中共就係睇穿香港,民間抗爭意志,只支撐到反對派口頭反對

 

 

政府派一萬蚊,一石激起千層浪,成個社會討論焦點去晒嗰度,無論係話要,定係話唔要一萬蚊嘅,都係圍繞住人地嘅議程去討論。

然而呢個討論,如果深化到反思一下自己嘅抗爭籌碼,其實都不失為好事。

香港基本法賦予特首好大權力,而立法會相對上就顯得係無牙老虎,但中共畢竟係靠下而上嘅組織同抗爭起家,佢地唔會唔知道民意係要點樣撚化(manipulate)。

如果香港係美國英國日本,民意調查嘅「鍾唔鍾意」好大機會直接反映喺選舉活動,即係啲人投唔投票,投俾邊個。可惜嘅係,如果好似香港反對派咁講,講到香港嘅抗爭,其實係反對中共統治,要革命,即係個抗爭主線,係拖垮呢個政府嘅施政。

香港嘅基本法,係賦予左立法會反對財政預算案嘅權力,而財政預算案一旦被「真。否決」,即係唔會扮反對其實通過「臨時撥款」,咁政府必定停擺,停擺嘅意思,係十七萬公務員,十萬教師無糧出,仲未計政府工程停,金融交易唔知會唔會停。特首面對呢個社會危機,可以解散立法會,重新選舉,尋求民意支持,重新通過財政預算案,恢復社會秩序,呢個係中共利用基本法,「尊重」(亦可以話係吸納)香港民意嘅後門。

但字面係咁,實行起來可以點?特首可以解散立法會,亦可以唔解散的,並非必然。要令特首,即係基本法賦予香港嘅一國兩制,真係面臨考驗,就係要民間抗爭意志。真係會同呢個政權攬炒,真係願意承受政府停擺,十七萬公務員十萬教師真係願意無糧出。

而事實上,民間係唔會肯。

啱啱就發生左,孔聖堂中學教師何柏欣,為之前在fb 轉貼(佢咁講啦)一則侮辱警察藏頭詩事件,而登報道歉。

事件反映,香港民間嘅抗爭意志,就係咁多。口頭反對可以,真係無糧出?唔好啦。

體諒還體諒,分析還分析,面對香港咁嘅抗爭格局,每個人都要為自己福祉著想,唔通真係用自己同你玩抗爭咩?

香港人一定要學嗰位老師,自求多福。最緊要唔好走去暴動然後被捕送死,到最後反對派係一啲嘢都唔會還返俾你。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204268
Date: 2020-02-27 14:37:44
Generated at: 2020-03-31 09:35:44
Permalink: https://www.vjmedia.com.hk/articles/2020/02/27/204268/中共就係睇穿香港,民間抗爭意志,只支撐到反對