「我地做教育係教人,唔係教書!」當聽到呢句,其實已經可以執定包袱

 

「我地做教育係教人,唔係教書!」呢句話看似理念崇高,好有「春風化雨」嘅氣勢。無錯,我無用錯詞語,係氣勢。因為講得出呢句咁嘅野,一眾「土皇帝」、「山寨皇」,或者一D管理層。

呢句野其實有咩問題呢?其實係一D潛台詞,而且係一句暗示咗你無得續約嘅台詞。大佬呀,呀皇上,你請我返嚟梗係教書架啦,唔通同D同學仔日日打波、傾心事呀?不如開條熱線俾D同學仔好唔好?不如轉行做社工啦!但,咁點解佢地都會講呢?其實成句野個重點係喺個「人」字上面。

你極有可能係同D人唔夾。首先,可能你係同D學生唔夾。佢可能係話你嘅課堂管理唔好,Head唔到D學生;更甚者,你可能得罪咗D學生,佢投訴你(無錯,新入職老師點解成日流浪,年年轉校,因為真係好易被人投訴,咩都有得投訴,遲D再講)傳到去佢地耳邊,咪捉你照肺「勞改」囉。

第二,可能你同同事唔夾。個同事可以係管理層,可以係科主任,可以係其他同級但年資高嘅同事,甚至可以係Office嘅同事、TA或者校工(呢三堆人先最恐怖)。喺呢個充滿人嘅地方,真係可以好多是非。「只要有人的地方就有恩怨,有恩怨就會有江湖,人就是江湖。」呢句出自金庸先生嘅名句,係真架。可能你一句唔太禮貌,少咗一句「感謝」、「唔該」、「謝謝你」已經得罪咗人。咁就可以「借力打力」是非傳千里,等收呢句「氣勢澎湃」嘅金句:「我地做教育係教人,唔係教書!」。

第三,可能係你工作表現,或者係其他條件(例如PGDE試教堂)佢唔想應承你,所以出呢句說話。佢可能覺得你太Hea(不過其實呢個年頭嘅合約老師邊有得Hea吖),或者你做野唔啱佢心水;又或者唔想俾PGDE嘅試教堂(呢個Topic又可以出篇文)咪用呢句嚟打擊你囉。

所以收到呢句,其實唔駛太Down嘅,並唔係話你唔專業。但都可以幾肯定咁同你講:第一,你得罪咗人;第二,你唔適合呢度,合約老師更加下年要走。最後,以下係筆者嘅親身經歷或者所見所聞,大家一齊嚟參詳參詳(筆者唔會開出校名、團體名稱或者有關人士嘅身份):

 

個案一

山寨皇:「我地做教育係教人,唔係教書!大家都係以科學教育嚟做終身職業教師,我唔相信大家咁樣返工放工,教完一堂科學堂就走係教育囉。你地有無嘗試拓展學生對科學嘅興趣?我地以科學作為終身職業嘅,唔該,帶學生出去見識吓,帶佢地去比賽。佢地眼光好淺窄,好需要大家帶佢地出去科學比賽。睇吓其他科,中英文科都有朗誦辯論、數學科又有大量奧數比賽、電腦科有STEM比賽、經商科又有營商比賽同年宵攤位、體育科更加日以繼夜咁練習去比賽。科學做過D咩?你地講嘞…… (下刪1000字)」

 

個案二

土皇帝:「我地做教育係教人,唔係教書!大家都係以英語教育嚟做終身職業教師,我唔相信大家咁樣返工放工,教完一堂英文堂就走係教育囉。新嗰位XX科老師,佢好清楚學生讀咁多年書,就係為咗考DSE入大學,所以佢好俾力幫同學爭取好成績。佢嚟咗唔係好耐,將呢班攞明唔得嘅,唔係拎星嘅材料,甚至好多都有機會唔合格,都谷到合格率100%,甚至有好多同學拎4同5。你地呢?學生跟你地讀足6年英文,拎過D咩?今年一個5**都無,5、5*都係十隻手指數得晒,仲有咁多人唔合格?!我地做教育係教人,唔係教書!我地要幫學生有條好嘅出路。英文唔合格,咁點入大學?你地係專業教師,我唔相信會教出D咁嘅成績囉。…… (下刪1000字)」

 

個案三

皇上:「我地做教育係教人,唔係教書!你連管學生都管唔掂,佢地點會聽你講?我都問過佢地,點解佢地要咁上堂。佢地答我,因為你講野太大聲,嚇親佢地;而且感覺你有D嫌棄佢地。你都嫌棄佢地,佢地又點會聽佢講呢?」

同工反駁:「吓?我無嫌棄過學生喎。佢地行為有問題,唔通唔講?而且難聽講句,佢係我米飯班主,我點會嫌棄佢?」

皇上:「學生感覺到架。你喺度狡辯都無用!」

同工:「……」

皇上:「唔該你同學生搞好D關係先上堂!…… (下刪1000字)」

 

個案四

朕:「我地做教育係教人,唔係教書!我覺得你連禮貌都唔識,無大無細囉,咁點教書?你係數學TA,直接約我傾PGDE俾你試教數學堂嘅事,係咪有D越級呀?你同你上級講咗先,等我知咩事,我再搵你。你依家要做嘅事係出返去,你明未?」

結果嗰位同工死死氣咁出返「聖殿」,但報PGDE嘅截止日期已經唔遠。而且,其實據筆者所知,嗰位同工早幾星期已經同上級詢問過有關實習嘅安排,但遲遲未有回覆。

 

作者:教育界漂流小薯

90後,受過吓高等教育。日頭喺教育界做個小薯。起初滿腔熱誠,但經過每年漂漂泊泊,親歷教育界嘅黑暗,依家都係想搵啖食養家啫。夜晚就…sorry,仲未收工喎。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 203533
Date: 2020-02-05 01:53:47
Generated at: 2020-08-15 07:23:00
Permalink: https://www.vjmedia.com.hk/articles/2020/02/05/203533/「我地做教育係教人,唔係教書!」當聽到呢句,