【長文慎入】曾經我都係「屯門童黨」,而家我都算一個專業人士

 

 

 

之前童黨欺凌事件令屯門人鬧得熱烘烘,咁我又借下機會分享一下自己嘅過去啦~

 

講起我嘅過去好多人都覺得好慘,係我小六下學期我阿媽就開始入院,係中一開學無幾多日佢就上天堂離開我lu。咁我老豆呢係老夫少妻嘅,係我阿媽入院前佢就老到退休,咁佢又老又懵都唔使指意會識照顧我,即係我以前係靠綜援生活而且無家庭溫暖下成長。

好啦係一個咁空虛寂寞凍嘅階段,心靈就想搵嘢去填塞,咁我當時可以話際遇及性格下係有啲亂嚟嘅,所以分別去咗三個地方去填塞我心靈空缺嘅。第一個地方就係由細識大無可避免嘅同邨朋友;第二個地方係我由小學到中學都係基督教學校,接觸到教徒帶我返教會係一件好自然嘅事嚟嘅;第三個地方係因為我細細個阿媽就俾我去啲社區中心玩,然後都好自然咁由一個參加者變成義工去幫手啦~

 

首先我講咗只係維持到一年嘅教會先啦,一開始緊係覺得好有愛啦,啲人個個都好友善嘅,就算啲聚餐因為我窮都會以記住數先(其實無記過)邀請我參加。

咁都有弟兄姊妹好有心咁係早上七點左右就係學校附近帶領我地讀聖經靈修,當時嘅我真係用心咀嚼經文,覺得自己同神connect到㗎。然後有時放假只要唔使做義工就會返教會,一班人係一個地方聽啲人分享、唱聖詩及讀經,都會有陣時搞下啲活動嘅,又係同一班人聚埋一齊囉~

咁我反叛派嚟㗎嘛,內心深處不斷有好大掙扎,越了解基督教嘅宗旨就越覺得教會好有問題。唔係話神搵返迷途嗰一隻羔羊會比擁有原本無迷途嗰99隻更加喜悅㗎咩?成班人成日聚埋一齊又點樣去搵迷途羔羊呢?然後我又發覺教會嘅人有問題,佢地都會有邪惡嘅一面,一樣會有明爭暗鬥,就算作為旁觀者去睇對於佢地搬龍門式嘅宗旨真係摸不著頭緒。

之後仲痴線,做乜鬼嘢都話係魔鬼嘅誘惑,哩樣唔俾做嗰樣唔俾做,甚至電視都會被話係四方魔鬼………………經歷一年返教會訓練,終於話到我受洗啦!好開心可以去到另一階段啦,過咗兩個星期後又有個姊妹約我食飯話我未夠成熟到去受洗。

喂!你地可以任意去代神去判斷一個人嘅,你地係大人就玩晒啦,完全睇唔到受洗嘅路係應該點行囉~ok,我信神唔係為咗受洗,神造人係要人管理地球㗎嘛,成日返教會真係好浪費時間,不如用返啲時間接多啲義工去做,開心又有意義。之後我慢慢咁離開個教會,佢地有人發覺我無再返就晚晚打電話去我屋企,如果我唔接每次都響夠兩三通先會停,哩種另類騷擾持續咗超過半年…………

 

然後我就講下重頭戲,講下同邨嘅朋友啦~

其實係條邨呢就分咗幾個年齡層去聚集嘅,70後係分咗兩班,而我地80後係有一班嘅,我地全部都識大家㗎,但就唔會一齊玩咁囉。其實小學嘅時候就唔鍾意70後嗰兩班㗎啦,佢地成日好夜都唔返屋企,久唔久就係邨內玩到好嘈,嘈住啲人瞓覺好無品㗎嘛!而且又成日恰我地,係小學佢地已經經常問我地攞錢,幾蚊幾蚊咁攞,唔係屈我地就係兇我地。

之後上到中一,由小童變成少年,咁啱玩埋一堆嘅無個係健康家庭成長,我係因為阿媽離世而變單親家庭已經比佢地幸福㗎啦,點都享受過幸福而齊全嘅童年吖嘛。係個個都有咁上下背景下,大家都係無人管嘅少年,個個都會因為悶而出嚟係屋邨搵地方聚集一齊,其實都無咩做吹水啲話題無聊,好多時齋坐。

