【引爆中國】(二):中國沒有不分裂的本錢

 

上次講到葛劍雄《統一與分裂》提出,中共政治政確下嘅標準計,中國歷史上只係統一過81年,而依照傳統中國所講嘅統一嚟計,其實中國亦都只係統一過950年。咁即係話,無論你中意由夏后帝啟開始計、由成湯開始計、由周召共和開始計、由秦始皇開始計,定係由辛亥革命開始計,分裂都係中國嘅常態。

而且,「中國」一開始就係因為分裂而形成,係一個由國際秩序演變而成嘅國家概念。

各位打開歷史教科書,比較舊嘅版本係會有超級長嘅篇幅講春秋戰國。提到春秋戰國,大家都會見到咩「春秋五霸」、「戰國七雄」,好容易令人誤會春秋戰國嘅「亂世」只係得呢幾個國家喺度打嚟打去。不過當你睇仔細啲就會見到,春秋時代除咗齊、晉、宋、秦、楚五霸之外,仲有孔子所在嘅魯、成日畀晉楚拎嚟玩嘅鄭、後期霸主吳、越等等;戰國時代亦都仲有中山呢個新興嘅國家。其實,喺先秦時代,「天下」真係有過「萬國」嘅。遠古時代,黃河兩岸嘅部落形成各邦,而各邦又以實力最強者為首領,亦即係「天子」。

 

 

當時,由於科技唔發達,天子權威雖然一代威過一代,但土地都係要分封畀其他人代為管理,所以中國係制度性咁必須分裂;不過到咗周代,封建制、宗法制令天子同萬邦嘅關係更加緊密,萬邦亦唔再好似夏、商咁只要有實力可以挑戰天子。萬邦承認咗天子係佢哋嘅君主,即使係平王東遷之後,各邦都仲未敢直接取而代之,不過好似鄭邦咁要同天子交質呢啲事已經開始發生。

 

 

齊桓公嘅「尊王攘夷」進一步保持咗呢種天子弱、萬邦強嘅國際現實,形成咗以天子為名義首領、以霸主為中心嘅國際政治同秩序,最後發展成承認呢套秩序嘅,就係「中國」嘅成員,而「中國」呢個概念亦可以話係喺春秋戰國時真正誕生。

 

 

至於所謂嘅統一,本質上係一種對「世界和平」嘅願望,所以喺戰國時代已經有「天下惡乎定?」「定于一。」嘅思想出現。當時嘅人希望「中國」唔好再打仗,儒家就話只要有一個新天子建立新秩序就可以,但各大諸侯就諗得直接啲,只要「中國」入面得返一個邦,咪唔會再打仗囉!咁之後就係大家實踐嘅時候:最「嗜殺人」嘅秦兵將天下萬邦收入囊中,中國統一。

 

 

然而,秦嘅統一,好快就面臨「中國太大」呢個問題,而呢個問題就將中國嘅統治者困擾到依家:要各地安定,地方首長一定要有足夠權力,因為如果各地有事都返嚟問天子,唔止費時失事,天子亦唔一定知點處理。但地方首長有足夠權力時,佢哋又唔再需要天子,因為佢哋已經可以自給自足啦。所以,日後中國嘅分裂同統一,好多時候都可以睇成朝廷同各省道州郡縣之間嘅關係:關係破裂之日,就係中國分裂之時。

 

P.S. 點解上面好似將諸夏同中國兩樣嘢溝亂嚟講咁呢?事實上呢兩樣嘢真係同一樣嘢嚟。理由可以喺《史記》搵到:當漢朝派陸賈去南越出使時,陸賈見趙陀著盤膝咁坐,坐到露晒隻蕉出嚟(好似係),佢當下就同趙陀講「你係中國人嚟」。可見中國即諸夏最遲到秦時已經係共識。

 

專題【引爆中國】

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204029
Date: 2020-02-22 06:19:50
Generated at: 2020-03-31 15:15:12
Permalink: https://www.vjmedia.com.hk/articles/2020/02/22/204029/【引爆中國】(二):中國沒有不分裂的本錢