生意。始終,都有d人要搵工。
健:拿拿拿,仲唔畀我捉到你。你咪又係……
c:喂。
健:拿。
c:我上次問你幫手果d錢呢,我幫佢地交晒學費架啦。多謝長腿叔叔。
健:閘住。咩長腿叔叔。長腿叔叔最後食埋個女仔架。
c:你估你唔想。
健:真心,我使做呢d?我有冇問你拎個相?都係信你,同埋我肯定你有錢過我,你都要開口,我咪咩囉。反正,你係我基金經理,我有幾多錢,你知架。
c:係。總之……多謝你啦。
健:痴線啦。做咩事咁。我地識左20年啦。你知唔知,呢個世界,真係冇咩朋友,可以真係做到20年架。我地1999年識架,你記唔記得呀?
c:係。果陣我仲讀緊書。哈哈哈。
健:果陣,你仲好中意畫畫添。年年生日,你都送張畫畀我。我都全部儲起晒。有一張,寫住 you will never walk alone。
c:你仲記得。
健:好多野我都記得。
c:你唔好放上網添呀。一陣d人又鬧你話「你乘機幫人講『同行』,we connect 呀」。
健:其實你幾時學埋晒d 咁既野既呢?以前,我識你果陣唔係咁架~ (港女聲)
c:你識我果陣十幾歲咋。
健:okok。
c:喂,飲唔飲野。
健:我坐邊度都ok?
c:你坐我地呢邊啦,呢個area 我地既。客就坐出面少少,有客我地會睇到架啦。招呼一陣就ok。
健:我拎左d咖啡包黎,不如我沖咖啡畀你,你整野畀我食?
c:你食得咩?
健:咩都食得。
c:我睇你facebook d 相呢,你唔似係食得野架啵。你排咁既腹肌。
健:係咪笑我?你一直以黎d 腹肌冇走過就真。
c:我呢d,叫難民腹肌,我瘦,咪會有囉。我整d野你食啦。
健:多謝。

(歌~過場~)
~~~~~~~~~~~~~~

 

這個地方有最好吃的滷豆腐,想吃的話,在這兒:https://www.patreon.com/posts/33196455

 

c:(獨白)係呢度都半年啦。開一間cafe,好似係好多人既想法,好多人以為,一日剩係做幾個客,就可以搞掂晒所有問題。尤其是,當你開始同朋友道別既時候,你就會發現,其實好多香港人,好多你以為係朋友既人,當話你要離開香港既時候,佢地都會畀好多唔知點解要畀你聽既說話畀你聽既。

女聲:嘩,你就好啦。唔使做啦。
男聲:哦?你都移民呀。
女聲:你就好啦。點搞架?不過我移民就唔會去台灣啦。點都去d講英文既地方啦。見到講中文既人就憎啦。

c:你聽到既時候,第一下,你就會覺得,哦?我移民,我話你知,我來見你,食一個飯,係因為我地想過一d時間。或者我地以後,可能唔會有咁多機會見,但後來,原來你會發現,你決定要見果d人,可能只係一d 你識既人,而唔係朋友。

So:都話你會攰架啦。果d人你唔係走,你都唔會見架啦(電話聲~)
c:咁,有d野都會唔捨得既。
so:ok既,長情係你最大既好。
c:得。我知你想講咩。
So:好在你冇揀錯。
c:你又知?
so:唔知架,一齊努力囉。唯有。
c:你同我講一齊。哈哈哈。你竟然同我講一齊。
so:係。係一齊。
c:搞埋d野先。仲有野未執。原來我儲埋好多舊既野。
so:我知。你連小學果張成績表同書單你都會keep住。
c:果d係記憶黎。
so:真係應該記既,唔使d野放係度,都會提住你既。

c:的確,阿峰係一個好叻既人。一個人,覺得第二個人叻,有時候唔係因為佢搵幾多錢或者做幾多好事。而係,佢究竟有冇真係明白你想點,或者係比你行快幾步。有時,唔使好多,幾步就夠。
正如,有一晚。我地係屋企,我沖完涼,佢幫我抹頭,我問佢:

c:就咁走左去,係咪好唔負責任。佢竟然答我……

so:識得做自己識做既事,做到自己想做既野,顧左自己先。呢個我覺得係我呢十年學到既野。
c:我開始明白點解小學果陣,一個一個同學要移民。
so:你夠自信既話,去到邊度,邊度都係你屋企。

的確,我既睇相師傅,亦都係咁講既。

玲玲姐:(電話聲我會請她幫忙錄架啦~)你條命呢,晚年有運,你而家都未40。你48至56先係行大運。之後你就會安享晚年,你唔會愁錢架,d錢係會追住你既。你去邊都可以生存到,只要你畀d心機做野,仲有去到一個新地方,去搵果度既人傾計,識朋友,你人緣好,咩人都可以幫到你既。

c:我既離開,係咪真係幫到自己,我唔敢講。但我都唔知點解,我內心深處,總有一把聲音,話畀我知要盡力。

