放緊無薪假,但係要做嘢係咩玩法?

 

「你都知最近武漢肺炎少咗好多生意,所以希望你可以同公司共渡時艱,放兩個星期無薪假。」經理Carol說。
「我明嘅,但係點解唔考慮home office?手頭上仲有好多project跟行緊。」我說。
「你腦細咁姑寒,點會吖,我都比佢減咗一半人工啦。」Carol說。
「WHAT!?唔係掛,咁即係逼你走啫!」我說。
「而家呢個時勢,可以走得去邊?頂住先啦,我都無辦法。」Carol無奈地說。

 

身邊好多朋友都係home office緊,講真只要有部電腦,其實好多嘢都可以做到,特別係marketing,至多抄晒啲file番去做,可以繼續出post落adv,同客可以繼續用email/whatsapp溝通,始終有啲project唔係可以話停就停,不過腦細當然唔係咁諗,佢知道home office打工仔一定會偷懶,所以索性叫我哋放無薪假,又可以慳啲錢。

無薪假對我嚟講其實有好有唔好,唔好當然係無錢啦,但係大佬武漢肺炎咁L勁其實有邊個敢番工,番工啫,唔使搵命搏呀嘛?垃圾政府唔肯封關,放晒一堆喪屍入嚟,惹到周圍都係毒,你以為量體溫就有用?果堆隱形病人呢?本地傳播已經爆發緊,口罩、消毒濕紙巾、漂白水、廁紙、米、杯麵,要乜無乜,就算你乜都有齊,可能因為你有次唔記得洗手拎咗條薯條嚟食就奶野,世事嘅嘢真係話唔埋,加上好多人好似仲未識驚,home office就約人打牌打邊爐,好喇你以為唔出街匿喺屋企最安全,倒埋1:99漂白水喺U形管,點知又話經氣喉,抽氣扇抽咗入屋,要中招,其實真係好易。

「記住每日都出post,同埋個客啱啱覆咗喇個email,你跟跟。」腦細Michael whatsapp我說。
「OK。」我說。

放緊無薪假嘅第二日,當我喺屋企上網搵緊口罩同消毒用品嘅時候,腦細就搵我做嘢,原本唔想覆佢,大佬no pay緊,義工呀而家?但係諗起呀媽同我講:「如果公司減你人工你都唔好辭職呀,而家呢個時勢好難轉工,有咩都忍吓先啦。」所以我最後都應承咗幫佢跟嘢。

愈來愈覺得做香港人好辛苦,其實我哋係咪就嚟會被滅族?每日睇住個政府同黑警做嘅仆街嘢,真係嬲到死咗唔少細胞,但係可以做咩去反抗?我真係唔知。大家有咩想做就去做啦,唔係就會後悔。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 203827
Date: 2020-02-15 05:50:00
Generated at: 2020-08-05 23:57:43
Permalink: https://www.vjmedia.com.hk/articles/2020/02/15/203827/放緊無薪假,但係要做嘢係咩玩法?