【引爆中國】(一):中國只係統一過81年?

 

「支爆」呢個term,筆者都聽咗好幾年,然而每次話支爆,結果都好似不了了之咁,直至今年武漢肺炎大爆發,有朋友就開始盤點下現時中共所面對嘅所有問題,發現係歷朝歷代滅亡前夕嘅事件嘅大集合。既然係咁,筆者亦都想講下到底歷代嘅統一同分裂,背後究竟係發生咗咩事──到底一個朝廷要衰到咩地步先會分裂呢?

講分裂之前,首先要講統一。一般而言,傳統嘅史觀會認為「統一」係指全個「天下」由一位「天子」統領嘅狀態,謂之「統一」。至於「天下」有幾大,就係相當有彈性嘅,但基本上必須包含黃河、長江、珠江流域內,以漢人為主要居民嘅農業區,即係今日嘅河南、山東、山西、陝西、江蘇、安徽、浙江、江西、福建、廣東、廣西、湖北、湖南全省,加埋四個直轄市,同埋甘肅東部、四川東部、河北長城以內地區,呢個範圍亦都係真正嘅「自古以來中國領土」,大家打開歷史教科書,秦、漢、晉、隋、唐、宋、元、明、清呢9個傳統上被視為「統一」嘅王朝,無論佢哋嘅領土幾大、幾細,都一定會包含呢個範圍(除咗宋,但終宋一朝都視幽雲十六州為失土)。如果地理唔好嘅讀者可以開是但一集有包交州嘅《三國志》就明大概係幾大。

至於呢個「自古以來」嘅範圍,點解今日會畀中共拎咗嚟講埋台灣、藏南、釣魚台、南沙群島呢啲地方呢?咁係因為中華人民共和國自稱繼承咗中華民國嘅1949年嘅領土,當時台灣、西藏、南沙群島都係國際承認嘅中國領土(打算當睇唔到《舊金山和約》嘅口號台獨可以唔睇落去囉,因為你實嬲),所以呢啲地區都會係中共主張嘅領土;而且中共又主張喺「中華民族」入面,漢人同其他「少數民族」要平等,所以中國嘅固有領土要包埋「少數民族」嘅傳統領土,強行漠視喺清朝之前好多呢啲地方都唔係中國領土呢一個事實,之後就連「五胡亂華」、「岳飛抗金」都變成政治不正確唔准講,而到底中國固有領土有幾大就變成一個唔知點解要研究嘅課題。

最後,中共嘅學者葛劍雄喺《統一與分裂》一書入面提出咗個神奇嘅理論:「中國統一」係指中國領土達到傳統中原王朝經歷多年發展之後可以達到嘅最大領土嘅時期,即係清乾隆二十四年平大小和卓之亂起計,直至道光二十年鴉片戰爭爆發為止,中國歷史上只係統一過81年(?)。當然,佢講完之後成本書都冇辦法用呢個「中國只統一過81年」嚟論述,而要用返傳統中國嘅「統一」嚟寫埋本書佢,咁葛劍雄都數咗950年出嚟嘅。

而我只好善意咁解讀葛劍雄嘅理論:其實佢係恥笑緊中共嘅「自古以來」論,叫中共要講統一就同俄羅斯講先啩?

 

專題【引爆中國】

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204015
Date: 2020-02-20 22:56:43
Generated at: 2020-03-31 09:45:03
Permalink: https://www.vjmedia.com.hk/articles/2020/02/20/204015/【引爆中國】(一):中國只係統一過81年?