~~~~~~~歌~ ~~~~~~~~~~~

健:嘩。你咁勁既你?我睇左半集博恩,你就整左4碟野出黎。喂一個full course黎架啵。
c:我其實每年都有聽你年尾做節目,我好想做果個,去到間咖啡店咩都有既餐廳。有時候有mulled wine,有時就有羊肉,有時就有咖哩。
健:講個秘密你聽?
c:係?點呢?
健:果間咖啡店,真係存在。有時候我上到佢,佢會有一支2008年南法一d細酒莊既紅酒。有時候就有唔知佐敦邊間唐餅店賣既馬仔,有時候仲要整臘味飯。只要你放輕生活既腳步,或者對平時你既生活有少少要求,加上你有少少錢。香港,其實係一個好方便,好叻既地方。佢好似一個無掩雞籠咁。咩都入到黎。所以,競爭好大。因為競爭大,好多香港人其實好有見識,見過好多世面。

c:的確,相對台灣人,香港人係知道更多外國既事既。
健:但台灣人只要向住自己中心轉,都好似可以活得幾好咁。
c:其實都唔係咁簡單。好似我地開cafe咁。剩係位置,飲食文化,食材,法規,心態,全部都要調整。
健:嘩你邊度變隻雞出黎。
c:隔離屋阿tracy畀我地架。
健:tracy?咁潮既。
c:冇,有一日,佢走黎同我講。

tracy(英姐):阿後生仔呀,我可唔可以同你傾幾句呀?

c:好呀。咩事呀。
英:我個仔呢,佢係……

Sound effect~

健:哦?哈哈哈 ,你變左心事垃圾桶呀?點解你去到邊度,個角度都冇變既?
c:我鬼知咩。總之,我聽左佢個佢個仔好似同個男仔一齊左,佢就問我會唔會好危險,會唔會生aids 呢樣果樣之後,我好似令佢安心左d。於是佢得閒就會整下雞呀,果d粿呀(蛇quee 個quee)畀我地囉。幾好食架。阿媽,係有阿媽既功能既。
健:你依然係你。
c:欸,又唔係啵。我開始習慣呢個世界,真係有好多唔同既人。要堅持,一d都唔容易。
健:又感懷身世?
c:喂食左先丫你,呢個係洋蔥湯。之後呢,就有個三星蔥豬利卷,呢個係泡菜山豬肉蓋飯。仲有豆腐雪糕同埋生果,夠唔夠食?
健:夠啦。我真係食兩啖架咋而家。
c:好心你啦。你最瘦果陣,真係成隻人乾咁。而家咪幾好。有少少肉地。始終太瘦都係會唔精神。
健:其實,現實世界同網路世界,真係好唔同架。係網路,就話我最瘦果陣最勁,三千日唔留言既人都會同你講你好勁話要見下你。係現實世界一見到我,有d就關心我係咪病,有d就話點解你瘦得咁快。我都唔知點解。或者真係一啖氣。以前d人,觀點講唔過你,就屈你肥。而家d人,話唔到你肥就點都要屈你。鬧你之餘仲要讚下你咁,一係話我勤力,一係話我高智慧高技巧,你話好唔好笑?
c:為左人生活,你開心咩?
健:唔一定好開心,但至少我冇唔開心先。睇住d人氣急敗壞,我好有快感。鬧我?anyway,我活得舒服自在就得。