講到童黨呢,以前嘅我就係同哩班人一齊搞到個人好自卑,因為打扮下又話你發姣,想斯文返啲又話你發姣,啲女只係識玩批判同妒忌,所以以前嘅我好男仔頭,仲唔想俾人話我姣仔所以成出手打啲仔,以前個朵叫做「暴力神」呀,好打過好多仔,好大力,推鉛球求求其都可以有銀牌,打籃球射三分不廢吹灰之力,排球隊嘅發球機,乒乓球殺球大力到啲人係避。不過我嘅內心深處係想做返個女仔,但慣咗男仔頭性格,就算長髮及腰都俾人一種男仔感覺,剪短頭髮背影俾人以為係仔就係經常嘅事。

同佢地一齊經常三五成群,我無諗過同佢地鬥,但佢地都會主動同你鬥,啲女最鍾意就係咁。哩頭陪我買衫,叫我買啡色長身外套,轉頭佢係背後買同款黑色嘅,同其他朋友講話要同我比較喎……我唔係自誇,我以前嘅身型根本係模特兒級數,生得高、有長腿、有胸、有腰、無腩(我都好想回復以前咁),真係可以著咩都靚,只係唔識襯衫㗎咋,要同我比嗰個矮過我腳又粗,點解要自我傷害呢……哩條女真係痴痴地,成日搵我嚟搞,久唔久話要打我,其他人收到風就搵人撐我,最後佢咪俾人捉入後樓梯兇佢,話佢想打邊個就撐邊個,真係好煩搞到我企係中間on99咁都唔知做乜,我天生好過你唔關我事㗎嘛,比咩較啫?

又另外一單,一個明明經常一齊玩,兩個都係長髮及腰俾人玩孖妹,我就用心對朋友嘅所以肯定唔會同朋友爭嘢嘅。有段時間我地跟咗一個姐姐出去蒲識到啲仔啦,其中一個生得高大嘅,咩樣就真係記唔起只係記得唔靚仔囉~佢第一晚就坐我隔離,又幫我頂酒又借啲意捉我手仔,其實兩者都明顯過電㗎啦~佢有一晚都向我暗示咗,但我又唔識應對扮聽唔明然後就不了了之。但隔咗一排佢轉風向追咗我個friend,咁嗰個女仔friend就無啦啦話我同佢爭仔call我出去對質。然後又有friend 打電話叫我唔好出,話佢搵人圍我。What?你無嘢吖嘛?就算真係爭你都爭贏啦~點解要贏我贏到咁盡呢?更何況我乜都無做過喎?

唔再數啲經歷啦,同哩班人一齊無乜快樂回憶嘅,而且都唔係我想行嘅路。佢地經常無所以事事,晚晚俾警察查身份證,經常去友愛食宵夜逗留係屯門公園等仔撩,係自己邨又唔夠啲70後兇,去到其他區又唔會大膽得去邊,未見過佢地打人但俾人打就見過,佢地大多讀完中三就無再讀落去,得幾個有再讀落去嘅。但我中一同佢地玩都可以長居十名之內,升上中四係好自然嘅事。不過上到中四就搬屋,我就要求搬去一個唔會再遇到佢地嘅邨,順便斷聯呀~

 

最後要講嘅地方就係係社區中心做義工啦,其實小學雞嘅時候都有開始做下嘅,真正踏入去做義工就係六年班考完試嘅時候,由一個平時參加開活動轉變到接受義工訓練。係我少年嘅時期係負責兒童及家庭服務隊,幫啲社工去籌備活動及入組帶活動,一開始係因為唔使錢又有活動玩,然後有一次一個長期活動係每個星期有兩日放學後直接走去一間小學,嗰個活動可以話係一個課程,對我地義工係一個挑戰,因為對象係一啲操行D以下嘅被學校評為劣質嘅學生,以人釘戰術一個義工對兩個小朋友,我嗰對仔真係筍呀,一個牛脾氣好容易會發火打人,而另一個呢就同我一樣鍾意撩事鬥非唯恐天下不亂,簡直係perfect match呀!

