要對付林鄭,唔係扮對付林鄭,可以點做?

 

 

今日林鄭政府話每人派一萬,然後總出現飯民反對派輿論想定下個風向。

話乜嘢「我寧願唔要嗰一萬蚊,都唔好俾警察攞到超時津貼」。

呢啲論調,成日講到喺而家嘅格局之下,反對派係會做到野咁。無他嘅,都係為左煲下個溫度,來緊九月立法會乜嘢反攻功能組別云云。

就當你夠票,大家知唔知道「否決財政預算案」係一件咩事?唔係否決完又批臨時撥款咁契弟啵?

 

立法會權力大唔大?其實喺行政主導原則之下,日常嘅權力其實唔大,尤其是係大家熟識嘅基本法第74條規定

香港特別行政區立法會議員根據本法規定並依照法定程序提出法律草案,凡不涉及公共開支或政治體制或政府運作者,可由立法會議員個別或聯名提出。凡涉及政府政策者,在提出前必須得到行政長官的書面同意。

有乜嘢法案係唔涉及公共開支或政治體制或政府運作?年年平反六四嗰啲?

 

但立法會,如果真係過半,真係可以令到成功香港停擺,成個香港政府癱瘓。

第五十二條
香港特別行政區行政長官如有下列情況之一者必須辭職:
( 一 ) 因嚴重疾病或其他原因無力履行職務;
( 二 ) 因兩次拒絕簽署立法會通過的法案而解散立法會,重選的立法會仍以全體議員三分之二多數通過所爭議的原案,而行政長官仍拒絕簽署;
( 三 ) 因立法會拒絕通過財政預算案或其他重要法案而解散立法會,重選的立法會繼續拒絕通過所爭議的原案。

中共雖然懼怕民意嘅力量,設好多關卡令民意唔會咁輕易顛覆個政權,但如果個民意真係夠堅實同埋夠大,中共嘅制度仍然係設左一度吸收反對力量嘅渠道。

立法會過半,係可以否決財政預算案,否決左之後,社會就要經歷一個嚴重嘅陣痛,最直接就係,所有公務員,連同消防醫護法庭無糧出,仲有津貼學校教師都食穀種。

而時任特首呢個時候會點做,佢可以解散立法會,但呢個解散與否嘅動作,係喺特首會同行政會議決定。

可以想像,要反抗政府嘅民意去到幾咁大,即係十七萬個公務員,十萬個教師,全部肯唔出糧同你攬炒,先逼到特首「可以」解散立法會,萬一佢肯解散一次,而個民意仍然企攬炒嗰邊,再選一次之後又贏,再否決財政預算案,咁特首就必須辭職。

呢個唔係做下民調,話特首支持度只有9%,而係喺個制度入面,令香港停擺,呢種停擺先係令成個中共授權之下嘅一國兩制真正受到考驗,都唔好計特首其實未必真係會解散立法會。

 

未夠一半嗰陣同你講「保住三分一否決權」,而家又販賣「立法會過半,反攻功能組別」假希望。

唔知梁耀忠之流,九月報唔報名選立會呢?

果然海市蜃樓係最引人入勝。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204129
Date: 2020-02-26 18:08:14
Generated at: 2020-03-30 19:46:38
Permalink: https://www.vjmedia.com.hk/articles/2020/02/26/204129/要對付林鄭,唔係扮對付林鄭,可以點做?