健:我知道,台灣比香港大,好多野好似比較單純。睇住阿基而家個樣,笑多左,真心好似輕鬆左,但內心好似有少少介意,少少野放唔低,點都好似唔知點咁。

c:當時本來諗住係台北開既。你知啦,我唔識開車,係台南高雄果d會麻煩。而家我叻呀,黎左一陣,考左個機車牌。有機車,自己就好似大學生。
健:都係既。真係只係大學生先開綿羊仔。
c:但台北開咖啡店,競爭真係太大。尤其是你如果係香港人,唔知佢地文化,就真係有d難搞。好似台北咁計,一個簡單松山區:小巨蛋、饒河、八德、菸廠做既生意,已經好唔同,唔似香港,你係中環同柴灣同旺角大埔賣同一款野,都ok。香港人要既,係到處一樣。係安全感。但台北,就要有特色。可以接受多d特色。

健:都係既。所以香港人中意去台北,因為真係有唔同既設計。
c:飲食文化呢?台灣既飲食文化,同香港又唔一樣,咖啡要做得比香港好好好好好多,先會站得住腳。呢樣都要多謝你。唔係你介紹d豆同個烘焙師畀我,我都未必做到呢樣野。

健:咁你一路係香港都有學開,先上手jei。
c:唔係呀,唔係你個陶焙機,我d豆點會咁香?而家日日係鋪頭炒豆,都有街坊過黎話要飲咖啡,話我d啡好過台北果d。
健:咁最後都係你自己炒既。我冇幫你做埋架。
c:咖啡我搞得掂,但好多人知我係香港人就想我做奶茶。但係你知唔知,係台灣,買黃檸好貴,茶葉入口好難,台灣係冇老抽呢樣野既,所以乾炒牛河都唔使諗。蛋撻呢?台灣人同你講要硬皮,酥皮會食到成口都係,唔好食。仲有,佢地食蛋撻要凍食既。剩係呢樣我都唔明。
健:咁我地讀文化既人都成日會講一句「入鄉隨俗」既。
c:有一樣野係好既。佢地做食,好簡單,牌照幾乎唔使都得。同香港唔同,又咩大牌,細牌,賣飯就大牌,賣麵就小食牌。呢d咁蠢既法例,擺明就係為左功能組別而設架啦。唯一有比較麻煩既係,垃圾費有d貴。相對其他開銷,呢樣係最煩架啦。
健:只要你唔諗賺大錢係ok既。
c:同埋唔可以用香港人果套去做野囉。香港人做生意,成日諗要做大做大,做大左,就可以唔使做。呢度既人,好得意,佢地好少諗唔使做,佢地會諗,第時要做想做既野。六、七十歲做緊野既人,大有人在。唔同香港人。香港人諗住賣左層樓,係呢度做盤小生意,然後簡簡單單過下小日子,因為佢地層樓太貴,呢度錢就四倍使法,所以先至唔使做jei。
健:咪同你一樣。出份基金,然後就係度扮下做野。
c:要實踐理想,首先要有錢。你睇下?香港個個歌手逐個跪低,都係因為錢之嘛。你要賺錢,就要預左係咁。你唔使賺錢囉,講野都大聲d囉。
健:你係呢度都睇呢d電視。
c:你知唔知呢,我一年用幾多data? 哈哈哈,佢地打黎問我使唔使幫我地間鋪「鋪一」條寬頻,係因為我需要睇盒子,睇下香港新聞同直播咋。不過有時都唔播得咁新聞,畀d客睇少少就算。反正佢地都唔想知。佢地只係想同你講,香港好像很慘啊。「事情很大條」(國語~)就夠。
健:嘩你個山豬肉丼,咁好食既?
c:我睇姜食堂,跟阿白種元師傅學架。哈哈哈。佢都係將d野撈埋一齊之嘛。整韓國野就最易,咩都濃油赤醬,加少少營就話好有層次架啦。
健:我估你以前唔會有諗過,自己會將呢份技能變成生意。
c:首先,呢盤真係唔係生意。對我黎講,只係興趣。好似d街坊入黎,開開心心,有d唔同既野食下,傾下計又一日。我都高興架。遇上唔好既客,咪招呼少d,等佢地唔黎囉。好既,咪加下面書,睇下大家生活。知道佢like咩新聞,唔好開口岌著利就得架啦。
健:呢d都係你長處黎既。
c:總之,香港人有一套,係好好用。只要小心用,係邊度都會生活到。只不過係,我地要唔要放低以前果套?
健:你放得低咩?活左係度三十幾年,朋友同屋企……sorry。
c :傻啦。我成日都同你講果d 黑色笑話架啦。
健:……?
c:咩呀,父親節果陣,阿鄺仔祝人父親節快樂,我就係佢果度留言話,你就好啦,有老豆,我都未見過佢。我估嚇到鄺仔死啦。
健:有d咁既事?你邊嚇到佢丫,佢d咁既狐狸先生。
c:唔係放唔低,而係唔識處理jei。2014年果陣,我地做左幾多野,你知架。我地唔周圍講,唔去從政,唔用黎搵錢,係因為知道自己識唔識做果d野。做人,知所進退,都好緊要。香港同台灣唔同,政治人個個都要扮白兔,有d人性既都會選唔到。唔會搞得掂。
~~~~~歌~

c:我將你d行李拎左上房啦。你今日唔好走啦。
健:okok……你使唔使開鋪呀?
c:wifi 係呢個。
健:momongchochung?
c:阿峰改架。
健:你賴佢丫你。你話老土佢都聽你講架啦。
c:我覺得呢4個字好好丫。
健:係既。

(獨白)呢間鋪,好得意。冇咩工業風呀,現代風呀果d,只係一d 好有趣既家俱,好似返左八十年代咁。果d野係細個果陣見既。16bit,saturn 遊戲機,我估係真古董,係阿基細個既時候玩既野啦?估唔到而家仲玩得。d客入黎,打一陣機,食件蛋糕或者意粉,阿基就問下佢地,話今日有d chef special 要唔要試下。一時就係炒河粉,一時就係泰式炒麵。總之簡簡單單,好似去左朋友屋企,朋友整d野你食咁。呢個,就係佢既理想?

