一場瘟疫豪賭，林鄭贏晒

你即管唔服氣，又試下可以點樣駁倒我先算啦。逐點同你計：

1.      林鄭是否知道是豪賭？答案絕對肯定。正如某網誌老闆名句：假如俾一百題選擇題你答，居然可以全部錯晒！即係話根本唔係亂撞，而係明知答案而故意答錯。 既然明知而固犯，即係另有盤數啦。咁仲唔係豪賭？又會係乜嘢？例如：全世界都高價搶口罩，居然可以官僚到「照規矩招標，價低者得」…. 係真蠢定假蠢？又或者全世界封關都係為咗截流，冇人會俾幾日時間你「緩衝」一下啩？緩衝即係叫你「狗衝」啫… 果然囉。

2.      豪賭之下： 林鄭原本都只係慨歎，身邊得三萬個警察對佢效忠。一賭之下，原來所有政府官員都對佢效忠！翻盤贏足十萬人。醫管局高層直頭講到明會秋後算帳，罷工當曠工、唔肯枉死即係專業失德… 嘩！咁都得？得呀，仲係啲醫護自己個工會去投票決定終止罷工呀。咁你話邊個贏晒？事後封關呢下嘢，同叫個強姦犯中出完先至戴套一樣。真係唔怪得林鄭忍唔住陰陰咀笑囉。原本已見端倪嘅民政事務處，繼續同民選區議員鬥法，連會議室都鎖埋唔俾你用，等你成班友仔企街食風、仲要話係「冇會議記錄」拒絕承認會議結果。睇到未呀？林鄭對公務員系統而家係絕對掌握，而唔係得個講字。

3.      對賭摸底，到底邊個怕攬炒：原來港豬怕死到震、而且蠢到痺。根本就冇「唔怕攬炒」呢回事！擺明係陰招、係假新聞，但係居然港豬信晒！唔係講疫情，係日用品呀。一聲話封關，所有生活用品一掃而空，即係咩意思呀？即係洗腦成功囉。乜鬼嘢「香港冇咗中國唔得」，竟然真係信到足。邊有人可以蠢成咁呀？中國自己都唔夠米食啦，況且香港啲米，大部份係東南亞進口，關中國乜鬼事呢吓？咁嘅結果，即係港豬好呃，唔呃你就天誅地滅囉。咁嘅情況，即係冇人會為咗民主自由同人權同你死過… 其實啲人連常識都冇。咁林鄭仲有乜嘢好驚呢？

4.      愛國盟友，全部番晒埋位！呢下先至緊要呀。先前一個二個，講到中國就發晒火，今次唔該留意一下，尤其是大陸拎個「造謠八君子」招牌出嚟揚兩下，原來全部人又係跪低晒當係死老豆咁朝拜。李卓仁仲帶埋班老飯民去搞公開悼念添。其實又同六四有乜唔同呢？呢個所謂「道德光環」由一眾「愛港人士」拎住，總之邊個「唔關心中國」「唔支持中國防疫」「唔團結香港抗疫」，就係狼心狗肺、港人公敵 …. 諸如此類。而班黃絲醫護，就中晒招嘞。一話不合作，結果俾啲港豬鬧到狗血淋頭，又話佢哋係逃兵乜乜物物。今次班藍屍真係興奮到呢…。

5.      樓價冇跌到。呢下就真係贏到開晒巷。其實又係迫咗建制陣營埋堆之嘛。之前沙士，大家都唔知搞幾耐，於是乎一眾地產大鱷要錢唔要貨，盡快推出樓盤套現。結果出現咗麵包平過麵粉情況。邊個話呢個世界有自由市場呀？當年順手殺埋個公營房屋政策，明輸暗贏，地主會各大族依然係全港首富，你吹咩。當年嘅惡性循環、負資產就係咁嚟。而家睇準疫情唔會超過一年，乘機反而叫停工地、終止供應。然後減租唔斬倉。於是乎只有極少數炒家離場，但係整體樓市企到鑽石咁硬。所謂「等沙士價入貨」變成春夢一場。於是乎預咗係：記得準時返工、繼續供樓。

咁你話啦，林鄭仲唔係最大贏家？反正佢又唔係要靠你港豬啲票嚟做特首嘅。只要面皮夠厚，話之你死。而且全家攞晒英國護照，鐵達尼沉船都係頭等艙同你拜拜先啦。

仲有，而家係林鄭拎住逃生門條鎖匙，北京出事，中南海各人，包括習大大在內，都要靠香港做出逃後門。因為唔可以直接用私家飛機走人，只可以香港落地再轉一個「香港出發」嘅飛行准證。到第三世界國家再變身上路。先前話三月會炒咗佢換人做特首。而家真係睇怕佢驚你有牙先奇呀。

至於香港人講咗咁耐話要抗爭到底，又睇下呢樣瘟疫之後，又有乜嘢發展囉。

作者：蕭少滔

香港中文大學工商管理學院本科生校友會會長、 (前) 香港中文大學學生會辯論學會首席顧問、香港中文大學辯論隊校友會主席、香港中文大學工商管理學院 (國際商業/法律) HEC School of Management Paris, (Financial Engineer, Geopolitics) 恒生商學書院 香港華仁書院

閱讀後覺得好，請多多讚好及分享～：）