林鄭仲記唔記得講過嘅「分享快樂」?

政治 / 最新文章綜覽

 

回想當年,林鄭嘅第一份施政報告所用嘅口號係「一起同行 擁抱希望 分享快樂」。先勿論佢當初係咪真係想咁做,但到咗今時今日我可以好肯定咁講,依十二隻字對香港市民嚟講真係一個字都冇中過。

如果以一個正常想邏輯去諗,你係唔會諗得出點解一個香港特首可以同廣大市民背道而馳到依個地步。由反修例開始大家已經睇得出香港市民嘅民意對佢嚟講係Nothing,不過佢嘅每個決定都仲可以話係為咗死要面子,為咗將反抗佢嘅一代趕盡殺絕而做,充其量叫冇人性,但都睇得出佢目的係咩。

直到武漢肺炎爆發,由封關到口罩供應,佢嘅每個決定莫講話唔係一個高官應有嘅水準,連一個小學雞都知要點做嘅嘢佢到而家都唔肯做——係啊,我講緊封關。即使佢每隔一兩日就封一忽仔,但一日未斷絕所有大陸,甚至外國人嚟港嘅途徑,一日都唔係真正嘅封關。香港由冇事到已經出現社區爆發嘅風險,林鄭依舊連封關依一點都未做好;口罩斷貨斷咗半個月都有,澳門都可以先話有二千萬個比市民,再掃哂葡國口罩,但香港係一邊有老人家通宵排隊買紙咁薄嘅口罩,另一邊民建聯捐一大堆口罩去中國,選舉失利後就漠視佢地班鐵票嘅死活。

分享快樂?你連比個口罩香港人都做唔到。

如果反送中嘅種種決定係要趕絕一代人嘅話,今次武漢肺炎之下林鄭嘅做法直頭係想趕絕所有香港人。無論你咩背景,藍定黃,佢都想襯今次收哂所有香港人皮——唔好話我老作,佢連唔比公務員帶口罩依番說話都講得出,你覺得佢有理過香港所有人嘅死活咩?陰謀論講,我係信中國要香港留後路比中國權貴走所以林鄭點都唔肯全封,但想香港人死哂絕對係林鄭一個人嘅諗法。當香港冇人再可以幫中國做白手套,幫中國做啲佢地唔可以出面做嘅事的話,得返香港塊地對中國嚟講係冇用嘅,如果唔係中共都唔洗慢慢放人嚟香港溝淡香港人嘅血,直接好似新疆種族清洗就得啦。

如果你仲想香港有未來,或者再睇短少少,你想你仲有條命留係香港,林鄭同佢成個政府唔可以再咁安然噉留喺度。唔好再覺得政府會同你同行,唔好諗住佢地會比到希望你,更加唔洗旨意林鄭一日仲喺度香港會有快樂可言。你可以唔支持五大訴求,但而家單單係為咗自己條命,大家都要企出嚟反抗依個政府,一定要香港嘅未來再比香港人自己話事。

自己條命自己救,香港人加油。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 203654
Date: 2020-02-07 04:35:22
Generated at: 2020-10-22 05:47:59
Permalink: https://www.vjmedia.com.hk/articles/2020/02/07/203654/林鄭仲記唔記得講過嘅「分享快樂」?