~~~
c:謝謝~(國語)
健:辛苦你囉(國語)
c:唔該你就真。你黎玩,你幫我沖咖啡畀d客。
健:車,有幾難丫。你d豆炒完d衣去得咁清,磨完即沖,只要d雜味唔沖出黎都唔會太難飲架啦。其他果d 咩磅數呀,水量呀果堆野,都係做出黎畀你睇既jei。
c:都係你沖果d香d。點解既呢?
健:日日沖就架啦。有手沖壺就ok。更何況,今日沖左10杯之嘛。係香港一個鐘都唔只啦。
c:食野囉。
健:唔好煮啦。
c:出去食啦?反正去夜市你都未去過。
健:邊個夜市?
c:大東夜市丫。你唔食牛,有個山豬肉同埋有個魷魚都ok架。
健:你都黎左咁耐啦,點解你仲可以係遊客mode既?我識既台灣人唔會好恨去夜市架……
c:始終都好似幾得意咁。同埋,真係有幾可去。咪又係有朋友係香港黎先會去?
健:你唔攰咩?
c:ok啦,點都冇係香港咁攰。我而家日日都訓到八、九個鐘。好開心。
健:好在頭先冇拎呢支野出黎。你飲左咪開唔到機車?
c:點解你會帶埋高樑係身邊既?
健:er……你唔知冬瓜茶加高樑好好飲架咩?
C:下?
健:仲有,知唔知點解杯咖啡咁好用?
c:下?唔係呀,咁重本?咁蝕晒啵。
健:一次半次,咪當我係度先有既special囉。
c:有一次呢,我呢,唔小心呢,將一小杯威士忌倒左入杯咖啡度,畀左個客飲,個客問咩黎,話咁好飲,我就話畀佢知,加左魔法液,所以就咁好飲……
健:(笑~)痴線架你,你唔好話你加左家明的味道?
c:的確,要魔法出現,首先你要有空間。
健:好多魔法,真係唔係果個地方,係唔會發生既。

起歌~

(夜市聲~)