當時我都只不過大佢地幾年但就要以大姐姐姿態去教導佢地,只記得不斷替自己洗腦「佢地係我個仔,唔可以放棄佢地」,就係咁陪住佢地上訓練課程,每次有事第一時間攬住牛脾氣嗰個,推開搞事嗰個,等佢地兩個冷靜落嚟我先開始說教,長時間陪伴及教導下我地三個感情都好好課程後期有次出郊外旅行其他組有啲仔女仍然好唔聽話,我好自豪地對仔好受我教無失禮人,不過我都係反叛底嘅同啲小朋友差唔多貪玩,有時都要我對仔幫我做哨。去到課程完結聖誕派對,真係好鍾意一班義工整嘢食同籌備派對活動,每次都有好多搞笑情節又可以俾我一展所長整嘢食。個派對係小朋友會同父母一齊參加,對仔嘅媽媽終於見到我,佢地好感激咁走嚟多謝我令佢地嘅小朋友轉變好多,就係嗰一刻就發現自己嘅使命係一直做義工照顧嗰啲被人冷落或被嫌棄覺得好百厭嘅小朋友。就係咁我就整個讀書年代都係為兒童及家庭服務隊服務啦~陪住班小朋友玩咗好多活動,所以我識如多嘢例如攀石、獨木舟、野外生火煮食(BBQ我一個人起爐可以唔使十分鐘)、行山知識等等,所有渡假營係去過晒,重點係人生最要好嘅幾個朋友都係做義工認識,知道同合適又有品格嘅朋友相處係可以好開心好舒服,得到好多支持及包容,同啲童黨朋友相差太遠啦~

 

好啦,講晒我少年時期會做嘅嘢,其實有段時間真係好忙㗎,日頭做義工夜晚做童黨個腦真係裂裂地。係我中學都有啲有背景嘅人嘅,佢地知我同邊班人玩後都會態度改變,我唔會覺得威㗎,因為我一直無同人講就係想以一個平凡學生係學校出現,唔講都無人知我一放學就換衫食煙講粗口,蝦蝦霸霸咁令人難受都唔係我想一直行嘅路,而且我放重點係義工朋友道,同佢地會friend過中學同學。

不過又講吓啲同邨朋友佢地之後嘅路係點,佢地好多都讀完中三就算啦,有啲就一路攞失業綜援一路係華都做卡拉ok,然後呢好似都係做下啲服務行業,再大啲有幾個做咗單親媽媽,佢地都係正正經經咁做人嘅,過去嘅風光不再咁啫,昔日以為好威嘅嘢到咗某個年齡層就會因為生活必須作出改變㗎啦~

 

我又講下我自己吖,讀到中五就好不滿香港嘅教育制度而反叛唔去讀書享受年少瘋狂由中四嘅十名內跌到中五嘅無名次,但又知無返張證書出去社會等如送死,重讀中五考返靚仔少少成績再讀IVE,然後以優異生畢業,人生要咁樣高高低低先無咁悶吖嘛~我初戀係讀IVE嗰時開始,從來無同人爭過仔,從來未試過同過大過自己嘅人拍拖(我理想係大自己三、四年㗎,遇唔到吖嘛),而且都係靚仔嘅,次次都一係無人追,一嚟就幾個一齊嚟,就算依家係單身係公司都有師弟願意主動做兵(講明我係唔收兵,佢地主動係佢地嘅事)。即係想講做女人係要增值自己同保養自己,貪靚學習打扮就緊啦,修養就更重要。

趁年輕就多啲出去,以前係九龍讀IVE,依家係港島返工,出得去多望返屯門牛嘅言行打扮真係追唔上個世界㗎喎~出面咁多選擇,爭乜鬼嘢仔,打乜鬼嘢人啫!姐姐我假假地都係一個專業人士,唔會因為兩個臭錢就隨便覺啲仔好,唔會為結婚而跪低。中學時幻想自己大個可以四圍飛,我依家就年年去旅行。就算份工唔係我鍾意都好,但我知自己要咩而去付出換取自己要嘅嘢行自己嘅路,留係屯門三五成群咁玩幾年好啦,青春有限浪費得好少少得唔得?唔使好有遠見,但望遠少少得唔得?睇依班後生咁樣真係激死我!

 

 

作者:牛靈

牛靈
屯門開荒牛加盟成員

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204317
Date: 2020-02-29 03:47:11
Generated at: 2020-06-03 02:31:03
Permalink: https://www.vjmedia.com.hk/articles/2020/02/29/204317/【長文慎入】曾經我都係「屯門童黨」,而家我都