【引爆中國】(三):統一之後……

 

中國嘅第一次統一,係喺秦始皇二十六年,當年齊王降秦,中國入面嘅各邦都消滅,只係剩返秦一個。然而,過去適用於統治一邦嘅法律,依家拎嚟統治一個天下,好快就產生好多矛盾。秦嘅統一隨住秦始皇嘅去世而結束:以大澤鄉起義為首,山東各地都發生平民殺害秦吏、六國遺民復國嘅事件。最後,其中一支楚國起義軍喺劉邦帶領之下入關滅秦,再經歷五年嘅楚漢戰爭,劉邦成為新嘅天子,但離中國恢復統一,就仲有好多年囉。只係,由呢一刻開始,唔再係各「邦」而係各「國」,因為劉邦叫阿邦嘛。

不過,今日唔係想講秦漢之際喺中原發生嘅事,而係睇下喺我哋呢頭,嶺南一帶發生嘅事。

秦統一之後,對領土嘅渴求似乎仍然未滿足。秦始皇不斷出兵南方,企圖將百越之地收入版圖,而佢亦都成功咗:經多年戰爭,秦喺嶺南建立咗南海、桂林、象三郡。根據《漢書·百官公卿表》,秦代嘅地方政府以郡守為首,郡守為二千石高官,地位基本上同朝廷九卿同級,用同級嘅印綬,只係實收嘅俸祿會少咗啲(漢制九卿為中二千石,每個月多二千石60斛穀,估計秦制類似,甚至係更簡單咁全部都係二千石)。郡守屬官有郡丞,邊郡會有長史掌兵馬;而郡內仲有郡尉作為駐郡嘅武官,佢都係二千石,但就係俸祿(喺漢朝係)低二千石少少嘅比二千石,每個月少二千石20斛穀,但同郡守都係用同級印綬。另外郡內仲會有監御史,但監御史嘅記載太少冇咩好講。原本秦制將地方兵事分畀另一個幾乎同地方首長同級嘅官員去主管,就係防止地方官員擁兵自立嘅設計嚟。

問題係,新開嘅嶺南三郡,似乎因為冇咩民政事務可以處理,秦朝亦冇委派郡守,而只係派咗郡尉嚟執掌郡政。南海嘅郡尉,就正正係最終攻佔嶺南嘅任囂。秦始皇咁做,首先都係信任自己嘅將領,其次亦都係好實際咁由熟悉當地嘅將領嚟鎮壓新拓領土可能出現嘅反抗。

然而,當秦末天下大亂時,呢班嚟到嶺南嘅秦將,似乎就冇秦始皇諗到咁值得信任喇。南海尉任囂呢個時候就搵咗龍川令趙陀嚟,叫佢繼任南海尉,然後動用駐南海嘅兵馬建國自立──冇錯,制度嘅漏洞就出現咗喺度,南海有尉無守,原本用嚟制衡郡守嘅郡尉自己都失去制衡,結果郡尉就可以輕易動用秦兵嚟分裂國家。日後中國會碎成一窟窟,過程都係同趙陀建南越國差唔多:地方武官攝理埋民政,或者地方長官兼掌軍事時,就有機會自己獨立或者作亂。三國如是、八王之亂如是、中晚唐藩鎮如是、民國軍閥亦如是。

 

專題【引爆中國】

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204048
Date: 2020-02-23 06:11:54
Generated at: 2020-03-31 18:20:19
Permalink: https://www.vjmedia.com.hk/articles/2020/02/23/204048/【引爆中國】(三):統一之後