健:嘩。呢度好熱鬧。原來台南咁多人既。
c:係你唔開車jei。開車其實好方便,仲有好多野食。好似你都識果個吉克,佢都有拍過台南好多小食架。
健:其實黎黎去去都係果d野。台灣夜市,都係你果輪興d咩,就會有d咩。
c:其實度度都係咁。好似呢排,真係好多人講移民台灣。十幾年前,你如果話你移民去台灣,我肯定好多人會話你傻,但而家呢?冇所謂咁。你話呢個地方係咪進步左?
健:咁梗係既。
c:最搞笑既係,好多移民黎台灣既香港人呢,佢地好得意。佢地呢,會forward 好多警察係好人果d 新聞架。總之咩幫咩出聲果d呢,佢地就會睇晒既。暴徒一定係曱由,仲要加個死字係前面。又話d細路因為有錢搵先去,扔一舊磚六百佢地認真架。
健:哈哈哈,所以你如果話支持難民法,你估台灣會點?剩係中國整一堆難民畀你,迫你台灣收留你都死。
c:我而家明呢,果d 海外華人係諗咩架。好似我有d朋友,帶左d 小朋友去澳洲,仲關心香港多過我,日日睇直播。我都唔知點解,佢地會睇到d 直播係分成八格十格既。話唔同網媒去唔同地方,都要睇啵。仲要呢,佢地中午食飯果陣 ,會聽晴朗架。有時聽到你就同我講。
健:有咩好講?
c:冇呀,話我有聽你個friend 果類野囉。佢地知我同你係朋友,都會問好多問題架。有一個就話:嘩,你識佢架?佢去探你架?嘩,佢難唔難搞架?
健:咁你有冇答:冇搞過,唔知,咁?
c:痴線。我有時都唔明點解佢地會知我同你熟到可以去旅行。次次我地有影相,我地都冇放上網。
健:有好多野都唔係真係要知既。或者facebook 我地有共同朋友啦。
c:d海外華人呢,都好想知道你地d野架。商台佢地日日聽,仲要睇直播多過我。我都冇咁神心日日聽香港既電台啦。
健:有你出現果陣你咪聽囉。
c:不過又講真啵,走左之後係聽多左既。有時候想聽下廣東話咪聽下你呀,光明頂呀咁囉。以前都冇聽咁多陶傑。
健:因為你而家唔係現實丫嘛。住係你個現實入面既人,點會想知道現實既人講咩。

(line 聲~)
s:食左野未?我等緊高鐵。
c:使唔使我接你?
s:唔使啦,我有騎車出去。
c:冇飲酒嘛?
s:今日冇。返黎先同你傾。有d 正經野要做埋先。
c:ok。

~~~~~~~~~

健:阿峰呀?我今次會唔會見到佢呀?
c:佢話返緊黎。聽日食中午飯囉。
健:好呀,我都冇咩做。我都好耐冇見佢。
c:後來呢,你發現呢個世界,真係有兩種人既。一種係,你去到果個地方,會畀果個地方改變你。你會同果個地方既人越黎越似。而另一種呢,係去到邊度,都係一樣。過同一種生活,果個地方點變,都改變唔到佢地既。
健:咁我肯定香港人,係唔會改變自己果種。林語堂話自己係一塊拒絕溶化的冰。其實咪同香港人一樣。
c:有好多野,核心價值冇變架。我有個ex呢,香港教名校既。話果堆中學生,見到警察果陣呢,好好笑架佢地,佢地唔會尊重佢地。話佢地係毅進仔,係垃圾先做警察。仲要呢,有一個畀人拉左,然後三個律師去救人。個律師話警察屈佢,之後個警察做晒野,等個警察叫個細路簽口供果陣,個律師同個警察講:你程序錯誤,唔可以再搞我當事人。之後個細路冇出聲,係度笑。然後個散仔激到出晒煙,之後個幫辦過黎啦。個律師大大聲咁係個口供房度講:咁咪好囉,早就搵個識字既過黎,唔好晒我地時間啦。阿sir,你而家程序錯誤,唔可以再搞我當事人,我會send返封信畀警察投訴課同律政司架啦。
健:果然,係香港,咩人會失蹤?咩人會畀人強姦?如果你真係信d 黃絲講所有浮屍都係抗爭者,我肯定佢地係請唔起三個律師既窮人。一個律師陪一次口供,一個鐘收15000。你冇10萬一次,點抗爭?
c:好在,個細路應該屋企好有錢。冇呀,今個月尾都去外國讀書啦。老豆都同個仔講到明晒。

男聲(中年):我都知道你唔會好開心,不過我次次都同你頂,頂到你阿媽都就黎頂唔順。你知佢做政府,唔會想你出去衝架。我安排左學校畀你,你出左去先啦。再係咁落去,我都頂唔順。當幫我daddy啦。我都唔會捨得你。但你知道,而家香港咁落去,搞唔掂架。

健:咁直接?
c:我個ex 同我講果陣,講到喊晒咁架。
健:有咩好喊。
C:唔捨得個學生卦。點知佢。有時候,台灣人d 喊位,係好難明既。好似阿峰有另一個朋友咁,佢係國民黨d 大佬黎。聽講佢擺生日酒果陣,個個大佬都要去同佢握手影相。搞親選舉,都問佢拎支票。
健:哦?喂,咪住先,你地究竟係咩人,點解識到咁多呢d 奇怪人既呢?我跑江湖都冇識到咁多人啦。
c:識人既野,你唔做jei。你要識,你都識到架。好似台北畫刊個訪問,我有睇到。你咪一樣識到好多台北好勁既人。
健:邊有你地咁癲。國民黨金主都識到。
c:小事啦。你聽埋先啦。
健:等等,我要飲黑糖珍奶,呢間係堅野。你有冇飲過,好過老x堂多多聲呀。
c:你買埋先講啦~~~

