由口罩談起:疫情曼延之時,個人還可做什麼?

政治 / 最新文章綜覽

 

 

這幾天,「口罩」成為奢侈品,大家瘋狂搶罩,成一時熱話。雖然我並非專業醫護,但也希望在大家一片恐慌之時,給予一些理性建議(當然政府係好很廢架啦…但作為市民、我地都盡能力負責好自己果部分OK?)。戴個頭盔,我只以尋常百姓角度想,非專業醫護人士,有錯誤煩請指正。

首先,真係唔使戴N95。戴N95的人要做Fit Test(晴報,2020),戴未必岩面形、而且呼吸相當辛苦。同埋已經講左,以一般不出入高危重地的百姓而言,外科口罩保護已經足夠。加上在全球物資短缺前題下,N95係咪應該留番俾最前線醫護?尋常百姓就咪哂左佢啦。

第二,一系列戴錯口罩方式相信大家成日見,唔使我多講。我想講個重點是,唔係你「有無個口罩」、而是你「有無戴岩個口罩」,大佬呀你買買買、但又戴到錯哂、更加浪費。然後我見不只一人戴兩層口罩,不但浪費、仲無意義,可唔可以唔好咁?

第三,盡能力找尋即棄口罩以外的方案—喂我唔係叫你蒸口罩(?!),而是找尋具規格、合乎國際標準的Reusable口罩。坊間已有一些相關資訊,由於唔想賣廣告關係,我只列出一些方案,給大家作參考。首先,用Reusable口罩不單大大減少浪費、更重要是「你唔使同人搶口罩」。據了解,有規格列明的Reusable口罩級別,有某些可與外科口罩規格看齊(我當然不是在講一般布口罩…),大家搜尋時自己要看清楚。(行文之際,已有理大研發可重用口罩的新聞,請大家密切繼續跟進。)

另,我知(亦見到)有充電口罩,雖然我無興趣試,但有興趣者可自己搜尋。我亦見有人掛上掛頸式空氣清新機,同樣唔知成效如何,但相信有一定作用;而長居冷氣辦公室者(或在家),也應考慮購入空氣淨化機、嘗試「源頭減毒(其實唔知Work唔Work,要再睇個別規格)」。總之幾管齊下,對個人而言的保護自當足夠。

差遠少少說個題外話,可能會俾D人覺得「起呢D時候就唔好講呢D啦」,但其實生態災難是一個可預見的事實—即棄口罩根本就不是一個Sustainable方案。首先,醫療界別本身須使用的一次性裝備與醫療廢物已因疫情大大增加。另一方面,市民平日雖然都會有戴口罩的時候,但畢竟只在生病時使用(或是任何工作需要)、但如今卻是平民百姓個個一人一罩每日地使用。我當香港只有一半人一日用兩個即棄口罩,一星期都變成五百萬個、一個月就變成一億九千六百萬個!唔好講環唔環保問題,單係堆填區能否負荷都已經成疑。

根據大公報報導(淨係搵到大公…),「製造這些醫療衛生用品的無紡布,成分主要是 「聚脂」(PET) 及 「聚乙烯」(PE),而聚脂過去一直不可以降解」(大公報,2015)。政府就相關問題,有無研究/交待過?一味叫人戴口罩戴口罩又唔俾口罩人又唔講之後點處理海量即棄口罩係咩玩法?仲未講外國喎?而,面對疫情釀成可預見的生態災難,環團有無出過聲?

第四,改變一些生活日常習慣,例如日日抹電話、Keyboard、Mouse;避疫情之際,家中黎個大掃除清潔,順便丟掉無用雜物(囤積雜物也會積下塵埃,好心住劏房既朋友真係丟下雜物啦,次次影親劏房戶既朋友都是一大堆一大堆雜物,無肺炎都變病…);上廁所後蓋廁板沖廁、清潔好洗手間、注意廁所U型喉管情況(SARS時期淘大花園就是因為個廁所而出事);少觸碰街外公共物件(例如門柄);返家/公司立即洗手(認認真真睇Youtube學好洗手方法,咪洗10秒就算);自帶餐具…等等,均能在個人能力範圍內減少感染機會。最後,只要尋常百姓不無啦啦出入醫院重地、做好個人衛生、勤正確洗手,無必要過度擔心。做好自己衛生,不僅在於自己不中招、也在於不用加重醫護負擔。

若果做哂可做的事都中招、相信好多人都中招、咁就真係天亡我也啦。

 

作者:殷琦

殷琦
港大表達藝術治療碩士生、教院音樂教育碩士、港大主修中文中史。一舊蕃薯般的孤獨文青。做YouTuber、專欄作家(稿費...)、鋼琴老師、合唱團、作曲卻不懂用電腦編曲。總活在迷霧之中,怨氣太多,希望太少;與你和我一樣,在小小的香港同受壓抑、同唱悲歌、每天僅為生活掙扎求存。興趣在表達藝術治療、哲學、心理學、生活、音樂、藝術、政治、宗教等。小妹專頁:https://www.facebook.com/pages/YanKi/1002326119779241

閱讀後覺得好,請多多讚好及分享~:)

其他熱門文章

  • 梅媽的神奇小子 by 鳩文瘋
    呢兩母子真係好神奇~幾乎全家都死哂,得佢地兩個日日係度獻世。…
  • 【遊戲介紹】肝度十足元素豐富 《Len’s Island》耕種建築探索戰鬥樣樣俱佳 by 五木
    遊戲種類有好多,不過人係貪心嘅,好多時會得一想二。好似《動物森友會》各方面都做得好好,然後你就會諗如果地圖大啲 […]…
  • 【外賣仔日記】我與Uber Eats 的回憶 by 外賣仔
    Uber Eats 系統的運作有如一瓶飲料在工廠中製作的流程相近,由飲料製作,到飲料裝瓶,都是預期所有事情發生非常暢順,例如預期飲料由輸送管裝入瓶時,塑料瓶保證會在預定的位置等候,毋須預計塑料瓶沒有適當地放置在指定位置,導致飲料灑滿一地…
  • 何謂「格屎」? by 潮文社
    至於個小朋友講嘅「響格屎」,絕對同安格斯、吔屎無關。「格屎」係指社團單位,問人「咩格屎」,即係問人屬於咩社團、咩幫會,多數會用「瓣」作為量詞。例如格屎哥就講:「響格屎啦!你邊瓣咖?」,邊瓣「格屎」,即係邊個社團。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 《彼岸島》絕對是我人生中看的其中一套最令我無言的漫畫。 by 鵝鑾鼻燈塔
    如果你沒有看過,恭喜你,你的人生是完全沒有任何損失的。這種比狗血更狗血的劇情,永無休止又不斷無限loop的橋段,看了也想把自己雙眼也插盲。簡單來說,主角不論做了甚麼,也無法打死早已不死的吸血鬼之王,只能眼看自己的同伴一個又一個的死去(有時甚…
歡迎讚好我們的facebook page,免費資訊源源送上。

文章資訊

ID: 203328
Date: 2020-02-01 06:08:50
Generated at: 2021-12-08 11:18:05
Permalink: https://www.vjmedia.com.hk/articles/2020/02/01/203328/由口罩談起:疫情曼延之時,個人還可做什麼?