將軍澳屋苑私家路被濫用,玩串party 都係辛苦我地呢啲職業司機。

 

 

之前有篇文章分享過「觀音山村」嘅故事,今日又分享一啲香港其他地方嘅馬路小故事。

相信大家都聽過「維景灣畔」呢個屋苑,如果有讀者唔知係邊的話,其實佢就係調景嶺「知專」斜對面。咁呢個屋苑又有咩特別呢?話說呢個屋苑有兩個出入口,一個就係調景嶺閘口,另一個就係經澳景路出油塘。亦即係話,如果你住喺「維景灣畔」的話,每日出入市區返工,每日就慳返六蚊隧道費(澳軍澳隧道每程三蚊)。而且比起排隊過隧道,澳景路真係快啲。

以往嚟講,兩個出入口都通嘅,即係你其中一個閘口入閘,係可以係另一個出口直接拍八達通出閘。不過,好多人就睇準呢個屋苑咁得天獨厚嘅位置,於是每日返工放工都經呢條私家路行車。每日咁多車輛經過帶嚟嘅嘈音廢氣都不特止,由於呢個屋苑嘅車路係舖磚仔,細細塊四四方方個種,咁大流量嘅車流呢種磚仔好快就輾到爛晒,好快啲路磚又要舖過喇。咁舖磚啲錢邊度嚟?當然唔會係個班入嚟「借路」嘅人俾啦,嗰啲人相信直頭「多謝」都冇一句。呢啲費用就由成班業主食哂,個個都一定媽媽聲。於是,管理處就訂咗一套新嘅規則:但凡外來車輛入閘,邊個閘口入就邊個閘口出,如果要喺另一個閘口出,個司機就要跟住個住戶去返地下大堂「座頭」(保安崗位)拎飛仔,然後揸車去閘口將張飛仔交俾閘口保安,先會俾你拍卡走人,否則個保安唔會開返個權限俾你拍卡。

如是者,外來車輛入嚟「借路」嘅行為就杜絕咗,而每次載客入「維景灣畔」嘅時候,我都會問個客攞飛仔,以防出現要係另一邊閘口附近接下一個客的話,就要兜個大圈蝕隧道錢兼有機會個客唔等得而被取消車程嘅麻煩。通常啲客都好好人,都肯幫手帶我去座頭拎張飛仔。咁就「進可攻,退可守」,邊個閘口都出得。

 

【嗚巴軼事】

 

作者:車上人間

一個男人一架車,見盡香港人和事。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 204336
Date: 2020-03-01 04:42:28
Generated at: 2020-08-13 11:25:21
Permalink: https://www.vjmedia.com.hk/articles/2020/03/01/204336/將軍澳屋苑私家路被濫用,玩串party-都係辛苦我地呢