~~~~~~~~~~~歌~~~~~~~~~~~~~

健:你睇下丫,係老咩堂果d ,畀一杯半製成品你,之後你自己要搞搞搞搞搞,搞完之後都唔知勻未就飲。我見過d外國人,唔記得搞杯野,結果甜到死左咁。
c:佢地都唔係用條利去食野架啦,而家都係用對眼同個instagram 食架之嘛。
健:喂,講返你個金主先。
c:冇。有一次,佢就好似唔知做咩請食飯。佢地d人呢,好得意,而家老老嫩嫩,都好中意搞飯局。有一次,我同阿峰兩個就同一個朋友食飯,佢就問可唔可叫埋阿a,阿a又帶埋兩三個人出黎。結果我地七個人食左餐飯。
健:唔會好odd 咩?
c:慣左就冇野。你係香港係唔想去飯局,一來係唔想人地judge你,二來你梗係覺得果個人出黎同你食飯佢一定係有d野想要你幫手既。食完餐飯,好多手尾跟。
健:香港果d中學同學呀,大學同學呀,好耐冇見d人add你,一定係想你借錢或者買保險。有一次我個frd 佢一句得埋去:借丫,借十億,唔使還既話。
c:係香港,好多人做人做得好hostile 係因為佢地唔開心。我從由細到大唔係叫我地尋開心,係我地做完件事。連林文龍做亞視都話做好呢份工喎,呢份工點會做得好。
健:之後呢?
c:冇呀,我親眼見識過,一個捐錢畀國民黨好多年既老人家,點樣講講下政治講到喊。佢話韓國瑜真係會救到國民黨點點點。講完一堆野,我同阿峰梗係扮唔明啦,佢就趴左係阿峰膊頭度喊。
健:講政治講到喊?
c:愛卦?或者係。恨鐵不成鋼卦。佢話,佢知道今次輸梗。點解呢?佢話好多有錢佬,捐開錢畀國民黨既都冇錢。話美國叫佢地閂水喉。美國想台灣買軍備,但國民黨痴大陸痴太埋,所以唔畀佢地畀錢啵。佢地寧願畀宋楚瑜,都唔會畀國民黨。

健:所以你知道有個靚仔出黎,佢係咁有機會講國防囉。講國防都係要買文具買玩具,只不過係搵邊個講,個反撲會細d之嘛。所以如果今次果個靚仔輸,美國會唔好高興。

c:你話呢,我地兩個,係台南一路食緊尤魚,一路講d咁深入既政治,係咪好現實呀?

健:係香港呢,就會有好多人覺得,你咁叻,你出黎選囉,剩係講,冇用架。但佢地唔知道,呢個世界有唔同物種,你叫條魚跑100米,唔會跑到。但條魚唔會唔知,跑一百米果條友,衝緊去懸崖唔出聲。好似呢個星期咁,只要上一上博恩,韓國魚就返黎啦。當然,你可以話佢帶風向,不過你可以排除,有d人會因為一個電視節目,會有唔同觀感。你唔會一面倒咁贏晒或者輸晒。只不過係,好多人都唔知,媒體可以幾恐怖。
c:所以,係外地既華人呢,真係有好多唔同種類。有一d 就好似你幾年前講過,佢地係外國既生存價值,就係因為佢地係中國人。你冇左中國市場,佢地就冇辦法再係外國生存。另一班呢,就覺得自己係外國生活得好辛苦,所以做中國人好有尊嚴咁。
健:做中國人冇咩唔好呀。中文又靚,中國菜又好食。只不過係做而家既中國人,仲要係冇錢既中國人慘之嘛。
c:你咁講,又話你右翼法西斯架啦。
健:又有幾右翼呀?
c:你講現實jei 。d人唔中意現實架。好似咩黃色經濟圈咁。場運動成功就係因為冇大台,而家就個個諗住起大台。黎黎去去都係諗個選舉。一日選舉有dq 一日都唔會公正,然後果堆畀人dq 既人,就叫人投票去畀一個冇dq 既候選人叫咩影武者,有冇邏輯既呢?
健:你真係冇人同你講呢d野啦肯定。
c:冇架,你畀阿峰知,阿峰都會話,走左,就唔好理咁多啦……

