以「攬炒」落實一國兩制

 

 

無論你係想港獨又好,同中国一齊堅決落實《一国兩制》又好,定《一国一制》都好,都唔可以否定嘅係,只要中共一日唔死,你要做以上任何嘢都要同佢談判。

老老實實,香港無論獨立又好點都好,基於地理位置都好難擺脫中国嘅影響,但係咁樣唔係壞事,香港過去咁多年都係咁,浮浮沉沉,有今時今日嘅地位,中国功不可沒。

中国同香港係共生關係。中国唔可以冇咗香港,香港冇咗中国地位亦都會一落千丈,咁樣唔係講緊中国好香港就會好,而係講緊大家都互相依賴。

依家嘅問題就係,大家嘅關係唔平等,由之前嘅共生關係,變到好似寄生關係咁,令香港人覺得香港慢慢死亡咁。呢一點係唔係錯覺,我真係唔識講,但係香港人身處香港,對香港嘅了解同認識點都比坐喺北京嗰班人有優勢,呢班人嘅睇法同意見確實要得到尊重。但係無奈由於《一国兩制》嘅畸形而變到今時今日咁。

而香港人今次反彈,其實喺我睇嚟,最好嘅結果其實就係攞返個相對平等嘅地位,得到個同自己實力相應嘅身份。而喺呢個過程中最後一步就係談判,即係傾數。

而談判成功與否其實喺談判開始前已經決定咗一半。雙方手上有咩牌,有咩籌碼,有咩對方嘅情報都係事先已經決定。

所以識得談判嘅人,除非已經確保自己有絕對嘅優勢,否則都唔會一開始就同對方談判,甚至為咗攞主動權,會盡力掩飾自己談判嘅意願,仲會借機搞搞震,顯示下自己嘅實力,但係同時又唔會show曬出嚟,令對方摸唔透自己,令對方高估自己嘅實力。(你睇到呢到,諗下泛民係唔係徹徹底底嘅反面教材?)

因為談判有時好得意,你手上實質拎住咩籌碼有時並唔係重點,重要嘅係對方相信你有咩籌碼。佢唔信嘅,你揸住都冇用。佢信嘅,你冇都變成有。

所以談判嘅準備功夫,唔係喺對方信自己有嘅籌碼方面落手,而係show一啲對方唔知道自己有嘅牌出嚟,出乎對方意料,令對方知道自己誤判咗形勢,要重新審視。佢知道自己誤判咗一次,就會懷疑自己會唔會誤判第二次,佢越諗越多,就對你越有利,因為只要嗰一次誤判夠震撼,佢就會傾向於高估你嘅實力。

而喺依家呢個情況,中国喺咩地方依賴香港,有幾依賴,北京當然一清二楚啦。佢哋之所以睇唔起你班香港人,唔係因為佢唔再依賴你哋,而係你哋予取予求,冇啲骨氣,當然睇你哋唔起。同理就如子女之於父母,子女喺獨立之前都依賴父母嘅,但係如果父母無底線咁寵溺子女,子女就會當父母係僕人同埋提款機。

呢個就係香港現時嘅困局。

中国喺香港有咩求,大家都清楚,問題就係中国唔相信你哋會破壞呢啲嘢。所以佢唔信你哋手上有籌碼。

依家就係談判前嘅準備階段,但係大家仍然話唔到畀中国聽自己有幾多籌碼,引唔到中国嚟同自己談判。

所謂攬炒,就係話畀中国知,自己真係會拎住和氏璧一齊死,寧作玉碎不作瓦全。

但係大家全程都冇話畀中国知自己有呢種決心。大家只係關心民意、國際戰線,捨易取難,冇認真睇下自己拎住咩牌。

大家慢慢升級,一步一步威脅,震撼力遠遠冇嚟一次狠嘅大。就好似一個人慢慢升級話自己要自殺,大家係唔會care,你一開始就撼頭埋牆,大家就會驚。

更莫講,你仲唔係言出必行,被人睇穿你係紙老虎。

有啲嘢,你唔狠下心,一勞永逸,真真正正攬炒一次震懾對手,到最後就算你真係攬炒對手都唔會相信你。有聰明嘅頭腦而冇堅毅嘅心,到最後都只係有啲小聰明,因小而失大。

狠話永遠只可以講一次,所以要一次到效。否則,你要講第二次嘅時候已經注定失敗,因為已經失咗威信,冇人會將你嘅說話放喺心中。

每次行動嘅勝敗都影響談判嘅籌碼。大家誤以為自己做嘅嘢係要推翻政府,一次半次失敗唔緊要,最後一次贏就OK。但事實上,香港做緊嘅嘢唔係完全消滅對方,而係令自己同對手處於比較平等嘅位置,嚟一場談判。否則,你最後一次大勝都好,你最後得到嘅嘢都唔會如你所想。

但係大家嚟到今時今日,根本畀唔到人睇到你攬炒嘅覺悟。大家就好似街頭打架,體能已經弱過人,但係出拳嘅時候仍然就住就住,驚死自己打死人咁,難怪會被人打到頭破血流啦。

藺相如視死如歸,做好覺悟,話畀對方知我嘅目標就係唔畀你攞到和氏璧,就算死、就算冇咗塊璧都無所謂,所以可以完璧歸趙。但係香港人一開始就話曬畀人知自己都想完璧,難怪中共只係將今次事件當係下面嘅人處理不當,而唔覺得香港問題需要正視啦。

 

作者:山城小豬伯

總編話佢:「真人係幾靚仔嘅」

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204081
Date: 2020-02-26 06:35:32
Generated at: 2020-03-31 10:04:08
Permalink: https://www.vjmedia.com.hk/articles/2020/02/26/204081/以「攬炒」落實一國兩制