香港人絕對養得起香港文化產業

 

多得黃子華一套戲,黃色經濟圈嘅討論去到文化產業界。

 

我出生早,有幸見過香港電影賣埠韓國台灣東南亞,文化輸出戰力99999嘅年代。

亦睇住CEPA 之後影視界只見眼前利益,一步步賣走自己本業,搞到人材資金雙流失然後拍垃圾合拍片最終兩邊不討好被香港人拋棄嘅年代。

一個沒落嘅界別,加速咗跪喺度奶嘅進程。

 

其實寫作界都有同樣問題。

香港好難養得起全職作家,難到催生咗某啲人去鄰國寫之後奶到雪雪聲嘅怪象。

早幾日我作為評審之一出席天行者徵文比賽,我哋一班寫咗有啲年份嘅就喺度討論:

——我哋要建立養得起自己嘅黃色文化產業鏈。

然後再重新起步向自由世界進發。

呢條係我哋唯一出路。

 

香港文化沙漠,只係刻意洗腦嘅謊言。

王家衛嘅鏡頭,杜琪峰嘅美學,而家仲喺韓片度見到影子。張小嫻嘅大名,識中文嘅人都聽過。

我細個跟阿爸阿媽入戲院睇早場,全院三線都港產片,早場入座率都過7成。

好多人不求發達,只求做好自己嘅創作,只要生活到,根本冇需要屈膝。

香港人,絕對養得起佢哋,養得起為自己發聲,為香港做軟性文宣嘅文化產業鏈。

難,係難在過去廿年一直俾人掏空、融合。

台灣美國都面對同樣問題,所以佢哋呢兩年開始將產業搬返本國,集中資源喺自己度。

世界大勢就係咁,香港上層俾人鏈住郁唔到,唯有由低層消費開始改變返上層。

只有我哋呢一代人努力,下一代先可以有屬於自己嘅香港文化產業、香港電影、香港小說、香港漫畫等。

 

最後講返子華,利申先我本身係佢fans,冇炭用睇到識背。

如果佢冇奶,亦冇撐,我覺得咁可以當係啲冇出聲嘅食店——

唔杯葛,亦都唔會特別推薦。
唔需要迫表態,寛容面對就得。

 

 

作者:又曦

又曦
遺憾與傷痕,是人活下去的養分。 香港作家;已出版小說︰《補習社》《自修室》《平行世界裡,我沒有錯過你》等;已出版散文集︰《多謝仆街讓我們長大》 FB、紙言、方格子︰@又曦 IG、medium、matters︰@morning_rays

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 203766
Date: 2020-02-11 04:58:35
Generated at: 2020-03-29 20:40:34
Permalink: https://www.vjmedia.com.hk/articles/2020/02/11/203766/香港人絕對養得起香港文化產業