健:咁佢arm架啵。咁辛苦走,就係想隔一層去睇之嘛。人在外地,份外多野講。講完唔使受,我都講啦。冇成本,又可以玩野,仲可以畀人覺得你做一個有責任感既香港人,幾抵。講句野之嘛。
c:所以最後,都係有錢同冇錢。中國人,就係咁。
健:有時,我都唔想

在台北趕行程,一上的士,有個司機問我係邊度黎,我話香港。佢之後就連珠炮發話:「我不是針對你,但我想講,是你香港那群畜牲,全部都是畜牲。」
我同佢傾左十幾分鐘,竟然。你覺得我係咪轉死性呀?我竟然同一個的士司機傾十幾分鐘!(當然啦大佬,我條命to a certain extent 係佢手上架)

🚕(請坤哥幫幫手):佢一路係度講:「你們那一群香港的畜牲,打爛東西,到處撒野放火。英國人管治你們150年,也沒有給你民主,你們現在要求什麼?你們賺那麼多錢。比台灣有錢多了。不是中國你們會那麼有錢嗎?」
我問他:「那你有投票嗎?」
🚕:「兩黨都那麼爛,我投票都只是投廢票。因為,我擺攤子,警察來抓我,我說我投了xx黨,罰錢,本來1200,有投票就罰六百。這是在台灣的不明文規定。」
我說:那你覺得民主重要嗎?
🚕:「不重要!那只是資本主義的萬惡的人渣國家,流氓國家的玩意。你看世界各地,投票率都不會過百分之五十,那就是民主的失敗!我知道這些事情?」
我說:是這樣子啊?
🚕:「我不是來跟你討論,我只是想告訴你,我想什麼。有一句說話,你記著:我比你年紀大,你不會知道我的事情,我也不會知道你的事情呢。」
我說:但你在討論香港,那是我們的事情耶……
🚕:「你記著:我比你年紀大,你不會知道我的事情,我也不會知道你的事情呢。」

