香港人覺醒

 

 

點樣為之香港人覺醒呢?

講真,經歷咗差唔多九個月嘅時間,我個人而言對於大家仲喺到講咩五大訴求呀、林鄭下台呀、中大、理工呀,其實已經好厭惡。

由於武漢肺炎嘅關係,大家對於林鄭嘅憎恨都升到一個巔峰。但係喺我眼中,我都係覺得香港人離真正嘅覺醒仲有一段距離。

我口中嘅覺醒,唔係講緊咩黃藍、咩勇武和理、咩港獨,呢啲都係立場問題。所謂嘅覺醒,係一種心態問題。

如果大家到今時今日仲係覺得所有嘢都係林鄭搞出嚟,又或者真係覺得之前嘅特首幾好,林鄭真係好仆街,咁大家就係未覺醒。

香港嘅問題由始至終都係制度問題,制度問題唔解決,只會一個特首比一個差。點解大家覺得係林鄭嘅問題呢?如果一間公司可以被一個員工玩殘,而佢最後解決問題嘅方法就只係炒咗個員工,咁間公司基本上玩完,因為佢唔識得從錯誤中學習,避免問題重複發生。

而香港嘅困局,就係大家將啲問題推喺時任特首上面,攻擊特首嘅力度遠勝於其他,令問題重複發生。

之但係,大家係真唔明定假唔明香港嘅問題所在?

愚見就係大家係假唔明,所以我先話係心態問題。大家一直以嚟都否定自己嘅可能性,因為敵人一時嘅強大而徹徹底底咁卑躬屈膝,由心入面將自己放低一級,所以開嘅條件越嚟越低,只係識得自欺欺人,叫林鄭下台,呃自己下個會更好。

如果大家仍然將自己嘅心態放低一級,一味覺得自己所要求嘅實現唔到係因為自己太貪心,所以要要求得少啲,你嘅對手只會變本加厲,壓榨得你厲害啲。

呢個亦都係泛民遺毒甚深所致。泛民係一個畸形嘅政治團體,因為佢哋連最基嘅政治能力都冇。從政嘅人都要識得談判,但係佢哋唔識。

談判最基本有兩個要求,1)知道自己有咩牌;2)唔好畀對手(一開始就)知道自己嘅底線。

大家試諗下,泛民咁多年嚟有冇話過畀大家知道,香港有咩優勢,中国有咩地方要依賴香港,香港對中国有咩重要性?冇呀,佢哋只係識得同大家講中国好強大,我哋有咩要依賴中国,連最基本嘅香港係夾喺中美之間嘅呢個基本事實都講唔到。

而泛民有邊一次係唔將自己嘅底線爆曬出嚟?佢哋永遠都係話自己嘅訴求好撚卑微、好撚basic,但係政府都唔肯滿足,用嚟呃嬲,然後大家都好嬲,但係最後呢?

到最後,大家嘅香港人覺醒就係香港人好嬲,但係大家嘅心態仍然係低人一等,唔識得去爭取自己嘅權利,唔識得大膽講自己想要啲咩,唔識得利用環境、大勢呢啲條件去爭取自己想要嘅嘢。

當年契丹、女真同埋蒙古人都係弱小嘅,面對大宋呢個龐然大物,就算十戰七敗,仍然識得利用自己嘅優勢一點一點咁蠶食對方嘅實力,最後由蒙古取宋立元。

今時今日嘅香港人就被自己幻想出嚟嘅無力感嚇親,失去咗冷靜嘅頭腦,被對手玩弄於股掌之中。有時,所謂嘅強弱都係唯心嘅,一個人冇強者嘅心態,就算拎住核彈都只係綿羊,任由人欺負。

 

作者:山城小豬伯

總編話佢:「真人係幾靚仔嘅」

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204079
Date: 2020-02-25 06:19:48
Generated at: 2020-03-31 00:46:45
Permalink: https://www.vjmedia.com.hk/articles/2020/02/25/204079/香港人覺醒