🚕:你們給萬惡的資本主義國家玩弄你們,150年都沒有民主,你現在爭取什麼?你現在出來爭取的,都是畜牲,他們不是人。最大的畜牲是……(…… 不寫出來啦,是一個媒體的大老闆,寫出來我會被滅口/網軍人格謀殺的) 👨‍💻:那香港現在要民主,怎麼辦? 🚕:等等吧。 👨‍💻:那民主跟「死」是一樣的囉?這個世界,只有「死」是一定會等到的。你和我是人,人一定會死的呀。
然後我就下車了。他還祝我「平安」。我覺得🚕是好人。但真的很反映台灣現在的狀況。我真係覺得2020年1月之後,台灣人應該真的要擔心一下自己的未來跟前途了。
健:的確,他不是來跟我討論的。他只是在說他覺得有意義的說話。
c:我都唔想咁。我去左台南之後,我會知道呢個世界,真係有d野係錢買唔到。但你又不能否認,有錢既話,有好多問題,都會被解決。
健:的確係既。
c:至少,你知道飛黎飛去,都方便d。
健:你有冇諗過返香港呀?
c:我估我地呢代,同之前果一代唔同啦。以前既人,走既時候,係想睇定d,之後會諗住返去。但過左呢20年,你知道香港人根本唔係想要香港,佢地只係想要一個唔管自己共產黨,一路畀錢佢地錢,一路唔理佢地。你估共產黨呢五十年會接受呢件事咩!?唔接受就迫佢接受?點迫?有手足打爛野又話多謝黑警,拒個汽油彈又話多謝黑警,叫黑警就叫popo 咁可愛。可愛到一路抗爭一路畀心心,你同我講呢個香港有得救?
健:有既,應該有既。我信物極必反。
c:你信易經?
健:細個果陣,校訓係易經黎。迫住要學d。
c:你覺得香港會點?
健:唔會好,但香港人適應力好快。咪變澳門咁囉。到中國玩到殘晒,冇晒利用價值,件事就會完。而家你覺得辛苦,係因為所有人都癲左jei。食餐飯又要問黃藍 ,講黃店係黑店有問題就畀全世界公審,之後而家搞到你聽楊千嬅都好似有罪咁。而佢自己聽容祖兒就冇事。你就知呢個世界,根本係傻左。
c:黃衛兵丫嘛。我聽過。
健:你冇見識過就得。
c:日日係你面書都見到啦。
健:唔會完架。佢地一日輸緊,都要搵位出氣。
c:你都睇得好通。
健:做左咁多年人啦。唔通咁都唔明咩。
c:你得閒過黎啦。我有房呀。住幾耐都得。
健:最多咪三個月,之後就要出一出境。
c:你要走一定走到既。爭在你想唔想走jei。
健:而家可以肯定咁答你,唔想囉。
c:因為?
健:因為好玩。睇住一堆人玩爛一樣野,都有種缺陷美係度。你明知佢地死梗,你出聲,就話你分化; 你唔出聲,之後佢衰左,你笑下,又問你點解唔出聲。我事前出聲,鬧,我事後出聲,又鬧。佢地都係想你收聲,等佢地活係個泡泡入面。本來,由得佢地,我都冇咩損失,不過睇到佢地一路輸,一路叫人去死,一路氣急敗壞,我一開始既時候都有d心痛,但慢慢,我就冇晒感覺。我甚至係覺得睇住佢地典來典去,都真係辛苦晒佢地。
c:根本,要做一件事既香港人係唔會周圍講架。你追到一個女仔,你唔會事前講,我一定要溝到佢。你移民,唔會周圍同人講你好想移民,你會去做。正如講多咸濕野果堆,多數都係處男。
健:做得到,就唔使周圍講做左咩。 好似口卦住話要爭取民主既人,其實佢地就最唔民主。口講話守護法治既人,佢地先係最破壞法治既人。
c:我地係咪要講d咁正經既野既呢?
健:我估你想咋。我想聽你同阿峰仲有冇食……
c:食你個頭呀。返去味?
健:返去飲高樑,係就買蘋果西打。真心好飲。
c:你好台呀。
健:唔好咩?入鄉隨俗嘛。
c:好。梗好架。
健:或者我地都需要調節下自己,先可以適應呢個世界。
C:都係果句,多d過黎玩。我會想見到你既。
健:係既。
c:有得見都見多d啦。有時候,有d野,真係講唔埋。有個朋友,今年,40幾,嘭一聲,做做下野,暈低,咁就走左啦。
健:都係既。
c:走真係唔緊要,不過唔好走得辛苦就得。
健:我地係咪好老呀?
c:唔知呢。不過,知道自己老緊,而同時仲有朋友陪你變老,就更加係值得高興既事。
健:thank you。
c:傻啦。返去啦。呢個都係你屋企黎。
健:……
c:你估呢……吳怡農……會唔會(fade……)
健:我鬼知咩……(fade out~)

王菲,流年~

credit:

903國民教育,實況劇場,你這剎那在何方?
經已播放完畢

文本/編劇 健吾
製作 監製 German
Colin 係阿基
健吾係健吾
細so 係阿峰
玲玲師傅係 玲玲師傅
坤哥 係的士司機

健吾: 2019年,就咁就完啦。你記得幾多個畫面?你會唔會掛住,2019?

~~~~~~~~~~~~~~

多謝大家支持,收爐了,初六再會。

 

Become a Patron!

 

作者:健吾

健吾
專欄作家、記者、編輯……商業電台節目《903國民教育》、《光明頂》主持,香港中文大學日本研究學系講師。著書超過40本。email:[email protected] |Facebook: facebook.com/kengopage |微博:t.sina.com.cn/kengowrites

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 202960
Date: 2020-01-22 17:11:14
Generated at: 2020-08-13 10:57:39
Permalink: https://www.vjmedia.com.hk/articles/2020/01/22/202960/【903國民教育-實況劇場】你這剎那在何方